Berlin (dpa/SN). Něhdźe 70 lět po prěnim zaćahu do zwjazkoweho sejma ma Južnoschleswigski wolerski zwjazk SSW znowa šansu, zapósłanca do parlamenta pósłać. Zwjazkowy wólbny wuběrk je stronu danskeje mjeńšiny w Schleswigsko-Holsteinskej oficialnje k wólbam zwjazkoweho sejma dopušćił. Načolny kandidat SSW je 41lětny Stefan Seidler. Strona je wot pjećprocentowskeje hranicy wuwzata. Jej dosaha něhdźe 50 000 płaćiwych hłosow za jedyn mandat.
Rockerojo zakazani
Berlin (dpa/SN). Zwjazkowy nutřkowny minister Horst Seehofer (CSU) je rockerowu skupinu Bandidos MC Federation West Central zakazał a rozpušćił. Po posudku nutřkowneho ministerstwa njeńdźe rockerowej skupinje w prěnim rjedźe, kaž to we wustawkach twjerdźa, wo zhromadne jězby z motorskim, ale chce móc a wliw w rockerowej scenje rozpřestrěć a to tež namócnje napřećo druhim skupinam přesadźić.
Wólbna kampanja Zelenych
Kromola (CK/SN). Z małym přijećom na Kromolanskim starym hrodźe je sakski ministerski prezident Michael Kretschmer (CDU) sobotu bywšeho sakskeho hospodarskeho ministra a wjelelětneho zapósłanca krajneho a zwjazkoweho sejma Thomasa Jurka (SPD) z aktiwneje politiki rozžohnował. Kretschmer, sam hač do lěta 2017 w zwjaz- kowym sejmje, bě zhromadnje ze swojim kolegu Jurkom wo to wojował, zo dóstanje Kromolanski park srědki z fondsa k zachowanju měšćanskich pomnikoškitnych objektow. Jurk dźakowaše so Kretschmerej za „tójšto wosobinskich wokomikow najebać wšelake politiske nastajenje“. Hdyž bě wo hornjołužisku domiznu šło, je Jurk stajnje za rozrisanjom pytał, wuzběhny.
Policajske awto jako taksi wužiwać chcyše chětro natutkany w badensko-württembergskim Heidenheimje. Muž bě zastojnikow w nocy na njedźelu do nutřkowneho města wołać dał. Ći drje přijědźechu, přeće 44lětneho pak wotpokazachu, na čož wón njemdrje reagowaše. Policisća jeho powučichu a muž jim slubi, zo pěši domoj póńdźe.
Ćeknjeneho warana dla dyrbješe klimowy dom w Bremerhavenje kónc tydźenja za wopytowarjow zawrjeny wostać. Dźesatki sobudźěłaćerjow su intensiwnje za něhdźe 80 centimetrow dołhim nimale wurosćenym nilowym waranom pytali. Warany su zwučene so derje schować. Twarjenje ja jara wulke. Jeničce wustajeńca wopřijima 11 500 kwadratnych metrow. Prawdźepodobnje bě zwěrjo pjatk rano twochnyło, jako njebě wobhrodźenje techniskeho zmylka dla zawrjene.
Budyšin (SN). Serbski superintendent na wuměnku Siegfried Albert je 7. julija po dlěšej ćežkej chorosći 84lětny w Budyšinje zemrěł, kaž serbska zjawnosć wčera zhoni.
Po maturiće na Serbskej rozšěrjenej wyšej šuli w Małym Wjelkowje studowaše 23. měrca 1937 w Zajdowje rodźeny Albert ewangelsku teologiju w Lipsku. Lěta 1962 bu jako farar w Hrodźišću zapokazany, wot 1981 bě farar Michałskeje wosady w Budyšinje. Jako naslědnik Gerharda Wirtha wukonješe wot 1984 hač do 2002 zastojnstwo Serbskeho superintendenta. Jako tajki bě wobdźěleny na zhromadnym dialogu zastupnikow Zwjazkoweho předsydstwa Domowiny a Serbskeje ewangelsko-lutherskeje superintendentury 1988 w NDR. Njeboćički je serbske wosadne popołdnja jako nowu formu nabožneho skutkowanja zawjedł a po tymle puću wuski zwisk k serbskim wosadnym w ewangelskich dwurěčnych wosadach wudźeržował.
