Berlin (dpa/SN). Zwjazkowa kanclerka Angela Merkel (CDU) wobstawa dale na swojim zaměrje, organizować wjerškowe zetkanje 27 statnych a knježerstwowych šefow Europskeje unije z ruskim prezidentom Wladimirom Putinom. „Poměr mjez Ruskej a EU tuchwilu woprawdźe spomóžny njeje. Tež w zymnej wójnje pak běchu potrjecheni hromadźe rěčeli“, rjekny Merkel dźensa na widejowej konferency. „Mjezsobne mjelčenje njepomha problemy rozrisać.“
Běłoruska sankcije wukazała
Minsk (dpa/SN). Běłoruska je na sankcije Europskeje unije z napřećiwnymi naprawami reagowała. Bywša sowjetska republika je wčera program EU tak mjenowaneho wuchodneho partnerstwa wopušćiła a njewobdźěla so hižo na boju přećiwo ilegalnej migraciji a organizowanej kriminaliće. Nimo toho je zastupnika Běłoruskeje pola EU w Brüsselu „ke konsultacijam“ domoj zwołała. Reprezentanta EU w Běłoruskej skazachu do wonkowneho ministerstwa w Minsku.
Facebook so wuspěšnje wobara
Waršawa (dpa/SN). Po wumjetowanjach zatajenja splažneho znjewužiwanja dźěći a młodostnych přez duchownych dla je biskop w Pólskej wotstupił. Bamž Franciskus je próstwu Legničanskeho biskopa Zbigniewa Kiernikowskeho wo wuwjazanje ze zastojnstwa přiwzał, kaž Lublinske arcybiskopstwo informuje. Naslědnik budźe Andrzej Siemieniewski, dotal swjećacy biskop we Wrócławju.
Minjene měsacy je Vatikan wjacorych pólskich biskopow chłostał, dokelž běchu pokiwy na splažne znjewužiwanje ignorowali. Přepytowanska komisija nimo toho pruwuje, hač njebě tež wjelelětny wuski sobudźěłaćer zemrěteho bamža Jana Pawoła II., kardinal Stanisław Dziwisz a Krakowski arcybiskop, wotpowědne wumjetowanja chutnje brał.
London (dpa/SN). Do dźensnišeje wosmifinalneje hry europskich koparskich mišterstwow mjez Jendźelskej a Němskej su wjetšu ličbu přihladowarjow w Londonskim Wembleyjowym stadionje a zadźerženje fanow za čas koronapandemije raznje kritizowali. Zwjazkowy nutřkowny minister Horst Seehofer (CSU) rjekny hladajo na rozšěrjacu so delta-wariantu koronawirusa runje we Wulkej Britaniskej, zo ma dźesaćitysacy přihladowarjow w stadionje za „njezamołwite“. W rozmołwje z nowinarjemi je wón zamołwitych europskeje koparskeje unije UEFA namołwił, ličbu přihladowarjow „jasnje pomjeńšić“. Dźensa wječor chcedźa hač do 45 000 přihladowarjow we Wembleyju dowolić.
Badensko-württembergski ministerski prezident Winfried Kretschmann (Zeleni) rjekny, zo „njemóžeš tajke něšto poprawom zamołwić“, chibazo prawidła a wotstawki dodźeržiš. Dotalne wobrazy posrědkuja zaćišć, zo je pandemija nimo. „To je absolutnje wopačny signal. Tale lochkomyslnosć je dospołnje njezrozumliwa“, rjekny 73lětny nowinarjam.
Barcelona (dpa/SN). Wot španiskeho knježerstwa wobhnadźeni separatisća z Katalonskeje su připowědźili, zo chcedźa dale wo njewotwisnosć konfliktneho regiona wojować. „Chcemy wonka za swobodu, za amnestiju, za samopostajowanje a za republiku dźěłać“, rjekny bywši katalanski wonkowny minister Raül Romeva, jedyn z dźewjeć pušćenych aktiwistow, pod wyskom stow přiwisnikow. Před jastwom w měsće Lledoners njedaloko Barcelony witaše wobhnadźenych tež regionalny prezident Pere Aragonès. Separatist žada sej wot centralneho knježerstwa w Madridźe zelenu swěcu za legalny referendum wo njewotwisnosći.
