Lipsk (SN/MiR). Rjad koncertow pod hesłom „Tieftöner“ (hłuboke zynki), kotryž wuhotuje Sakski krajny zwjazk za hudźbu, wuzběhowaše tele dny tež kompozitoriske tworjenje łužiskich Serbow. Tak běchu Budyskeho komponista Jana Cyž wo to prosyli, kompoziciju za instrumenty z hłubokim hłosowanjom komponować. Nastała je twórba „profundus“ za lupofon (basowa obowa), basowu klarinetu a kontrafagot, kotraž dožiwi wutoru, 10. nowembra, w Drježdźanskim zarjadowanišću Kunstraum Pillnitz prapremjeru. Wěcywustojny publikum mytowaše prezentaciju runje tak z mócnym přikleskom kaž kompozicije dalšich komponistow, kotrež su wšitcy čłonojo mjenowaneho zwjazka. Dźeń pozdźišo zaklinčachu twórby w Kamjenicy w tamnišim Morgnerowym archiwje. Na slědowacy koncert 13. nowembra w Lipšćanskej měšćanskej bibliotece je sej Jan Cyž dojěł a rjekny po tym na naprašowanje SN, zo „běše reakcija publikuma jara pozitiwna“.





