W Sibirskej so lěsy pala
Jakutsk (dpa/SN). Zahubne lěsne wohenje w Ruskej nimaja wohnjowi wobornicy dale pod kontrolu. Po informacijach lěsnistwoweho zarjada so płomjenja dale rozpřestrěwaja. Po tym je tam 238 wohenjow na cyłkownej płoninje 4,6 milionow hektarow. To wotpowěduje wulkosći Delnjosakskeje. Najhórje potrjechena je Jakutska na wuchodźe Sibirskeje. Tam wojuje wjace hač 4 200 pomocnikow přećiwo wohenjam.
Wjace hač 1 400 mortwych
Saint-Louis-du-Sud (dpa/SN). Po ćežkim zemjerženju w Haiti je ličba smjertnych woporow na 1 419 rozrostła. Tole zdźěla zarjad za škit ciwilneje ludnosće. Wjace hač 6 900 ludźi je so při rženju sylnosće 7,2 minjenu sobotu zraniło. Tójšto ludźi leži drje hišće pod rozwalinami sypnjenych domow. Wuchowanske dźěła su noweho tropiskeho njewjedra „Grace“ dla haćene. Orkan bliži so z wichorami a sylnymi zliwkami.
Tornado wjes zapusćił
Chaotiske sceny su so wčera na lětanišću afghaniskeje stolicy ...
Biden hrozy talibanam
Krajny rada wotstupił
Doporučeja šćěpjenje dźěći
Berlin (dpa/SN). Něšto tydźenjow do kónca šulskich prózdnin w mnohich zwjazkowych krajach je so stajna šćěpjenska komisija za powšitkowne šćěpjenje wšitkich dźěći wot dwanaće lět wuprajiła. Po dokładnym pruwowanju wšitkich datow je komisija měnjenja, „zo po dotalnym stawje wědy lěpšiny šćěpjenja móžne rědke negatiwne wuskutki přesahuja“. Tole je njewotwisny gremij wčera zdźělił. Zwjazk a kraje su wotum jako wažnu orientaciju za młodostnych a staršich witali a chcedźa spěšnje šćěpić započeć. W tym zwisku jewi so tež kritika, zo je politika ćišć na stajnu šćěpjensku komisiju wukonjała.
Zwjazkowy minister za strowotnistwo Jens Spahn (CDU) ma rozsud komisije za dobru powěsć. „Starši a młodostni maja tak jasne doporučenje, so za šćěpjenje rozsudźić.“ Šćěpjenje móhli hišće tutón tydźeń zahajić.
Zwjazkowa ministerka Christine Lambrecht (SPD) potwjerdźi, zo wostanje šćěpjenje młodostnych dobrowólne a njesměło wuměnjenje za wopyt šule być.
Tež Ruska překwapjena była
Wonkowni ministrojo EU wuradźuja wo połoženju w Afghanistanje
Brüssel/Berlin/Moskwa (dpa/SN). Wonkowni ministrojo čłonskich krajow EU chcychu so hladajo na faktiske přewzaće mocy přez talibanow w Afghanistanje dźensa popołdnju k wurjadnej internetnej konferency zetkać. Tole je społnomócnjeny EU za wonkowne naležnosće Josep Borrell wčera připowědźił. Ministrojo chcedźa sej po jeho słowach přehlad wo połoženju stworić a połoženje cyłkownje posudźować. W srjedźišću wuradźowanjow měještej wěstota wobydlerjow Afghanistana a mjezynarodna wěstota stać, Borrell připowědźi.
Njebě to wočakować?
Najpozdźišo po wonym „dealu“ bywšeho prezidenta USA Donalda Trumpa z afghaniskimi talibanami bě jasne, zo dochadźa w Afghanistanje k raznym změnam. Trump bě poskićił, zo wšitke wukrajne wojacy Afghanistan wopušća, hdyž so talibanojo z afghaniskim knježerstwom wujednaja a so na měrowym procesu aktiwnje wobdźěla. Wo wěstotu w kraju postara so afghaniska armeja, kotruž je Nato wukubłała a wojersce wuhotowała. Tuta naiwnosć je mje hižo tehdy zadźiwała. Nowy prezident USA Joe Biden pak je do samsneje truby trubił, twjerdźo, zo so Afghanistan njesypnje a zo talibanojo nihdy wjace na móc njepřińdu.
