Interview z Betty Huf, předsydku Wendish Heritage Society Australia (WHSA), składnostnje 40lětneho jubileja towarstwa
Towarstwo Wendish Heritage Society Australia je 24. oktobra swoje 40lětne wobstaće woswjećiło. Što woznamjenja jubilej za Was jako předsydku?
Naše towarstwo załoži so 1986 ze zaměrom, wědomje za serbske herbstwo w Awstralskej spěchować. K tomu słušatej přeslědźenje a posrědkowanje stawiznow, kultury a tradicije Serbow. Jubilej steji za štyri lětdźesatki angažementa našich čłonow, kotřiž su našu organizaciju k tomu sčinili, štož wona dźensa je. Je to dobra přičina za zhladowanje do zašłosće, ale je zdobom tež pohon do přichoda.
Hdźe a z kelko wobdźělnikami sće swjećili?








