Kubłanje steješe w srjedźišću zjězda Budyskeho­ wokrjesneho zwjazka CDU sobotu w „Knježim hosćencu“ w Njeswačidle. W tutym zwisku su wobdźělnicy jednohłósnje pozicisku papjeru wobzamknyli.

Njeswačidło (SN/MiP). Hladajo na ćežišćo schadźowanja bě sej wokrjesne předsydstwo CDU swojeho stronjana, sakskeho kultusoweho ministra Conrada Clemensa přeprosyło. Z přednoškom wo aktualnej kubłansko-politiskej situaciji w kraju wón diskusiju wo temje zahaji. W swojich wuwjedźenjach minister podšmórny, zo je wažne, zo aktualnu kubłansku infrastrukturu a jeje decentralne stejnišća zachowamy – předewšěm we wjesnych kónčinach. Wysoka šula Žitawa/Zhorjelc, hdźež poskićuja mjez druhim studij wučerstwa zwonka wulkich sakskich městow, je dobry přikład za to, zo „smy na dobrym puću“.