Mjeztym wěmy, zo nimaja talibanojo wotpohlad, swoju móc dźělić a zo njemějachu afghaniscy wojacy lóšt, w boju přećiwo talibanam žiwjenje přisadźić. Štož wostanje, je hoberski črjopjenc zapadneho swěta a dopóznaće, zo njemóžeš ludej něšto nanuzować, wo čož tam poprawom nichtó njerodźi. Marko Wjeńka
To a tamne (17.08.21)
Dale zjawnje prezentna wostanje Angela Merkel tež po zakónčenju swojeho kanclerskeho zastojnstwa – byrnjež jenož jako dohodowny kurjačk. Tole zdźěla zawod za ludowe wuměłstwo w rudnohórskim Seiffenje. Zhotowić chcedźa 14 centimetrow wulku postawu z typiskim dźerženjom rukow we wjacorych barbach. Spočatnje chcedźa 300 eksemplarow zhotowić, połojca z nich je hižo předata.
Zmužiće a rozsudźeni su ludźo na kupanskim brjoze w Španiskej pomhali, dweju wikowarjow z drogami zajeć. Kriminelnaj běštaj ze spěšnočołmom před policiju ćěkałoj a z wotmachom na pobrjóh zajěłoj, zo byštaj pěši ćeknyłoj. Daloko pak na brjoze pola městačka Melicena na juhu kraja njepřińdźeštaj: Wjace hač dźesać muži a žonow jednoho z jeju wobkruži a zaja. Druheho runje tak. W čołmje bě 800 kilogramow hašiša.
Online-kemše mnohich docpěli
Münster (B/SN). Wjele wosadow je w času koronapandemije Bože słužby přez kanal Youtube wusywało. Nicole Stock-hoff z biskopstwa Münster měni: „Digitalne komunikaciske formy wobohaćeja, njemóža pak kemše na městnje narunać. Prezencne kemše maja so znowa zesylnić a so z kwalitatiwnje naročnymi swjedźenjemi stać.“ Přiwšěm běchu wosady překwapjene, kelko starych ludźi je na zakładźe internetneho poskitka Bože słužby sobu swjećiło. Docpěli su tež ludźi, kiž hewak do cyrkwje njechodźa.
Biskop Biedenkopfa wuzběhnył
Scholz: SPD nad 20 procentami
Berlin (dpa/SN). SPD je po měnjenju jeje kanclerskeho kandidata Olafa Scholza kmana, swoje dobre wuslědki woprašowanjow wolerjow hač k wólbam zwjazkoweho sejma dale polěpšić. „Přicpěwam nam wuslědk porjadnje nad 20 procentami“, rjekny zwjazkowy financny minister wčera wječor w sćelaku ARD. Z tajkimi wuslědkami su přećeljo w Skandinawiskej wólby dobyli a knježerstwo wutworili, Scholz rjekny. SPD by tuchwilu mjez 19 a 20 procentow hłosow dóstała.
Wjace swobody šćěpjenym
Stuttgart (dpa/SN). Nowe rjadowanje koronawirusa dla z daloko sahacymi wolóženjemi za šćěpjenych a wot wirusa wustrowjenych płaći wot dźensnišeho w Badensko-Württembergskej. Štóž k jednej z wobeju skupin słuša, ma w tójšto wobłukach njewotwisnje wot incidencow wjace swobodow. Porno tomu dyrbja nješćěpjeni časćišo hač dotal negatiwny test na koronu předpołožić, kotryž njesmě starši hač 24 hodźin być.
Röttgen za bórzomny wjeršk
