Budyšin (SN/hn). Regionalni organizatorojo CSD (Christopher Street Day) přeproša tež lětsa zaso do Budyšina, při čimž wotměje so akcija na hinaše wašnje hač dotal. CSD –  zarjadowanje za zjawne posrědkowanje zajimow queernych – je so zašłe lěta tež w sprjewinym měsće chětro etablěrowało. Loni bě so něhdźe 3 000 ludźi zbliska a zdaloka na demonstraciji w Budyšinje wobdźěliło, mjez nimi tež tójšto swójbow a wjetši serbski blok z cyłeje Łužicy.

Dotal bě CSD tež w Budyšinje wulka demonstracija z plakatami a narěčemi. Lětsa budźe to mjeńši event. ,,Smy so wědomje za to rozsudźili, zo so lětuši CSD w Budyšinje w hinašim ramiku wotměje. Přičiny su wšelakore: Na jednej stronje chcemy wosobinske kapacity, kiž su so wosebje loni na CSD chětro strapacěrowali, trochu šonować. Na tamnej stronje chcemy CSD-zarjadowanjam w tamnych městach wjace kedźbnosće zmóžnić. W minjenymaj lětomaj wšako steješe CSD w Budyšinje wosebje w nadregionalnych medijach chětro w fokusu“, Jonas Löschau, jedyn z hłownych zamołwitych a komunalny politikar Zelenych, w rozmołwje z našim wječornikom wuzběhny.