Nětko je wón powołany, nowy społnomócnjeny zwjazkoweho knježerstwa za wusydlencow a narodne mjeńšiny dr. Bernd Fabritius. Mjeńšinowa rada nadźija so spěšneje prěnjeje rozmołwy, stej dźě wosobinske zeznaće a mjezsobna wuměna myslow prawy prěni krok spomóžneho zhromadneho dźěła. Toho abo tamneho snano hišće tróšku zamyla, zo je nětko muž za narodne mjeńšiny zamołwity, kiž čestnohamtsce zastojnstwo prezidenta Zwjazka wuhnatych wukonja. Ze žiwjenjoběha noweho społnomócnjeho wurosćaca konstelacija pak móže zajimawa być: za zastojnstwo powšitkownje na kóždy pad, dokelž pochadźa Bernd Fabritius z němskeje mjeńšiny w Rumunskej a je ze swójbu do Němskeje wupućował. Jeho bohate nazhonjenja na woběmaj polomaj móhli jemu tež wužitne być, starosće štyrjoch narodnych mjeńšin w Němskej lěpje rozumić. Axel Arlt

Po nadpadźe zamołwił je so 15lětny młodostny w Sewjerorynsko-Westfalskej. Z kuchinskim nožom w ruce bě wón w Neukirchenje-Vluynje nad Rynom do kioska zastupił a sej pjenjezy žadał. Při­stajeny to wotpokaza, hólc so zamołwi a ćekny. Krótko na to wšak 15lětny we wobchodźe zazwoni, želniwje připowědźejo, zo chce so nawróćić a so stajić. Po puću ke kioskej jeho policisća wuslědźichu a nachwilnje sobu wzachu.

Pilny domownik je na hrodźe Neuenbürg w Badensko-Württembergskej mylnje wohnjowy alarm zawinił. Awtomatiska alarmowa připrawa je prawdźepo­dobnje na mróčele procha reagowała, kotryž bě domownik při mjećenju w kólni hrodu načinił. A hižo přijědźechu policisća a wohnjowi wobornicy na městno pozdatneho wohenja. Na zbožo móžachu pak hnydom zaso wotjěć.

Wyša měšćanostka Flensburga Simone Lange (naprawo) nastupi takrjec jako kandidatka komunalneje runiny přećiwo frakciskej předsydce Andreji Nahles k wólbam zwjazkoweje předsydki SPD na zjězdźe 22. apryla we Wiesbadenje. Wčera wopyta wona Budyšin, hdźež je jej tudyši wyši měšćanosta Alexander Ahrens (SPD) stare město pokazał. Z Durinskeje pochadźaca komunalna politikarka wukonja zastojnstwo měšćanostki wot awgusta 2017 a je tež čłonka Sydslesvigsk Forening (SSF), hłowneje organizacije Danow w Južnej Schleswigskej. Wčera nawječor wobdźěli so Lange na zarjadowanju Budyskeho městneho zwjazka SPD. Foto: SN/Maćij Bulank

Meseberg (dpa/SN). Ze zhromadnym kabinetnym posedźenjom je zwjazkowe knježerstwo dźensa rano w braniborskim Mesebergu z klawsuru pokročowało. Při tym dźěše mjez druhim wo to, podlěšić zasadźenje Zwjazkoweje wobory w Maliju a Somaliji. Wobzamknyć chcychu tež powołanje społnomócnjeneho za bój přećiwo antisemitizmej. Na planje steještej dale hospodarski plan 2018/ 2019 a dieselowa afera.

Pola Telekom stawkowali

Lipsk (dpa/SN). Dźěłarnistwo ver.di je dźensa přistajenych Telekom w Sakskej, Saksko-Anhaltskej a Durinskej k warnowanskim stawkam namołwjało. Stawk potrjechi něhdźe 1 500 sobudźěłaćerjow, kaž dźěłarnistwo zdźěla. Stawkowali su mjez druhim w Lipsku, Kamjenicy, Halle a Zwickauwje. W Lipsku zhromadźichu so wobdźělnicy k demonstraciji po nutřkownym měsće. W sewjerorynsko-westfalskim Euskirchenje su dźensa a jutře tarifowe jednanja.

Zuckerberg zmylki přiznał