Berlin (dpa/SN). Po wótrym rozestajenju mjez amplowymi stronami a uniju je Zwjazkowa rada dźensa wo nowych naprawach rozsudźiła, kotrež maja štwórtu žołmu korony wosłabić. Unija je poprawom blokadu připowědźiła. Bjez krajow, wot CDU a CSU nawjedowanych, nima knježerstwo žanu wjetšinu. Po wčerawšim zhromadnym wuradźowanju ministerskich prezidentow z amtěrowacej zwjazkowej kanclerku Angelu Merkel (CDU) a kanclerskim kandidatom Olafom Scholzom (SPD) pak běše přiwšěm kompromis móžny. Tak so na to dojednachu, zo ma so nowy zakoń SPD, Zelenych a FDP po třoch tydźenjach posudźować a přiměrić. Hač do 9. decembra ma so pokazać, hač su naprawy dosahace.
Předewšěm dźe wo prawidło 3G na dźěłowym městnje kaž tež w busach a ćahach. Tam maja ludźo dopokaz wo šćěpjenju, wustrowjenju abo aktualnym negatiwnym tesće předpołožić. W hladarnjach a chorownjach pak maja so sobudźěłaćerjo a wopytowarjo testować. Šule a wobchody njeměli přichodnje hižo zawrěć.
Budyšin (SN/bn). „Mjenje hołkota – wjace dialoga!“ bě hesło zarjadowanja, kotrež stej Medijowa syć Łužica a Sakska krajna centrala za politiske kubłanje wčera wuhotowałoj. Aktualneho pandemiskeho połoženja dla njewotměštej je na doporučenje krajnoradneho zarjada kaž planowane w Budyskim Kamjentnym domje, ale ryzy digitalnje.
Zazběh tworješe prezentacija dr. Benjamina Bigla a Markusa Schuberta, kotrajž rozłožištaj aktualnu studiju „Medijowa kompetenca w Sakskej“. Po jeju słowach přepytowanje mjez druhim wujewja, zo něhdźe třećina wobydlerjow swobodneho stata njewě, kak žurnalisća dźěłaja. Runje telko ludźi je tež přeswědčenych, zo su medije „zasadnje we wobsydstwje stata“ a zo „zajimam industrije a kapitala“ polěkuja.
Policija je jědnaćelětneho šofera awta zadźeržała. Wupožčiwši sej awto swojeju staršeju wuleća sej pachoł z přećelom. Na jara wuskej dróze wón dalše jězdźidło ze swěcowymi znamješkami nabok stłóči a je naposledk přesćahny. Toho wodźer so chětro dźiwaše a zawoła policiju. Tak wšak młodeho šofera hnydom zadźerža. Konsekwency pak wulět za njeho žane njezměje, dokelž njeje hišće chłostajomny.
Je so wón 1919 abo 1973 narodźił? Z tajkim prašenjom zaběra so nětko krajne socialne sudnistwo Delnja Sakska-Bremen w Celle. Muž z wokrjesa Stade bě so njedawno wo rentu požadał, dokelž je po swójskim wuprajenju hižo 102 lěće stary. Sudnistwu předpołoži wón samospisane wobkrućenje, zo je so 1919 w Hannoveru narodźił. W datach rentoweje zawěsćernje pak steji, zo bě to 1973 w Stade.
Berlin (dpa/SN). Wobdźělnicy wuradźowanja krajow wo naprawach dramatiske wuwiće koronapandemije nastupajo njejsu sej w někotrych wažnych dypkach hišće přezjedni. Njejasne dale je, wot kotreho wućeženja klinikow kotre postajenja za nješćěpjenych abo winowatosć testowanja za šćěpjenych a wustrowjenych wobsteja. Wo tym chcedźa ministerscy prezidenća dźensa popołdnju ze zwjazkowej kanclerku Angelu Merkel jednać.
Krajny sejm diskutuje
Drježdźany (dpa/SN). Napjata situacija koronapandemije dla je dźensa najwažniša tema w Sakskim krajnym sejmje. Hladajo na přiběracu ličbu infekcijow wuradźuja wo tym, hač chcedźa winowatosć šulerjow, w šuli wuknyć, wusadźić. To žadaštej sej frakciji Lěwicy a Zelenych. Kultusowy minister Christian Piwarz (CDU) namjet dotal wotpokazuje. Wón pak chce znowa wo tym rěčeć.
