Berlin (dpa/SN). Njewšědnje raznje je zwjazk wonkownych wikowarjow Němskeje (BGA) prezidenta USA Donalda Trumpa kritizował a před zwrěšćenjom hospodarstwa warnował. Trump je „wot sebje dospołnje přeswědčeny a wot mocy wobsydnjeny swójbny předewzaćel bjez kóždeho zwiska k socialnemu wičnemu hospodarstwu“, rjekny prezident BGA Anton Börner dźensa w Berlinje. Trump wobhladuje USA jako swójbne předewzaće a jedna pod žiwjenskim hesłom­ „ja přeco dobywam“. Z Trumpom ma swětowe zjednoćenstwo „cyle specielny problem“. Jeho prěnje wukazy jako prezident su „alarmowace“.

Njewotpohladnje woheń zamiškriła je rentnarka, jako na swojim balkonje kołbasu sušeše. 68lětna žona w badensko-württembergskim Balingenje bě čerstwe kołbasy sušiła, při čimž so dekoracija na balkonje­ horceje kurjenskeje komorki dla zapali. Chětře so płomjenja na drjewjanu konstrukciju balkona rozpřestrěchu. Spočatne pospyty žony, woheń sama podusyć, zwrěšćichu. Wohnjowa wobora porno tomu měješe połoženje spěšnje pod kontrolu. Nichtó so njezrani. Škoda na balkonje a fasadźe domu wučinja přiwšěm něhdźe 20 000 eurow.

Problem z jara aktiwnymi bobrami maja­ přiběrajcy w połobskej wsy Dolní Žleb w Čěsko-sakskej šwicy. Stajnje zaso hrymzaki cyłe štomy pušćeja, kotrež na milinowody padaja a je roztorhaja. Přeco zaso dochadźa w pomjeznym Dolnim Žlebje k wu­padam miliny.

Zhorjelc (SN). Přichod wjelka Pumpaka zjawnosć jima. Jako problematiskeho zastopnjowaneho měli jeho třělić. Dowolnosć za to je Zhorjelski krajnoradny zarjad hižo wuprajił. W online-peticiji pak so wjace hač 80 000 ludźi přećiwo tomu wupraja. Pumpak njenapadnje agresiwneho zadźerženja dla, ale, dokelž zwjazuje z čłowjekami dobre nazhonjenja a so jich njeboji, měnja w frakciji Zwjazk 90/Zelenych Sakskeho krajneho sejma. Pod hesłom „Wjelk Pumpak – je woprawdźe trjeba jeho zatřělić?“ přewjedźetaj nawoda wjelčeho běrowa zwjazkoweho zjednoćenstwa NABU­ Markus Bathen a wobswětopolitiski rěčnik zeleneje frakcije w krajnym sejmje Wolfram Günther podijowu diskusiju. „Dokelž je Sakska zwjazkowy kraj z najwjetšimi nazhonjenjemi z wjelkom, maja tule z přikładom być. Wotpowědny rozsud sadźi wothladajo wot tohole pada měritko za přichod“, rěka w nowinskej zdźělence frakcije. Podijowa diskusija wotměje so srjedu, 8. februara, we 18 hodź. w KulTourPunkće na Zhorjelskim dwórnišću.

Rom (dpa/SN). Składnostnje lětušeje 500. róčnicy reformacije je bamž Franciskus dźensa w Romje zastupjerjow rady Ewangelskeje cyrkwje w Němskej (EKD) přijał. Na priwatnu awdiencu bě tež předsyda Němskeje biskopskeje konferency, Mnichowski arcybiskop a kardinal Reinhard Marx, prošeny. EKD rěčeše hižo do zetkanja wo „mězniku po puću k ekumenisce wuhotowanemu jubi­lejej reformacije“. EKD zastupowaše jeje předsyda, bayerski krajny biskop Heinrich Bedford-Strohm.

Trump chce dawki znižić

Washington (dpa/SN). Prezident USA Donald Trump přilubja wobydlerjam kraja dawkowe zniženja. To chcył hišće lětsa zwoprawdźić, rjekny wón sćelakej Fox News. Porno tomu móhło so narunanje za strowotnisku reformu swojeho předchadnika Baracka Obamy, kotruž chce Trump wotstronić, hišće hač do klětušeho­ dlijić. Prezident připowědźa Američanam „wulkotny plan“.

Gabriel na zetkanju ministrow