Lipsk (dpa/SN). Wobswětoškitna organizacija Robin Wood je k zahajenju swětoweho wobchadneho foruma w Lipsku přećiwo subwencijam na dobro fosilnych ćěriwow protestowała. Štyrjo krosnowarjo pušćichu so wčera rano po powjazach z wěže na teren Lipšćanskich wikow a připrawichu we wysokosći 25 metrow protestny plakat. Němska so přeco hišće spjećuje, priwileg diesela na spěchowanje wotstronić, kritizowaše medijowa referentka organizacije Dominique Just. Nimo toho dyrbjeli prašenje dawka na kerozin skónčnje na europskej runinje zrjadować, sej wona žadaše. „Wobchadny forum stajnje twjerdźi, zo je samsneho měnjenja. Chcemy gremij na to skedźbnić, zo njeměł jenož wo tym rěčeć, ale skónčnje tež jednać“, Just rjekny. Globalizaciju kritizowaca syć Attack je dalše protesty připowědźiła. Policija a sobudźěłaćerjo wikow akciju wobkedźbowachu, bjez toho zo bychu zakročili. Situacija je pod kontrolu, wěstota wobdźělnikow je zaručena, zdźěli rěčnik wikow Andeas Knaut. Na tři dny trajacy forum wočakuja 600 fachowcow, mjez nimi wobchadnych ministrow z 63 krajow.

Z namakanymi pjenjezami wulce nakupować šli su dźěći w hornjobayerskim Oberhachingenje. 13lětny bě spočatk meje zabytu aktowku na nastupnišću tamnišeho dwórnišća namakał a w njej wobalku, w kotrejž bě 14 900 eurow. Město toho zo by pjenjezy wotedał, kupi sej z towaršemi debjenki, drasty a e-roler. Skónčnje tole staršim napadny. Kupjene wěcy su mjeztym wróćili. Staroby dla njemóža jich chłostać, na „wujasnjowacu rozmołwu“ pola policije pak su prošeni.

Spektakularne rubježnistwo w cłownym zarjedźe w sewjerorynsko-westfalskim Emmerichu w nowembru 2020 z rubiznu 6,5 milionow eurow je wujasnjene. Policija je wjacorych skućićelow zajała, mjez druhim cłownika. Tón bě skućićelam rozsudny pokiw dał. Cwólba z Pólskeje na to sćěnu trezoroweje rumnosće přełama a pjenjezy pokradny.

Zamołwity za Serbski centrum na Łužiskim cyrkwinskim dnju wot 24. do 26. junija w Zhorjelcu je Baršćanski farar Tobias Pawoł Jachmann. 34lětny je tamnišu wosadu před nimale połdra lětom přewzał, wšako wón z delnjołužiskeho města nad Nysu pochadźa. Zo su jemu nadawk zamołwiteho na lońšej serbskej prědarskej konferency we Wochozach dowěrili, ma z wuwědomjenjom swójskeho pochada zwjazane předstawizny.

„Po studiju teologije w Berlinje, Wienje a Genfje sym swoje serbske korjenje zaso namakał“, młody farar powěda. Wón rozsudźi so za wikariat w Dešnje pola fararki Kathariny Köhleroweje, „dokelž chcych tróšku serbsce rěčeć nawuknyć“. Z toho časa je dr. Madlena Norbergowa jeho wučerka delnjoserbšćiny. Do Baršća hić z tym zwisuje, zo njeměješe dotal nałožena próca serbšćinu nastupajo podarmo być. Kóždy rěčnik je trěbny.

Berlin/Kijew (dpa/SN). Po napjatosćach w poćahach mjez Kijewom a Berlinom staj zwjazkowy kancler Olaf Scholz (SPD) a ukrainski prezident Wolodymyr Zelenskyj znowa telefonowałoj. Zelenskyj mjenowaše rozmołwu po tym „dosć produktiwnu“. Rěčałoj staj mjez druhim wo wojerskej pomocy na dobro Ukrainy. Zelenskyj je Scholza w tym zwisku wo aktualnym wojerskim połoženju informował, kaž prezident rjekny.

Priwilegije wobmjezowali

Berlin (dpa/SN). Koalicija SPD, Zelenych a FDP je wurjadne prawa bywšeho zwjazkoweho kanclera Gerharda Schrödera raznje wobmjezowała. Politikar SPD ma po tym swój běrow a swojich sobudźěłaćerjow zhubić. Personal ma dźěło skónčić a druhe nadawki přewzać, rěka w naćisku amploweje koalicije, kotryž ma etatowy wuběrk jutře schwalić. Starobnu mzdu a wosobinski škit Schröderej dale přizwoleja. Unija CDU a CSU bě sej žadała, jemu wšitke priwilegije wzać.

Wo rafineriji debatowali