Rěčny centrum WITAJ swjeći lětsa swoje 25lětne wobstaće. Přichodnu njedźelu přeproša wot připołdnja na mjeztym 15. swójbnu schadźowanku. Milenka Rječcyna je so z nawodnicu RCW dr. Beatu Brězanowej rozmołwjała.

Što Wam tónle jubilej woznamjenja, wšako nimale 17 lěta RCW nawjedujeće?

Jubilej je přewšo rjany podawk, na kotryž so jara wjeselu, a to zhromadnje ze cyłym teamom. Sym přez cyłe lěta woprawdźe jara zbožowna na tymle dźěłowym městnje a wuhlady su tajke, zo to tež dale budu.

Tónle njedźelu swjeći RCW zhromadnje z wulkej syłu gratulantow tradicionalnu swójbnu schadźowanku na nowym městnje. Čehodla?

Wosebite narodniny zasłuža sej wosebity swjedźeń! Składnostnje 25lětneho wobstaća Rěčneho centruma WITAJ přeprošamy lětsa na swójbnu schadźowanku do Serbskeho ludoweho ansambla. Tam přihotujemy z našimi partnerami poskitki we wšitkich rumnosćach.

Dopominaće so hišće na spočatki swójbneje schadźowanki?

Haj. Te mějachu w Chrósćicach hnydom jara dobry wothłós. Smy samo wosebity róžk za staršich ze ćěšenkami zarjadowali. Tuta atmosfera bě cyle wosebita.