„Zběžk je po cyłej Europje słyšeć był. A sym přeswědčeny, zo je nam tole pomhało“, praji něhdyši Chróšćanski farar Clemens Hrjehor w lěće 2021 w rozmołwje z Markom Kowarjom składnostnje 20. róčnicy Chróšćan zběžka. Wozjewjenje swojeho teksta na jubilejnej manifestaciji Domowiny a angažowanych Serbow, spominacej na měsac trajacy protest přećiwo zawrjenju srjedźneje šule, Hrjehor wjace dožiwił njeje; krótko do toho bě zemrěł.

Tehdyši 5. lětnik – šulerjo a starši – a jich podpěraćeljo zbliska a zdaloka su stawizny pisali. Wojowanje wšak skónči so z poražku: W Chrósćicach je dźensa jenož hišće zakładna, nic pak srjedźna resp. wyša šula. Jako so Google-KI za podawkami 9. awgusta lěta 2001 prašach, naliči mi tři: atentat sebjemordarja na pizzeriju w Jerusalemje, rozsud US-prezidenta, zo budźe stat přeslědźenje embryjonalnych rodobańkow spěchować a (Google wě, zo bydlu w gmejnje Njeswačidło) „zběžk w Serbach přećiwo zawrjenju šule w Chrósćicach“.