Zhorjelc. Wuchodźujo so po twarnišću Zhorjelskeje měšćanskeje hale su sej zastupjerki a zastupjerjo medijow wčera, štwórtk, wobraz wo aktualnym stawje twarskeho projekta z financielnym wobjimom 51 milionow eurow tworili. Něhdźe 21 měsacow po zahajenju su twarske dźěła w časowym kaž tež w kóštowym planje. W srjedźišću steji aktualnje moderny rozšěrjenski twar z nowej žurlu na wuchodnej stronje twarnišća. Po tym zo su hruby twar zakónčili, zasadźeja tuchwilu woknowe a škleńčane fronty, zo bychu twarjenje hišće do zymy dospołnje zawrěli. Dźakowano twarskim tepjenjam móža přichodne měsacy njewotwisnje wot wjedra z nutřkownym wutwarom pokročować. Tři nowe přełamki w historiskej fasadźe maja nowotwar přichodnje bjez barjerow z twarjenjom w młodźinskim stilu zwjazać. W historiskej Wulkej žurli přewjeduja paralelnje intensiwne rjedźenske, instalaciske a restawraciske dźěła. Z pomocu wosebitych róštow-mjezyposchodow chcedźa 18 metrow wysoki wjerch wurjedźić, zo by prěnjotne wuhotowanje z lěta 1910 zaso widźeć było.





