Donjeck (dpa/SN). Separatisća w kónčinje Donbasa su proces přećiwo třom wukrajnikam w rjadach ukrainskeje armeje zahajili. Najwyše sudnistwo separatistiskeje Ludoweje republiki Donjeck je dweju Britow a Marokkočana wobskoržiło, ruska statna powěsćernja Ria Nowosti rozprawja. Statne rěčnistwo je mjeztym zdźěliło, zo je móžno, zo wšitkich třoch wobskorženych k smjerći zasudźa.

Na wideju je widźeć, kak so třoch muži za lěsycami z pomocu tołmačerjow prašeja, hač skóržbu znaja a hač něšto přećiwo tomu maja, zo móže so proces zahajić. Wobskorženi tomu přihłosowachu.

Na ukrainskej stronje tójšto wukrajnikow přećiwo ruskim zadobywarjam wojuje. Ukraina sama bě jich wołała. Moskwa mjenuje jich „wukrajnych zóldnarjow“. Rěčnik zakitowanskeho ministerstwa Igor Konašenkow rjekny, zo jich jako regularnych wojakow njewobhladuja a zo mjezynarodne konwencije nastupajo wobchadźenje z wójnskimi jatymi za nich njepłaća. Tohodla dyrbjeli woni „w najlěpšim padźe“ z wjele lět trajacej jatbu ličić. Separatistej běchu wospjet hrozyli, zo chcyli wukrajnikow wotprawić.

Drježdźany (dpa/SN). W zwisku z koronapandemiju su w Sakskej tójšto chłostajomnych njeskutkow přećiwo šćěpjenskim centram a druhim městnosćam šćěpjenja registrowali. Wot januara 2021 hač do apryla 2022 su po informacijach nutřkowneho ministerstwa w Drježdźanach cyłkownje 81 tajkich podawkow zličili, kotrež su přepytowanske jednanja zawinowali. Zwjetša dźe wo wobškodźenja, ranjenja domjaceho měra, wohroženja a padustwa, ale tež ranjenja, wočornjenja a zapalerstwa su mjez deliktami. Předewšěm Zhorjelski wokrjes (15 padow), krajna stolica Drježdźany (dźewjeć) a Vogtlandski wokrjes (wosom) při tym wosebje napadnu.

Njeskutki z wotpohladom, personalej abo pacientam zeškodźeć, su „samozrozumliwje“ policiji přizjewili, zdźěli rěčnik Němskeho čerwjeneho křiža, kiž wobhospodarja 13 šćěpjenskich centrow w kraju. Tak běchu njeznaći spytali, šćěpjenski centrum we vogtlandskim Eichachu zapalić. W Drježdźanach su praskotaki do centruma mjetali. Na wonkownych sćěnach wjacorych šćěpjenskich centrumow su móranja namakali.

Berlin (dpa/SN). Braniborski zapósłanc AfD w zwjazkowym sejmje Norbert Kleinwächter chce při bórzomnych wólbach stronskeho předsydy amtěrowaceho přesdydu Tina Chrupallu wužadać. Wón chcył tak wot mnohich čłonow zwuraznjenej próstwje wotpowědować a na zwjazkowym zjězdźe strony srjedź junija kandidować, rjekny Kleinwächter powěsćeri dpa. „Mjez čłonami sej nowozapočatk jara přeja, wobsahowje kaž tež stilistisce, wón doda. Njedawne wólby krajnych sejmow, při kotrychž bě AfD stajnje hłosy přisadźiła, su jemu pokazali, „zo zapřah Tino Chrupalla a Alice Weidel derje njefunguje“, Kleinwächter rjekny. Chrupalla nawjeduje zhromadnje z Weidel frakciju AfD w zwjazkowym sejmje. Kleinwächter ma podpěru ze stron wjacorych prominentnych zastupnikow stronskeho křidła, kiž mjenuje so zdźeržliwy. AfD je po słowach Kleinwächter hłownje „liberalno-konserwatiwna strona“. Prócowanja, tole do prašenja stajeć a stronu do směra na „socialny patriotizm“ wjesć, wón wotpokazuje. AfD chce na swojim zjězdźe wot 17. junija w Riesy nowe předsydstwo wolić.

W šnórce wudy zašmjatana pašturlica (Mäusebussard) je w sewjerorynsko-westfalskim Neussu zasadźenje wohnjoweje wobory zawinowała. Ptak bě so we wudźenskej nići nad rěku Erft zamotał a njemóžeše so sam wuswobodźić. Šnóra wisaše w štomje. Wohnjowi wobornicy pašturlicu ze sakom popadnychu a ze šnóry wuswobodźichu.

Wjace hač sto šulerjow a wučerjow z Němskeje su w awstriskim Kleinwalserskim dole z hórskeje nuzy wuchować dyrbjeli. Młodostni w starobje dwanaće do 14 lět z Ludwigshafenskeje kónčiny běchu na hórskej šćežce po puću, kotraž jich techniskim móžnosćam a ćělnym kmanosćam scyła njewotpowědowaše. Jako mjez nimi panika wudyri, wučer hórsku słužbu zazwoni. Ta cyłkownje 107 wosobow z helikopteromaj wuchowa. Dwaj šulerjej so zraništaj.