Warnuje před migrantami
Drježdźany (dpa/SN). Koordinator sakskich chorownjow Michael Albrecht je sej wčera w online-diskusiji lockdown 14 dnjow žadał. Přiwótřeneho połoženja korony dla nabywaja jutřiši pjatk wobmjezowanja kontaktow a krućiše rjadowanja přistupa w mnohich wobłukach płaćiwosć. Wopyt pola frizera, w fitnesowym studiju a w klubje je potom jenož hišće z dopokazom 2G, šćěpjeny abo wustrowjeny, móžny. Wo tym je sakske socialne ministerstwo wčera informowało.
Přisłušni jedneje domjacnosće smědźa so jenož hišće z jednej dalšej wosobu zetkać. Šćěpjeni, wustrowjeni a dźěći w starobje hač do 16 lět k tomu njesłušeja. Sakska je wčera, srjedu, schodźenk přećeženja nastupajo łoža w chorownjach třeći dźeń za sobu překročiła.
Sakske knježerstwo chce jutře dočasnje nowe škitne postajenje korony dla wobzamknyć, kotrež ma wot přichodneje póndźele hač do 20. decembra płaćić. W prěnim rjedźe dźe wo mjenje kontaktow a wjace testow. Sakska ma dźensa z incidencu 761,4 dale najwyšu hódnotu wšitkich zwjazkowych krajow.
Choćebuz/Kamjenica (dpa/SN). Wobswětowe zjednoćenstwo Zelena liga chce skóržbu přećiwo Sakskemu wyšemu hórnistwowemu zarjadej Freiberg zapodać, zo by informacije k Wochožanskej brunicowej jamje dóstało. Wusměrjena je skóržba na njespjelnjene nadawki zarjada, kaž Zelena liga předwčerawšim zdźěli. Zamołwite zarjadniske sudnistwo je přiwzaće skóržby wobkrućiło.
Zelena liga žada sej informacije wo wuskutkach brunicoweje jamy na dnownu wodu a škitne kónčiny. Hižo wot meje prócuje so cyłk wo dohlad do aktow hórnistwoweho zarjada. Poprawom maja tam dwaj měsacaj chwile na próstwu reagować. Zelena liga pak njeje poł lěta bjez konkretnych přičin žadyn dohlad dóstała.
Wobswětowy zwjazk sej žada hórnistwowy zarjad zasudźić, zo ma wobswětowe informacije podać. Kaž z Kamjeničanskeho zarjadniskeho sudnistwa rěka, pak njeje dotal jasne, hdy wo skóržbje rozsudźi.
Moskwa (dpa/SN). Ruske knježerstwo je nětko wobkrućiło, zo su raketu do swětnišća třělili. Kaž ruske zakitowanske ministerstwo wutoru informuje, pak njewobsteješe žane wohroženje za astronawtow w Mjezynarodnej staciji ISS. Trjechiła je raketa zestarjeny ruski objekt, kotryž je hižo wot lěta 1982 w swětnišću, rěka w zdźělence ministerstwa. Rozbuchnjene dźěle satelita pak swětnišćowu staciju (ISS) njewohrožeja, z Ruskeje dale rěka. Knježerstwo USA je Ruskej wumjetowało, zo bě raketa wohroženja zawiniła. Ruski wonkowny minister Sergej Lawrow mjeztym měni, zo „su wuprajenja ludanje“, wšako Pentagon sam na aktiwne wašnje w swětnišću swójske wojerske testy přewjeduje.
Po tym zo je Ruska raketu do swětnišća třěliła, podachu so astronawća ze swojeje stacije dwójce do swětnišćoweju łódźow, zdźěli kosmonawt Pjotr Dubrow postupowanje. W padźe kolizije bychu so woni tak hnydom na zemju wróćić móhli, štož pak trjeba njebě. Po krótkim času smědźachu so wšitcy zaso do stacije wróćić.
Dotal najwjetši w Alasce namakany čwak złota budźe 8. decembra w texaskim Dallasu přesadźowany. Dom Heritage Auctions liči z tym, zo wunjese tak mjenowany „Alaska Centennial Gold Nugget“ něhdźe milion dolarow. Wulki pokład bě złotokopar Barry Clay 1998 blisko města Ruby namakał. Nugget je trochu wjetši hač softball a waži nimale dźesać kilogramow.
Na nakromnej čarje awtodróhi pola francoskeho Toulona je 25lětna žona dźěćo porodźiła. Jeje partner běše jězbu do chorownje na awtodróze přetorhnył, dokelž měješe samodruha přewulke hrona. Muž zawoła nuzowu pomoc a sćěhowaše na to pokiwy telefonista w centrali. Z jeho pomocu bě porod wuspěšny. Jako chorobne awto na městnosć dojědźe, běše štyri kilogramy ćežka dźowka młodeho porika hižo na swěće.