Pohrjebna swjatočnosć budźe štwórtk, 15. julija, w 11 hodź. w Budyskej Tuchorskej cyrkwi. Přizamknje so chowanje na tamnišim pohrjebnišću.
London (dpa/SN). Pomocna organizacija Oxfam je před drastisce přiběracym hłódtradanjom na swěće warnowała. Po tym je so ličba ludźi, kotřiž su wot hłódtradanja potrjecheni, wot spočatka pandemije po cyłym swěće wo šěsć króć na nimale 520 000 zwyšiła. Zamołwity za to je předewšěm konflikt wo prowincu Tigray w Etiopiskej. Tam je po podaćach mjezynarodneje datoweje banki IPV wjace hač 400 000 ludźi wot katastrofalnych poměrow nastupajo zastaranje ze žiwidłami potrjechene.
Starosćeja so změny zakonja dla
Waršawa (dpa/SN). W Pólskej planowana změna rozhłosoweho zakonja móhła po hódnoćenju Helsinkskeje załožby za čłowjeske prawa nowinarsku swobodu wobmjezować. Bychu-li zapósłancy sejma nowelu schwalili, by to zdobom był „dalši krok k wobmjezowanju mnohotnosće měnjenjow w zjawnej debaće a prawow wobydlerkow a wobydlerjow na informaciju“, rěka we wčera wozjewjenej deklaraciji mjenowaneje załožby.
Twarić tójšto wjace płaći
Berlin (dpa/SN). Hladajo na popušćacy nawal šćěpjenjow přećiwo koronje w Němskej přihotuja wjacore zwjazkowe kraje nowe, jednoriše poskitki za dotal hišće njerozsudźenych. Planowane su akcije mjez druhim na parkowanišćach, na zarjadowanjach, we wobydlerskich domach, cyrkwjach a mošejach abo w jobcenterach, kaž z přisłušnych ministerstwow krajow rěka.
Woteběracy nawal wopodstatnjeja zarjady ze zahajenej dowolowej sezonu abo dokelž su ludźo hižo šćěpjeni. Na přikład chce braniborske strowotniske ministerstwo po zakónčenju lěćnych prózdnin šćěpjensku kampanju startować, kotraž so wosebje na młodych měri. Chcedźa, zo „šćěpiwo k ludźom přińdźe“.
W Sakskej budu bóle z powabkami dźěłać. Šef sakskeje statneje kenclije Oliver Schenk (CDU) restrikcije přećiwo přećiwnikam šćěpjenja wotpokazuje. Tučasnje přewjeduja ewaluaciju, kelko šćěpjenskich terminow přiwzate njebu.
Pjeć ludźi je italska policija zajała, kotřiž běchu so jako posrědnicy Vatikana wudawali a tak swoje wopory wo wysoke pjenježne sumy wobšudźili. Pozdatni skućićeljo běchu škodowanym financne wikowanja k wosebje wunošnym kondicijam poskićili, zdźělichu carabinieri wčera w Romje. Wobšudźerjo zetkawachu swoje wopory wospjetnje w zjawnje přistupnych cyrkwinskich zarjadnišćach a žadachu sej posrědniski popłatk w hotowych pjenjezach.
Papagajnik je w badensko-württembergskim Vaihingenje nad rěku Enz zadobywarja zahnał, kiž je w nocy na srjedu přez nachilene wokno w přizemju do swójbneho domu zalězł. Při tym kwětkowc dele padny. Ptačk škrěkaše, paduch ćěkaše. Bjez rubizny pak njebě, na wobkromje wokna ležacu móšeń bě sobu wzał.