Baba Bernadet Cyžowa so po wjace hač 46lětnym skutkowanju na wuměnk podała
„Sym wšitkim dźakowna.“„A nětko spěwam mi k wjeselu a Bohu k česći.“
Sedźu w dobrej stwě Bernadet Cyžoweje we Wudworju a čuju so přewšo witana. Ze šalki stupa přijomna wóń kofeja a na talerju słódny přikusk přitulnosć přisporja. Njetraje dołho a bjesadujemoj. Přeco zaso klinči wutrobne smjeće po přijomnje wuhotowanej stwě, w kotrejž mólby na sćěnach a knihi na polcach, mjez nimi wosebje serbskorěčne wudaća, skutkuja. Mnohe rostliny k wurunacej a měrnej atmosferje přinošuja. Tajkule je wona rady tež žonam posrědkowała, kotrež su k njej přišli, zo by serbska baba jim při porodźe dźěsća poboku była. Na wšě 46 lět a něšto měsacow je Bernadet Cyžowa maćerje při porodźe jich dźěći přewodźała. Mjeztym zhladuje Wudworčanka na swoje powołanske skutkowanje, kotrež je nimale wšědnje nowe žiwjenje zrodźiło. „Lochko mi njebě so ze swojim powołanjom rozžohnować a na wuměnk hić. Sym rady na dźěło jězdźiła a kóždy dźeń z wulkimi wočakowanjemi zahajiła. Wšako njemóžeš přirodny porod dźěsća planować.
