Elias Kummer na campje Němskeje sportowaceje młodźiny w Senegalu
Eliaso, sće runje w Dakarje. Što tam činiće a kak sće k tomu přišoł?
Sym tu w Dakarje we wobłuku academy-campa Němskeje sportowaceje młodźiny. Camp wotměwa so paralelnje k młodźinskim olympiskim hram a měri so na młodych ludźi, kotřiž so čestnohamtsce w sporće angažuja. Sym wupisanje na Instagramje pola Němskeje sportowaceje młodźiny wuhladał a so wo wobdźělenje požadał. Za mnje je to jónkrótna składnosć, prěni raz na olympiskim projekće na afriskim kontinenće přitomny być a so z druhimi młodymi ludźimi wuměnjeć, kotřiž so tohorunja ze zahoritosću čestnohamtsce za sport angažuja. Camp je jako kubłanski projekt zapołoženy. We wšelakich dźěłarničkach zaběramy so z temami kaž ze sportowej politiku, z olympiadu, z wulkozarjadowanjemi sporta a z naslědnosću. K tomu přińdu wopyty wubědźowanjow a zetkanja z wosobinami ze sporta. Zaměr je, so nowych impulsow a wědy nasrěbać a z tym tež swójski čestnohamtski angažement w towarstwach dale wuwiwać.








