Wuslědki Lipšćanskeje studije wo awtoritarizmje rysuja jasny wobraz
Berlin/Lipsk (dpa/SN). Ludźo w Němskej so hižo tak za demokratiju njehorja, kaž hišće před něšto lětami. Samsny čas nacionalizm přiběra. Tole je wuslědk lětušeje Lipšćanskeje studije wo awtoritarizmje. Prěni raz w stawiznach reprezentatiwneje studije, kotruž wot lěta 2002 kóžde druhe lěto na zakładźe woprašowanja za měnjenjemi zestajeja, podpěruje mjenje hač 90 procentow woprašowanych po cyłej Němskej demokratiju (89,3 procenty). Na wuslědk so po wuprajenjach awtorow wosebje „drastiska redukcija na wuchodźe Němskeje“ wuskutkuje. Tam bě 2024 hišće 94,6 procentow ludźi demokratiju podpěrowało, lětsa bě jich 85,7 procentow. Na zapadźe bě za to trochu wjace podpěraćelow. Přiběrał je tohorunja podźěl ludźi, kotřiž maja scyła prawicarsko-ekstremistiski wobraz wo swěće. Studija zwěsća, zo je jich po cyłym kraju 6,9 procentow. Wyšu hódnotu běchu slědźerjo posledni raz w lěće 2012 wuslědźili, tehdy bě jich 8,8 procentow. Tež na tutym polu je signifikantneho rozdźěla mjez wuchodom a zapadom.





