To a tamne (11.05.17)
Zabłudźeneho ptačka w cockpiće pasažěrskeho lětadła „Dreamliner“ dla je předewzaće British Airways lět z Londona do USA wotprajiło. Kós bě dźiwje lětajo cockpit blokował. Sobudźěłaćerjo na to hodźiny dołho spytachu jeho wućěrić. Tón pak so stajnje zaso chowaše. Pasažěrojo dyrbjachu do druheje mašiny přelězć, zo móhli dale lećeć. Što je so z ptačkom stało, předewzaće njezdźěli.
Pokład dźesać slěbornakow ze 16. lětstotka su ruscy archeologojo w šachowej figurje namakali. Kaž z Moskwy rěkaše, běchu fachowcy při twarskich dźěłach njedaloko katedrale Chrystusa-Wumóžnika w centrumje stolicy na drohotny pokład storčili. Pjenjezy běchu wokoło lěta 1540 w Moskwje a Twjeru zhotowili a za čas carja Iwana Złeho wužiwali.
Hišće ničo njerozsudźene
Drježdźansko-Mišnjanske biskopstwo dale rozmysluje tež serbske katolske wosady do jeničkeje wulkeje zjednoćić
Biskopstwo Drježdźany-Mišno njeje hišće wo přichodnej strukturje přisłušnych serbskich wosadow rozsudźiło. To zdźěla biskopski ordinariat na naprašowanje Serbskich Nowin. „Wot lěta 2013 su biskopstwo a wšitke jeho wosady w tak mjenowanym ‚pastoralnym wotkrywanskim procesu‘, kotryž tuchwilu traje. Nimo pytanja za dušepastyrskim nadawkom kóždeho cyrkwinskeho regiona steji při tym tež prašenje w srjedźišću, kotre financne a personalne ramikowe srědki změjemy přichodnje za pastoralne dźěło na městnje k dispoziciji. Konkretne wobzamknjenja za serbske wosady njejsmy hišće tworili“, wobkrući nowinski rěčnik biskopstwa Michael Baudisch. Wo kotre „hišće njetworjene“ wobzamknjenja a móžne změny so jedna, pak rěčnik biskopstwa, najebać prašenja za tym, njezdźěli.
Bórze jenož hišće jenička serbska wulkowosada?
Serbam ćežki, ale wuspěšny puć
Podstupim (SN/at). Hłowny wuběrk Krajneho sejma Braniborskeje je dźensa Derbno, Baršć, Cersk, Rań, Nowu Jazorinu, Zły Komorow kaž tež wjesne dźěle gmejnow Nysa-Małksa a Derbno pola Gubina jako serbskemu sydlenskemu rumej přisłušace wobkrućił. Dohromady běchu za pruwowansku proceduru próstwy za 33 gmejnow předleželi, 18 z nich a dwě zdźěla za jednotliwe wjesne dźěle přiwzachu. 13 próstwow pak wotpokazachu. „Pozitiwne rozsudy su dobry signal: Serbska kultura, rěč a nałožki njejsu jeno dźěl imaterielneho kulturneho namrěwstwa Němskeje, wone su znamjo jónkrótnosće na juhu Braniborskeje a přinošuja k atraktiwiće regiona“, potwjerdźi braniborska knježerstwowa społnomócnjena za serbske naležnosće, kulturna statna sekretarka Ulrike Gutheil (SPD).
„To bě ćežki puć, štož su wosebje diskusije w komunach pokazali. Skónčnje pak bě wón za Serbow wuspěšny“, mjeńšinowopolitiska rěčnica frakcije Lěwicy w braniorskim sejmje Anke Schwarzenberg w tym zwisku wuzběhny.
Lawrow na wopyće w USA
Moskwa/Washington (dpa/K/SN). Ruski wonkowny minister Sergej Lawrow wopyta dźensa w Běłym domje prezidenta USA Donalda Trumpa. Wotpowědnu powěsć, kotruž su najprjedy ameriske medije publikowali, je ruska strona mjeztym wobkrućiła. Do toho zetka so Lawrow we Washingtonje ze swojim ameriskim kolegu Rexom Tillersonom. Hłowna tema jeju rozmołwy matej być wobydlerska wójna w Syriskej a konflikt na wuchodnej Ukrainje.
Ministerka wotmołwjeć měła
Berlin (dpa/K/SN). Na wurjadnym zeńdźenju zaběraše so zakitowanski wuběrk zwjazkoweho sejma dźensa z aferu, nastatej z wotkryćom terora podhladneho oficěra Zwjazkoweje wobory Franca A. Na próstwu Zelenych a Lěwicy měješe ministerka za zakitowanje Ursula von der Leyen (CDU) čłonam gremija na prašenja wotmołwjeć. Wčera bu dalši wojak zajaty, 27lětny Maximilian T. Wón je pječa atentat přihotował.
Ameriske brónje Kurdam
Wobydlerjo zapadneho dźěla irakskeho wulkoměsta Mossul dale před ...