Romeva, bywši zastupowacy regionalny šef Oriol Junqueras a pjećo dalši wobhnadźeni nawodźa ilegalneho pospyta wotpačenja nazymu 2017 dźeržachu plakat z hesłom „Swobodu za Katalonsku“ w rukach. „Njedamy sej hubu zakazać“, woni wołachu. Dalšeju separatistow witachu wyskacy přiwisnicy w Puig de les Basses njedaloko mjezy k Francoskej.
Wosrjedź jězby z kófroweje rumnosće awta padnyłoj staj mužej w starobje 19 a 24 lět njedaloko bayerskeho Obergünzburga. 19lětneho dyrbjachu zranjeneho w chorowni zastarać. Po prěnich dopóznaćach bě wosobowe awto njedźelu rano tak połne, zo dyrbještaj mužej, kotrajž chcyštaj z awtostopom sobu jěć, do wotewrjeneje kófroweje rumnosće zalězć. Jako šofer raznje pospěši, padnyštaj wonaj na asfalt. Awto je dale jěło. Policija nětko swědkow pyta.
Sta litrow jabłukoweho sirupa zhubiło je wčera nakładne awto w Frankfurće nad Mohanom. Na lěpjatej maćiznje so wjacore motorske, mopedy a kolesa wobsunychu a znjezbožichu. Tank ze sirupom měješe dźěru. Hakle po pjeć kilometrach Lkw zasta. Wohnjowi wobornicy dźěru zapłatachu. Sirup na dróze dyrbjachu z wodu wotmyć.
Mainz (B/SN). Biskop diecezy Mainz Peter Kohlgraf chce so přichodnje sobu za to zasadźeć, zo smědźa žónske při zakładnych rozsudach na wšěch runinach biskopstwa sobu rěčeć a mužam runostajeni być. Na digitalnej konferency je wón z 260 žónskich dwanaće do wosebiteje skupiny wuzwolił. Komisija je na dwě lěće wuzwolena. Biskop Kohlgraf na zhromadźiznje wuzběhny: „Njerunostajenje žonow je cyłotowaršnostny problem. Myslu sej, zo mamy šansu, we wosebitych wobłukach stać so z doprědkarjemi w Němskej a na cyłym swěće.“ Dušepastyrski decernent z Mainza Hans Jürgen Dörr zwurazni, zo „trjeba cyrkej na kóždy pad zhladowanje žonow na wšelke zjawy a jich zamołwity angažement na wšěch runinach.“
Namrěwcy Bycanca
Odessa (dpa/SN). Najebać raznu kritiku Ruskeje su dźensa na Čornym morju mjezynarodny mórski manewer zahajili, něšto dnjow po zražce mjez jendźelskej wójnskej łódźu a ruskim namjeznym škitom. Na wojerskim zwučowanju pod nawodom USA a Ukrainy wobdźěleja so tysacy wojakow, wjacore łódźe a lětadła z 32 krajow. Manewer ma dwaj tydźenjej trać. Po informacijach mariny USA je zwučowanje, kotrež wot lěta 1997 přewjeduja, lětsa najwjetše swojeho razu.
Bamž za wopory so modlił
Rom (dpa/SN). Bamž Franciskus je so za ludźi w Čěskej po zapusćenjach njewjedra a tornada dla modlił. „Modlu so za mortwych, zranjenych a za wšěch, kotřiž dyrbjachu swoje ćežko wobškodźene domy wopušćić, rjekny bamž wčera stam wěriwych a putnikow na Pětrowym naměsće w Romje. Při njewjedrje minjeny štwórtk wječor w Čěskej bě pjeć wosobow žiwjenje přisadźiło. Něhdźe 200 ludźi so zrani. Tornado zniči sydom wsow.
Objekty milicow nadběhowali