Berlin (dpa/SN). Zwjazkowy etat za klětu je za wothłosowanje w parlamenće spřihotowany – znajmjeńša najprjedy raz. Zamołwity etatowy wuběrk je w nocy hišće někotre změny w budgetach ministerstwow wobzamknył. Wotewrjene pak dale je, hač so Uniji a SPD poradźi, zniženje milinoweho dawka za wšitkich financować. Za to trěbne něhdźe 5,4 miliardy eurow njejsu w naćisku zapřijate. Na něhdźe 16 hodźin trajacym „Porjedźenskim posedźenju“ dyrbjachu ministerki a ministrojo čorno-čerwjeneje koalicije swoje finančne plany hišće raz předstajić a za to zdźěla wjacore hodźiny před durjemi čakać. Nowy minister za dźěło Alexander Schweitzer (SPD) přinjese k wječeri wuběrka wino z južneje Pfalcy sobu. Jako posledni bě zakitowanski minister Boris Pistorius (SPD) na rjedźe. Hakle rano w šesćich hamor skónčnje padny. Zwjazk smě 2027 telko pjenjez wudać, kaž hišće nihdy do toho. Planowane su nětko wudawki we wysokosći něhdźe 560,9 miliardow eurow. To je 5,5 miliardow wjace hač bě zwjazkowe knježerstwo w swojim naćisku předwidźało. Kóždy třeći euro w etaće financuja z dołhom.





