Po tym zo je Zwjazkowe předsydstwo Domowiny na swojim poslednim posedźenju stejišćo za zaručenje serbšćiny na serbskich šulach w Sakskej zabrało, je so předsyda třěšneho zwjazka Dawid Statnik z listom na sakske statne kultusowe ministerstwo wobroćił. Wo tutej politiskej akciji je so Marcel Brauman z nim rozmołwjał.

Što wot kultusoweho ministra wočakujeće – na přikład, zo politisce do běrokratiskich procesow zarjada LaSuB zasahnje a 1. lětnikej w Radworju tola serbsku rjadownisku wučerku zmóžni?

Trjebamy personal na serbskich šulach, kotryž je zwólniwy a kmany, dźěći nic jenož serbšćinu nawučić, ale je tež za nałožowanje serbšćiny zahorić. To njeje ničo noweho, wšako steji tole w koncepće 2plus a tež w postajenju wo dźěle na serbskich šulach. Konkretnje sej žadamy, zo ma kóžda rjadownja na serbskej šuli rjadowniskeho wučerja abo wučerku, kiž serbsce rěči.