Přez mazursku wowku zajim za naš lud našła
Budyšin (SN/at). Jara wćipna na Serbow bě lawreatka lětušeho Spěchowanskeho Lessingoweho myta Swobodneho stata Sakskeje Anna Kaleri na wčerawše nalětnje přijeće zapósłanče krajneho sejma Franziski Schubert (Zwjazk 90/Zeleni) do Budyskeho Zeleneho wobchoda přišła. To přizna Lipšćanska spisowaćelka, po tym zo je wurězki ze swojeho romana „Der Himmel ist ein Fluss“ čitała. Z twórbu podawa so Kaleri na slědy swojeje wowki, kotraž bě na Mazurach wotrostła a tam 1945 zahinyła. Wopisany je konflikt mjez wjesnjanami-Němcami a mazurskimi pólskimi wobydlerjemi. We wsy su do Druheje swětoweje wójny maćernu rěč mazuršćinu hišće nałožowali.
Trump nawodu FBI pušćił
Washington/Berlin (dpa/K/SN). Ameriski prezident Donald Trump je šefa FBI Jamesa Comeyja pušćił. Hić dyrbi wón hnydom. Dokelž běše nawoda instancy, kotraž přepytuje móžnych kontaktow Trumpoweho teama k Ruskej dla, je Comey poprawom njedótkliwy był. Předsyda opozicionelnych demokratow w senaće Chuck Schumer Trumpej atestuje, zo je „strašny zmylk“ zworał. Zapósłanc republikanow John McCain rozsud Trumpa tohorunja kritizuje. Prezidialny zarjad kročel z postupowanjom Comeyja w aferje e-mailkow dla na Hillary Clinton do wólbow wopodstatnja. Tohodla „instancu njemóže hižo efektiwnje nawjedować“, prezident Comeyjej pisomnje zdźěli.
Zwjazkowy ekskancler Gerhard Schröder (SPD) je před tym warnował, politice prezidenta Trumpa so přiměrić, „kiž je na populizm a wumjezowanje wusměrjena. Město toho mamy so dale wo měrliwe rozrisanje konfliktow a wo wurunanje zajimow prócować“, wón rjekny.
To a tamne (10.05.17)
Štyrilětny w nócnym wobleku je póndźelu wječor w Zhorjelcu do spěšnohosćenca přišoł. Dokelž njeběštaj staršej pódla, je sobudźěłaćer hosćenca policiju zawołał. Nimale w samsnym času so tež starosćiwa mać pola zastojnikow přizjewi. Krótko po tym móžeše wona swojeho synka wotewzać. Čehodla bě tón z bydlenja twochnył a nimale kilometer w nócnej drasće w měsće po puću był, njezdźělichu.
Ze strachom před zubnym lěkarjom je so pacient w porynsko-pfalcskim Offenbachu dospołnje wopił a sej w čakarni wusnył. 30lětny muž měješe 2,6 promilow alkohola w sebi a hižo na žane namołwy njereagowaše. Bě wšak hižo dospołnje pjany do praksy přišoł. „Termin pola zubneho lěkarja bě tak z blida“, rěka nětko w rozprawje policistow, kotřiž wopiteho wubudźichu a jeho najprjedy raz do chorownje dowjezechu.
Diskriminacija přiběra
Washington (B/SN). Přisłušnikow nabožinow po cyłym swěće přiběrajcy wróćo stajeja, kaž studija USA zwěsći. W 105 ze 198 narodow su w lěće 2015 wěste nabožinske skupiny „rozšěrjene šikany přez knježerstwo nazhonili“, wozjewi institut za slědźenje měnjenjow Pew Research Center. Staty z najwjetšimi restrikcijemi wěriwym napřećo su Egyptowska, China, Iran, Ruska, Uzbekistan, Malajziju a Sawdi-Arabska.
Bamžowski płokanski salon
Rom (B/SN). Bamž Franciskus ma nětko tež płokanski salon za bjezdomnych w Romje. Šěsć płokawow a šěsć sušakow je za to, zo móhli potrěbni swoje přikrywy a drastu płokać, rěka z Vatikana. W přichodnych měsacach maja hišće nastać dušowanske móžnosće, serwis za truhanje brody a třihanje włosow kaž tež lěkarska słužba. Nowe posłužby w měšćanskim Travestere móhli po słowach Radija Vatikan wolóžić poskitki za bjezdomnych na Pětrowym naměsće, hdźež su tohorunja po přeću bamža zarjadowali duše a frizersku słužbu a hdźež ludźi wječor z jědźu zastaruja. Ličba bjezdomnych, kiž wokoło Vatikana na papjercu a přikrywach nocuja, je sylnje rozrostła.
Njedobra mysl Macrona
Berlin (dpa/K/SN). Němska industrijna a wikowanska komora (DIHK) je skeptiska nastupajo plany noweho francoskeho prezidenta Emmanuela Macrona, załožić budget europasma a wudawać požčonki. „Dołh spowšitkownić njeje žana dobra mysl. To by městno Němskeje a Europy zesłabiło, dokelž móhli załožerjo kapitala a lutowarjo dowěru do eura zhubić“, rjekny prezident DIHK Eric Schweitzer. Podobnje wupraji so komisar za budget EU Günther Oettinger.
Nowe tragedije na morju
Rom (dpa/K/SN). Dwě łódźnej njezboži na Srjedźnym morju stej sej prawdźepodobnje něhdźe 200 woporow žadałoj. 113 migrantow je zhubjenych, po tym zo bě so jich łódź před libyskim přibrjohom podnuriła. Powěsćernja Ansa rozprawja wo dalšim podnurjenju, při kotrymž je po wuprajenjach wuchowanych 80 ludźi zahinyło. Wot pjatka do njedźele su wuchowarjo něhdźe 6 600 ludźi žiwych ze Srjedźneho morja zwućahali.
Steinmeier pola Palestinjanow
