Choćebuz (SN/bn). Wot 3. do 8. nowembra stanje so Choćebuz znowa ze zetkanišćom filmowcow a zahorjenych za kino z cyłeje Europy. Program 36. Choćebuskeho filmoweho festiwala (CFF) wopřijima 147 filmow z 43 krajow. Z dwanaće swětowymi premjerami, šěsć mjezynarodnje prěni raz předstajenymi produkcijemi a 58 němskimi premjerami skići CFF wo­spjet wobšěrny dohlad do aktualneho srjedźo- a wuchodoeuropskeho kina. Nimo wubědźowanjow wo myto „Lubina“ steji lětsa wosebje filmowstwo w Letiskej a na Čornej Horje w srjedźišću. Zdobom wěnuja pólskemu režiserej Andrzejej Wajdźe­ składnostnje jeho 100. posmjertnych narodnin retrospektiwu a prezentuja wubrane filmy we wosebitych sekcijach. Ćežišća tworja mjez druhim přewrót a spad murje wobswětlace produkcije, změnu klimy dokumentarisce a/abo wuměłsce wotbłyšćowace resp. komentowace přinoški a nic naposledk (komercielnje) wuspěšne filmy z regiona.