Znjewužiwanja wohnjoweje wobory dla su 31lětneho w Augsburgu k pokuće 6 000 eurow zasudźili. Muž bě wohnjowu woboru z nuzowym čisłom k swojemu bydlenju wołał, po tym zo bě so sam wuzamknył. Wobornikam bě napowědał, zo njewě, hač hišće něšto na kuchinskich kachlach steji, byrnjež wědźał, zo tomu tak njeje.
Našijneho rjećazka dla su wčera radnicu durinskeho Steinbacha-Hallenberga ewakuowali. Debjenka bě w pakćiku, kotryž bě přistajena sobu na dźěło přinjesła. Při tym jej napadny, zo bě pakćik wot jej njeznateje firmy. Dokelž tukachu na škódnu maćiznu, wołachu fachowcow wohnjoweje wobory a krajneho kriminalneho zarjada. Skónčnje so wukopa, zo jedna so wo našijny rjećazk, kiž bě žona spočatk lěta internetnje skazała – a mjeztym na to zabyła.
Wien (dpa/SN). Běłoruska sportowča-běharka Kristina Timanowskaja je po puću do Wiena, kaž awstriske wonkowne ministerstwo wobkruća. Po informacijach medijow je 24lětna rano w Tokiju wotlećała. W běhu popołdnja wočakowachu ju we Wienje. Poprawom běchu wočakowali, zo Timanowskaja do Pólskeje poleći. Waršawa bě jej humanitarny wizum spožčiła. Mjezynarodny olympiski komitej mjeztym móžne pospytane zawlečenje młodeje žony přepytuje.
Namołwja kolegu wotstupić
Washington (dpa/SN). Po nadrobnych wumjetowanjach splažneho wobćežowanja wjacorych žonow dla je prezident USA Joe Biden za to, zo měł guwerner zwjazkoweho stata New York Andrew Cuomo swoje zastojnstwo złožić. „Myslu sej, zo dyrbjał wón wotstupić“, rjekny Biden wčera w Běłym domje wo swojim stronskim koleze. Do toho je generalna statna rěčnica Letitia James wuslědk přepytowanja předpołožiła, po kotrymž bě Cuomo wjacore žony wobćežował.
Přemało datow za Sputnik
Berlin (dpa/SN). FDP plany zwjazkoweho ministerstwa za strowotnistwo nastupajo dalše rjadowanja w koronakrizy raznje kritizuje. Městopředsyda strony Wolfgang Kubicki knježerstwu wumjetuje, zo swoje přilubjenja njedźerži. Zaměry a skutkownosć runaja so direktnej winowatosći šćěpjenja, hdyž knježerstwo nješćěpjenych ludźi wot socialneho žiwjenja wuzamkuje, wón rjekny.
W rozprawje ministerstwa krajam a zwjazkowemu sejmej, kotraž powěsćerni dpa předleži, rěka, zo su k wobmjezowanju noweje žołmy koronainfekcije dalše škitne naprawy trěbne. W rozprawje mjez druhim rěka, zo ma wužiwanje nahubnika „hač do nalěća 2022“ wosebje we wobchadnych srědkach a při nakupowanju „za wšitkich, tež za šćěpjenych a wustrowjenych“, winowatostne być. Na wěstych zarjadowanjach směli so jenož hišće šćěpjeni, wustrowjeni abo testowani wobdźělić. Kubicki kritizuje, zo chcyło knježerstwo nješćěpjenych wuzamknyć, byrnjež wone stajnje zaso twjerdźiło, zo winowatosć šćěpjenja njewobsteji.
Hoberskeje hromady spowróćanych napojowych kašćikow dla njemóžachu wobydlerjo domu w porynsko-pfalcskim Brohlu-Lützingu ležownosć wjace wopušćić. Z prózdnymi blešemi pjelnjene kašćiki běchu so kónc tydźenja ze susodneho składu wikowarja napojow na dwór před domom powróćili a zašlahachu zachod. Po informacijach policije ležeše tam wjace hač 500 kašćikow. Pomocnicy wobydlerjow z wuskosćow wuswobodźichu.
