Basnica Róža Domašcyna powěda wo swojim poćahu k mytam, hdy je najsnadnišo pisała a čehodla je so jeje wuj hańbował
Před njedźelomaj je basnica Róža Domašcyna jako prěnja Serbowka Drježdźanske myto lyriki dóstała. Tydźeń do toho, jako hišće jasne njebě, zo dobudźe, wobdźěli so na třoch čitanjach w Čěskej, raz w Plzenju a dwójce w Praze, najprjedy w Serbskim seminarje we wobłuku cyklusa nakładnistwa Euskaldun z ćežišćom předstajeć mjeńšinowe literatury, a na to w ramiku prezentacije nominowanych awtorow za naspomnjene myto. Sobotu do wuznamjenjenja čitachu kandidaća potom hišće raz w Drježdźanach. Mjez wšemi tutymi terminami je so Lukášej Novosadej přiwšěm poradźiło, so z njej rozmołwjeć.
W běhu pjeć dnjow tři čitanja w Čěskej a štwórte w Sakskej – je to Waša wšědna ličba?






