Berlin (dpa/SN). Zwjazk wučerjow Němskeje a dźěłarnistwo za kubłanje a wědomosć (GEW) planowane wolóženja nastupajo wužiwanje nahubnikow w šulach wotpokazujetej. „Skónčenje testo­wanja a wotstronjenje winowatosće wužiwanja nahubnikow kaž tež redukowanje karantenowych postajenjow zwyša strach, zo stanu so šule z „black Box“, štož kontrolu infekcije znjemóžnja, rjekny prezident zwjazka wučerjow, Heinz-Peter Meidinger nowinarjam. Předsydka GEW Maike Finnern w tym zwisku rjekny, zo ma winowatosć wužiwanja nahubnika „jako dźěl naprawow wotwisnje wot wuwića infekcijow za zmysłapołne“.

Wjacore zwjazkowe kraje běchu wolóženja nastupajo wužiwanje nahubnikow w šulach připowědźili. Runočasnje wočakuje Roberta Kochowy institut nazymu a w zymje zaso přiběrace ličby infekcijow. Hłowne přičiny su „přeco hišće wulka ličba nješćěpjenych“ a přiběrace kontakty w nutřkownych rumnosćach. Na Berlinskich šulach wot póndźele nahubniki wjace njetrjebaja, runje tak kaž w Braniborskej.

Mnichow (dpa/SN). Po dołhej přestawce koronawirusa dla su w Bayerskej nětko zaso ludowe swjedźenje a druhe zjawne zarjadowanja dowolene. Njewotwisnje wot sydomdnjowskeje incidency płaći zasada 3G, po kotrejž maja jenož šćěpjeni, wustrowjeni abo negatiwnje testowani přistup. Tole je statna kenclija wčera po wobzamknjenju kabineta zdźěliła. Hižo dźensa smědźa kluby a diskoteki zaso wotewrěć. W bayerskich šulach wotpadnje wot póndźele winowatosć wužiwanja nahubnika we wučbje. Ludowe swjedźenje běchu minjeny čas zakazane. Dowolene běchu jenož jednotliwe narunanske zarjadowanja. Wot dźensnišeho smědźa ludźo w bayerskich klubach a diskotekach zaso rejwać, bjez wotstawka a nahubnika. Tež tam pak dyrbja wopytowarjo šćěpjeni, wustrowjeni abo testowani być, to samsne płaći za přistajenych. Tući dyrbja so přidatnje dwójce wob tydźeń testować dać. Při tym trjebaja negatiwny PCR-test. Antigenowy spěšnotest abo samotest hižo njedosahatej. Tole zdźělištaj ministerski prezident Markus Söder (CDU) a kultusowy minister Michael Piazolo (Swobodni wolerjo) zhromadnje.

Ze zwažliwej akciju je muž w zwjazkowym staće USA Floridźe z wotpadkowym sudobjom krokodila popadnył. Něhdźe mjeńšinu trajacy widejowy clip wo po­dawku w městačku Mount Dora, 35 kilometrow sewjerozapadnje Orlanda, su wot wutory na twitteru mjeztym dźesać milionow króć nakliknyli. W nim je widźeć, kak so 26lětny z wočinjenym sudobjom na zemi aligatorej bliži a jeho skónčnje popadnje. Po tym běži muž přez dróhu a krokodila zaso pušći.

Z pomocu bananow su ze zwěrjenca ćeknjenu wopičku w porynsko-pfalcskim Rockenhausenje do paslow wabili. Makak „Udo“ bě před měsacomaj twochnył. Minjene dny bě wón stajnje zaso sad z balkona spakosćił. Tuž jemu direktor tam bananowe pasle nastaji, do kotrychž sej Udo zalěze. Kónc julija bě wón stpicu swojeje klětki wotzhibnył a so zminył.

London (dpa/SN). W boju přećiwo wulkim njedostatkam při zastaranju ludźi we Wulkej Britaniskej je zastupowacy premierminister Dominic Raab namjetował, jako šoferow jatych zasadźić, kotřiž dotal w jastwach darmotnje dźěłaja. W kraju pobrachuje něhdźe 100 000 šoferow nakładnych awtow. Tole wjedźe k problemam při zastaranju tankownjow a kupnicow. Warnowanja knježerstwa před „paniku“ su k dołhim rynkam čakacych awtow před tankownjemi wjedli.

Za lěpše lěkarske zastaranje

Drježdźany (dpa/SN). Sakski krajny sejm je dźensa z aktualnej debatu wo kumštnej inteligency druhi dźeń wuradźowanjow zahajił. Nimo toho dyrbješe so statne knježerstwo prašenjam zapósłancow stajeć. W běhu dnja chcychu zakoń schwalić, z kotrymž ma so lěkarske zastaranje we wjesnych kónčinach polěpšić. Kóžde lěto chcedźa 50 studijnych městnow poskićić, hdyž so studowacy zawjazaja, znajmjeńša dźesać lět na kraju dźěłać.

Kritizuja wuznamjenjenje