Wjace hač 300 metrow po wopłóčkowym kanalu je žołma dešćikoweje wody třoch dźěłaćerjow w badensko-württembergskim Heidenheimje sobu torhnyła. Mužojo wuńdźechu ze snadnymi zranjenjemi. Štwórty kolega bě jich hišće před přiběracej wodu po zliwku warnował. Woni pak njemóžachu spěšnje dosć reagować a wuchowachu so hakle na brjoze rěki Brenz.
Athen (dpa/SN). Historiska žołma horcoty w Grjekskej njepřestanje. Hižo cyły tydźeń měrja tam wšědnje wjacore hodźiny wob dźeń temperatury nad 40 stopnjemi. W srjedźnej Grjekskej liča nětko hač do pjatka ze wšědnej rekordnej horcotu hač do 46 stopnjow. Hladajo na dale trajacu suchotu a na přiběracy wětřik wočakuja strašne lěsne wohenje. Z tajkimi bědźa so tež w Turkowskej a na juhu Italskeje, hdźež je tohorunja jara horco.
Přepytuja přećiwo zamołwitym
Koblenz (dpa/SN). Statne rěčnistwo w Koblenzu pruwuje po katastrofje zapławjenja w dole rěki Ahr móžne přepytowanja přećiwo zamołwitym lochkomyslneho morjenja a lochkomyslneho ranjenja ćěła dla. Při tym dźe wosebje wo prašenje, hdy běchu zamołwitych w nocy wot 14. na 15. julij dokładne warnowanja před njewšědnje wulkej wodu docpěli a kak su na to reagowali. Přećiwo komu so přepytowanja měrja, njeje dotal znate.
China testuje metropolu Wuhan
Berlin (dpa/SN). Z wobšěrnym poskitkom šćěpjenja za dźěći a młodostnych chcedźa strowotniscy ministrojo Zwjazka a zwjazkowych krajow bój přećiwo dalšemu rozpřestrěću koronawirusa zesylnić. Ministrojo su na swojim wčerawšim wuradźowanju wobzamknyli, we wšitkich zwjazkowych krajach dźěćom a młodostnym w starobje dwanaće do 17 lět šćěpjenje w regionalnych šćěpjenskich srjedźišćach poskićić.
Wothłós na poskitk je rozdźělny. Stajna šćěpjenska komisija chce najebać wšón politiski ćišć w zwisku ze šćěpjenjom dźěći a młodostnych dale čakać. Kaž předsyda komisije Thomas Mertens wčera rozhłosej NDR-info zdźěli, je hišće přemało informacijow nastupajo móžne strowotniske škody za dźěći w mjenowanej starobje. ,,Njemóžemy žane zasadne poručenje wuprajić, dokelž nimamy daty nastupajo trěbnu wěstotu“, Mertens wuswětli. „Politiski ćišć za spěšny rozsud nima žadyn wliw na rozsud. Snano poručenje změnimy, ale zawěsće nic tohodla, dokelž sej to politikarjo přeja“, předsyda šćěpjenskeje komisije wuzběhny.
Zhorjelc (AK/SN). Město Zhorjelc chce so wo titul „Swětowe kulturne herbstwo UNESCO“ požadać. Jako město z něhdźe 4 000 pomnikami a 500lětnymi europskimi stawiznami ma na přestrjeń po cyłym Zwjazku najwjac pomnikow. To je fakt, z kotrymž chce Zhorjelc wuspěch žnjeć. Pod wodźacym hesłom „Zhorjelc: architekturny ansambl překupcow podłu Via regije“ namjezne město swoje požadanje zahaja.
Njedawno je město nad Nysu zhromadnje ze Zhorjelskimi zběrkami za stawizny a kulturu w galeriji Bratrowska 9 informaciski centrum wotewrěło. „Wažne je puć k titulej wo swětowe kulturne herbstwo na městnje pokazać. Proces je za Zhorjelčanow a hosći w našim na kulturne pomniki bohatym europskim měsće jara wuznamny“, podšmórny wyši měšćanosta Octavian Ursu (CDU).