Štyri serbske lajske chóry, štyrjo spěwni solisća kaž tež chór a orchester Serbskeho ludoweho ansambla wuhotuja kónc tydźenja tři koncerty, na kotrychž předstaja oratorij „Nalěćo“ z kompozitoriskeho pjera Korle Awgusta Kocora. Cyłkowny nawod wukonja dirigentka SLA Katharina Dickopf. Bosćan Nawka je so z njej rozmołwjał.

Knjeni Dickopf, kajka je powšitkowna nalada krótko do wulkeho wjerška?

Wšitcy so wjesela, a wšitcy so ze zapalom wo to prócuja, zo so wšitko tak derje kaž móžno poradźi. Za to smy něhdźe měsacaj zwučowali a směm rjec, zo smy dosć derje přihotowani. Dźensa mamy składnosć, so na akustiske wobstejnosće w Budyskej tachantskej cyrkwi swj. Pětra nastajić, při čimž je mój hłowny nadawk zwěsćić, kak hodźi so homogeny zwukowy wobraz wutworić, zo by kóždy hłós a kóždy instrument zaklinčał, kaž měł zaklinčeć.

Nic naposledk hladajo na dohromady nimale 160 sobuskutkowacych: Što běchu w běhu nastudowanja twórby najwjetše wužadanja?