Wo jeje wosobinskej prócy, wšědny dźeń serbować, je so z Kati Strukowej, społnomócnjenej za serbske naležnosće Zhorjelskeho wokrjesa, Andreas Kirschke rozmołwjał.

Wot 2023 wukonjeće hłownohamtsce z 9,5 hodźinami tydźensce tute zastojnstwo, nimo 20 hodźin jako sobudźěłaćerka za Kulturny rum Hornja Łužica-Delnja Šleska wot lońšeho nowembra. Što Was za wšědne dźěło społnomócnjeneje motiwěruje?

Přisłušam hižo wjele lět Domowinskej skupinje w Slepom a sym tež jako něhdyša zastupowaca předsydka Zhorjelskeho wokrjesa CDU wjele stykow ze serbskimi towarstwami a institucijemi pěstowała. K nim słušachu Serbski kulturny centrum (SKC) Slepo, Njepilic statok w Rownom a Šusterec statok w Trjebinje. Na to chcych nawjazać – wobchowanje serbskeje rěče, kultury, žiwjenskeje radosće a zhromadnosće leži mi na wutrobje.

Kajki přistup maće dźensa k serbšćinje?