To a tamne (28.04.22)
Hołb je w Berlinje na konjacym wubědźowanišću Mariendorf do wubědźowanja zasahnył a konja porazył. Kaž zamołwići zdźěleja, bě so wustróžany hołb „kaž worjoł do konja dał“ a jeho w mjezwoču nadběhował. Kóń Royenne, kiž měješe kołsać, zhubi rytmus a bu diskwalifikowany. Mjez sydom wobdźělnikami wubědźowanja bě Royenne absolutny faworit. Dobyćerjej kiwaše 10 000 eurow.
Cyłu hodźinu 25 metrow wysoko wutrać dyrbješe 24 wopytowarjow ludoweho swjedźenja w Aachenje, po tym zo bě so rjećazowy karusel wjerćeć přestał a horjeka stejo wostał. Wohnjowa wobora hosći, mjez nimi štyri dźěći, z wjerćatymi rěblemi wuswobodźi. Po tym jich do přikrywow zawalichu, dokelž běchu chětro přemjerznjeni. Nichtó pak so njezrani. Přičina hawarije bě drje techniski defekt, zarjadowar zdźěli.
Zelenskyj: Ruska chce wjace
Kijew (dpa/SN). Ukrainski prezident Wolodymyr Zelenskyj je sej wěsty, zo chce Ruska wjace hač jenož Ukrainu. „Ultimatiwny zaměr ruskeho nawodnistwa njeje jenož zdobyće Ukrainy, ale zničenje wšeho centruma a wuchoda Europy“, rjekny Zelenskyj w swojim wšědnym wječornym widejowym poselstwje. K tomu słuša po jeho słowach tež „globalny dyr přećiwo demokratiji“. W „swobodnym swěće“ mjeztym kóždy widźi, zo je wójna přećiwo Ukrainje jenož započatk, wón rjekny.
Ruska pječa kontrolu přewzała
Moskwa (dpa/SN). Ruske wójsko je po swójskich informacijach kontrolu nad wulkimi kónčinami wuchodneje a južneje Ukrainy přewzało. Kaž generalny połkownik Michail Mizincjew ze zakitowanskeho ministerstwa zdźěli, w zdobytych kónčinach poněčim zaso měrniwe žiwjenje zaćehnje. Po jeho słowach ukrainska strona wšitke humanitarne koridory blokuje, kiž bě Ruska zarjadowała. Ruske rakety su pječa transporty zapadnych bróni a municije zničili.
Dalšich hórnikow našli
W Budyskim Kamjentnym domje je dźensa sakska ministerka za ...
Přirada załožby so zešła
Berlin (SN). Na mjeztym 68. posedźenju parlamentariskeje přirady Załožby za serbski lud móžeše jeje předsyda Marko Šiman (CDU) póndźelu nowych wot zwjazkoweho sejma wuzwolenych čłonow Simonu Koß (SPD), dr. Christianu Schenderlein (CDU) kaž tež jeje zastupnicu Sylviu Lehmann (SPD) a Knuta Abrahama (CDU) witać. Simonu Koß wuzwolichu za městopředsydku přirady. Wona naslěduje Klausa-Petera Schulzeho (CDU), kiž njebě při lońšich wólbach zwjazkoweho sejma wjace nastupił.
Čłonojo přirady dorozumichu so na swojim posedźenju w zwjazkowym sejmje na ćežišća dźěła. Tak ma zachowanje a wuwiće serbskeje rěče w srjedźišću stać. Čłonojo přirady žadachu sej spěšniše zwoprawdźenje projektow w zwisku ze strukturnej změnu. Wosebje w Delnjej Łužicy maja hižo konkretne předstawy, čakaja pak dale na přilubjene srědki.
Wo prawym puću wuradźowali
Žadyn płun do Pólskeje a Bołharskeje
Kijew (dpa/SN). Ruska wot dźensnišeho Pólskej a Bołharskej žadyn zemski płun wjace njedodawa a tak napjatosće ze zapadom dale přiwótřa. Z Waršawy rěkaše, zo je so kraj na tute połoženje přihotował a zo su wuskutki za pólske hospodarstwo a za wobydlerjow skerje snadne. Pólska bě so wot ruskeho nadpada na Ukrainu wo njewotwisnosć wot ruskeho płuna prócowała. Zwjazkowe ministerstwo za hospodarstwo zdźěli, zo je zastaranje Němskeje ze zemskim płunom dale zaručene. Pólska ministerka za klimu Anna Moskwa bě připowědźiła, zo wot dźensnišeho ranja 8 hodź. žadyn ruski płun přez płunowód Jamal wjace njedochadźa. Tež Bołharska bě so minjeny čas wo njewotwisnosć wot ruskeho płuna prócowała. Ruska bě rozsud nastupajo zemski płun do Pólskeje a Bołharskeje z tym wopodstatniła, zo so krajej spjećujetej, zemski płun w rublach zapłaćić.
Ruska inwazija w Ukrainje móhła po měnjenju poradźowarja ukrainskeho prezidenta Oleksija Arestowyča hišće wjele měsacow dale trać. Rozsudne tež budźe, hdy nowe brónje zapadnych krajow do Ukrainy dochadźeja.
Honač hižo njespěwa
To a tamne (27.04.22)
Z hrajkowym mječom staj hólcaj w ćahu w Nižozemskej wulke zasadźenje policije zawinowałoj. Po informaciji swědka, zo je w ćahu někoho z nožom abo mječom widźał, přijědźe policija z wjacorymi jednotkami k dwórnišću w Amsterdamje. Železniski wobchad bě přetorhnjeny, ludźo njesmědźachu z ćaha wulězć. Nad dwórnišćom kružeše helikopter. Hólcow wzachu z ćaha. Při tym so wukopa, zo jedna so wo hrajku. Po „krótkim ale raznym“ powučenju, smědźeštaj dale jěć.
W internetnje kupjenej trjebanej kuchni je 50lětny we wokrjesu Anhalt-Bitterfeld 150 000 eurow našoł. Muž bě meble kupił a w Halle wotewzał, policija w Köthenje zdźěli. Při tym bě pjenježnej tyzy wuhladał. Sprawny namakar so pola policije přizjewi. Pjenjezy składuja najprjedy raz na hamtskim sudnistwje. Policija nětko za bywšim wobsedźerjom kuchnje pyta.
Němska chce tanki słać
Berlin (dpa/SN). Zwjazkowe knježerstwo chce po informacijach powěsćernje dpa nětko tola dodawanje tankow Ukrainje ze składow industrije dowolić. Za to chcedźa twarcej brónjow Krauss-Maffei Wegmann zmóžnić, technisce ponowjene lětadła wotwobarace tanki „Gepard“ z bywšich składow zwjazkoweje wobory předać. Krauss-Maffei wobsedźi wjacore dźesatki tutych tankow z rozpušćeneje jednotki zwjazkoweje wobory za wotwobaranje lětadłow.
Unija: Přidatne bydlenja trěbne
Berlin (dpa/SN). Frakcija CDU/CSU w zwjazkowym sejmje ma ukrainskich wójnskich ćěkancow dla za trěbne, bydlenjotwarske zaměry změnić. „Zaměr amploweje koalicije, w tutej wólbnej dobje 1,6 milionow bydlenjow twarić, je hladajo na wulku ličbu ćěkancow z Ukrainy zestarjeny“, rjekny rěčnik unije za twarske naležnosće Jan-Marko Luczak nowinarjam. Po měnjenju fachowcow trjebaja 500 000 přidatnych bydlenjow.
Trump zasudźeny
