Kabul (dpa/SN). Při wojowanjach afghaniskich wěstotnych mocow kaž tež němskich a ameriskich wojakow z dotal nje­znatymi nadpadnikami při lětanišću w Kabulu je afghaniski wojak žiwjenje přisadźił. Třo dalši so zranichu, zwjazkowa wobora zdźěla. Wšitcy němscy wojacy wostachu njezranjeni. Po informacijach zwjazkoweje wobory bě so třěleńca dźensa rano wokoło 4.15 hodź. započała. Na lětanišću startuja ewakuowanske lěty, z kotrymiž po přewzaću mocy přez militantnych islamistiskich talibanow staćanow zapadnych krajow kaž tež bywšich afghaniskich pomocnikow mjezynarodnych wojerskich jednotow do wukraja dowjezu. Němske wulkopósłanstwo bě hakle njedawno warnowało, zo móže při lětanišću přeco hišće k strašnym poło­ženjam a wobrónjenym rozestajenjam dóńć. Hladajo na njestabilne wěstotne połoženje němske wulkopósłanstwo němskim staćanam „nuznje“ wotradźi, so k lětanišću podać. Tam přeco hišće sta ludźi na to čaka, z jednym z lětadłow kraj wopušćić móc.

Kanclerski kandidat Laschet chce rozdźěle k SPD a Zelenym pokazać

Berlin (dpa/SN). Kanclerski kandidat CDU/CSU Armin Laschet chce w horcej fazy wólbneho boja hladajo na špatne wuslědki woprašowanjow bóle hač dotal na swoje mustwo sadźeć. „Dyrbimy a budźemy wjace mjezwočow pokazać a tak potwjerdźić, zo smy sylne mustwo“, rje­k­ny předsyda CDU po informacijach wob­dźělnikow minjeny pjatk na internetnym posedźenju frakcije CDU/CSU. Na njej běchu­ wurjadne posedźenje zwjazkoweho sejma přichodnu srjedu přihotowali, hdźež póńdźe wo pomoc woporam wulkeje wody na zapadźe Němskeje a wo zasadźenje zwjazkoweje wobory w Afghanistanje. Z wažnymi temami chcedźa přichodne tydźenje tež kmanych fachowcow unije prezentować. Laschet rjekny: „Mjeztym, zo dyrbi SPD swojich ludźi schować, móžemy hordźe swoje kom­petentne wosobiny pokazać, w zwjaz­ko­wych krajach runje tak kaž w zwjaz­ko­wym sejmje. „Po tutym puću ma so wšón spektrum unije wotbłyšćować.“

Hišće w prawym času přeprošenje na dźěćace narodniny dóstał je hólc w Augsburgu – dźakowano policistam. Kriminalna policija bě pad pokradnjenych listow přepytowała a tójšto wočinjenych posyłkow namakała. Mjez nimi bě tež přeprošenje. Bychu-li zastojnicy list z pó­štu­ dale słali, njeby přeprošenje wjace w prawym času dóšło. Tuž přiwjezechu je wosobinsce.

Samotwarjene kabrio je francoska policija sćazała. Muž bě z pomocu piły swój 20 lět stary Citroën Xantia přetwarił a třě­chu prosće wotrězał. Policisća njewšědne jězdźidło na awtodróze A 20 do směra na atlantiski pobrjóh zadźeržachu a wotpowědujo předpisam sćazachu. Z tym zbudźichu tež tójšto kritiki. Ludźo njerozumja, zo so policisća z tajkim „problemom“ zaběraja, město toho, zo bychu woprawdźitych kriminelnych přesćěhowali.

Spěšnje roznjese so tež w Serbach powěsć, zo je 12. awgusta Kurt Biedenkopf 91lětny zemrěł. Rodźeny 28. januara 1930 w Ludwigshafenje je promowowany „doktor prawa“ na wjacorych uniwersitach na zapadźe Němskeje skutkował. Tohorunja na politiskim parkeće zapadneje Němskeje njebě Biedenkopf njeznaty a nje­boješe so tež rozestajenjow, tež nic z te­hdyšim kanclerom Helmutom Kohlom.

Po politiskim přewróće započa so za Kurta Biedenkopfa, runja njeličomnym wobydlerjam bywšeje NDR, nowa žiwjenska doba. Ze swojej mandźelskej Ingrid přińdźe wón do Sakskeje a sta so prěni ministerski prezident swobodneho stata po přewróće. Nic jenož němscy politi­karjo maja jeho za wuznamnu wosobinu za Saksku, ale tež serbscy. Přezjednje měni wjetšina ludnosće, zo je zakłady dźensnišeje sylneje Sakskeje połožił.