Milena Šołćic z Róžanta je tuchwilu poslednja­ awtorka w kruhu tych, kotřiž su swoje abo literarne twórby druhich za internetny portal serbskiTV natočili. Aktualna produkcija budźe bórze na wotpowědnym YouTube- a Instagram-kanalu přistupna.

Murje něhdyšeje wuhibkarnje w Nižej Wsy pola Rakec su impozantna kulisa za kriminalku, kotruž je studentka wučerstwa za předmjety serbšćina, etika a filozofija Milena Šołćic napisała. Sćěny su w pisanych barbach posprayjowane a ležownosć skutkuje mysteriozna. „Kriminalka so do tohole miljeja derje hodźi“, tak Jan Bělk, iniciator mediateki serbskiTV, w kotrejž so młodostni runje kaž starši a znaći akterojo ze serbskimi literarnymi přinoškami předstajeja.