Budyšin (SN/bn). We wobłuku aktualneje Maćičneje akademije, kaž Maćica Serbska (MS) swojemu rjadej popularnowědomostnych přednoškow rěka, wotmě so wčera druhe zarjadowanje na žurli Budyskeho Serbskeho domu. Pod nadpismom „Stadtbuch mit Bürgereid. Zum Überlieferungskontext des ‚burger eydt wendisch‘ aus dem frühen 16. Jahrhundert“ předstaji Budyski měšćanski archiwar Rico Heyl něhdźe 30 zajimcam přehlad swójskeho slědźenja wo Budyskej měšćanskej knize. Zběrka rukopisnych dokumentow je sobu najstarša (zdźeržana) swojeho razu a wažne žórło za z lokalnymi a regionalnymi stawiznami zaběracych so historikarjow. Tak swědči na přikład zapis dawkow a wotedawkow (Geschossregister) wo tehdy hižo dosć akribiskim skutkowanju komornistwa, kotrehož nadawki dźensa financny zarjad wukonja. Lisćina cłow dopokazuje,­ zo su Budyšenjo w zažnym nowowěku mjez druhim z drohotnymi korjeninami wikowali a zo priwilegej, piwo warić směć, pilnje sćěhowachu.