Při Zhorjelskim pomniku za wopory fašizma su njeznaći knihi spalili

Zhorjelc (SN/BŠe). 10. meje 1933 buchu w němskich městach tysacy knihow spalene. „Akcija přećiwo njeněmskemu duchej“ nacionalsocialistisce zmysleneho Němskeho studentstwa měrješe so přećiwo židowskim a druhim awtorkam a awtoram. Spalenje knihow bě wjeršk štyri tydźenje trajaceje akcije, kotraž bě so 12. apryla započała. Twórby wěstych spisowaćelkow a spisowaćelow běchu po tym samo zakazane a stejachu na tak mjenowanej čornej lisćinje.

Minjeny štwórtk su dotal njeznaći knihi při Zhorjelskim pomniku za wopory fašizma spalili. Kedźbliwi policisća su woheń wuhladali a jón zhašeli. Zasadźenje wohnjoweje wobory trěbne njebě. Tež pomnik so na zbožo wobškodźił njeje. Wo kotre knihi so dokładnje jednaše, jasne njeje. Prawdźepodobnje běchu je skućićeljo z bliskeje zjawnje přistupneje knihownički wzali a zapalili. Policija a statny škit pad nětko dale přepytujetej.