Na wopyće pola serbskeho dźiwadźelnika Klemensa Bobki
„Spaziergang nach Syrakus“, tak rěka film, kotryž běži wot spočatka měsaca w kinach po cyłej Němskej a kotryž steji w němskich kinowych chartach aktualnje na druhim městnje. Film jedna wo mužu z NDR. Jeho hraje znaty dźiwadźelnik Charly Hübner. Wón soni wo tym, jónu do italskeho města Syrakus a wottam zaso wróćo do NDR pućować. Pohladaš-li tróšku zaměrnišo na wobsadku filma, čitaš tam nimo Hübnera a dalšich znatych mjenow němskich dźiwadźelnikow tež mjeno serbskeho, kotrehož pak snano w Serbach skerje młodźina znaje – mjenujcy Klemensa Bobku.
