Na prezentaciji noweho Němsko-hornjoserbskeho šulskeho słownika Rěčneho centruma WITAJ (RCW) a Ludoweho nakładnistwa Domowina (LND) je so wčera na žurli Budyskeho Serbskeho domu syła zajimcow wobdźěliła.
Budyšin (SN/MiR). RCW je sej wčera popołdnju, na dnju swjateho Měrćina zhromadnje z LND wosebity dar wobradźił a z přitomnymi dźělił. Je to nowy němsko-hornjoserbski šulski słownik, kotryž měri so na šulerjow a serbšćinu wuknjacych. 23 000 hesłow zběrka na 1 200 stronach wopřija. Tole njejsu jeničce słowa we woběmaj rěčomaj, ale publikacija chowa drohotny pokład. To su rěčne wobroty, kotrež dźensa hustodosć hižo znate njejsu. W nowym słowniku su do přikładowych sadow zwjazane, tak zo so lochce wužiwać hodźa. Zběrka wobsahuje tež gramatiski dźěl z deklinaciskimi a konjugaciskimi tabulkami.





