„25 lět Rěčny centrum WITAJ – wožiwja Serbja swoju rěč abo wožiwi serbska rěč serbske zhromadnosće?“ Pod tutym hesłom wěnuje so dr. Beata Brězanowa w runje wušłym štwórtym čisle Serbskeje šule slěbornemu jubilejej rěčneho centruma. W nim předstajeja so mězniki dźěławosće institucije a podawa so wuhlad do přichoda mjez druhim z ideju, załožić mobilnu šulu. To je dołhodobnje zapołoženy koncept za imersiwne serbske wuwučowanje šulerjow wot 1. do 6. lětnika, kotryž móhł so klětu w zymje zahajić. Dokónčili smy lětsa wobšěrne dźěła na Němsko-hornjoserbskim šulskim słowniku za šulerjow wyšich šulow a gymnazija kaž tež za dorosćenych, kiž serbsce wuknu. Wón předleži wot oktobra w šulach ze serbskej wučbu a je tež w Smolerjec kniharni na předań. Nowy słownik Helmuta Jenča a Horsta Petrika wobsahuje 23 000 němskich hesłow z wotpowědnymi serbskimi ekwiwalentami a mnohe přikładowe sady. Gramatiski dźěl je Manuela Smolina nadźěłała. Wo natwarje słownika a móžnosćach wudospołnjenja z pomocu elektroniskeje datoweje banki piše Daniela Heelemanowa.