To a tamne (25.06.21)
Ćelo na awtodróze A 4 je w nocy na štwórtk zasadźenje policije zawiniło. Zastojnicy dyrbjachu A 4 njedaloko wot-jězdki Wüstenbrand do směra na Erfurt dospołnje zawrěć. Skónčnje so poradźi, skoćo popadnyć. Wutoru bě cyłkownje wosom ćelatow ćeknyło. Za někotrymi přeco hišće pytaja. Policija prosy šoferow w regionje wo wosebitu kedźbnosć.
Nimale tři promile alkohola w kreji měještaj wodźerjej nakładneju awtow, jako jeju policija kontrolowaše. 37lětny jědźeše po awtodróze A 2, jako ze swojim Lkw-jom škitne wobhrodźenje po dołhosći něhdźe sto metrow wobškodźi. Šofera pak to njestaraše. Něšto pozdźišo jeho policija kontrolowaše a zwěsći 2,58 promilow. Dalši, 35lětny bě na A 14 do směra na Schwerin po puću, hdźež je chětro njewěsteho jězdźenja dla napadnył. Pola njeho naměrichu 2,96 promilow.
W dźěle gremija kontinuita wažna
Na docpěte w nachilacej so wólbnej periodźe parlamenta zhladowali su wobdźělnicy wutorneje online-widejokonferency poradźowaceho wuběrka za prašenja serbskeho ludu při zwjazkowym ministerstwje nutřkowneho, za twarstwo a domiznu (BMI).
Budyšin/Berlin (SN/at). Prof. dr. Bernd Fabritius, społnomócnjeny zwjazkoweho knježerstwa za prašenja wusydlencow a narodne mjeńšiny, mjenowaše po słowach přitomnych tři wobłuki, w kotrychž je gremij k spomóžnym wuslědkam přinošował. Sprěnja skedźbni wón na štwórte financowanske zrěčenje za Załožbu za serbski lud, kotrež je po přewostajenych srědkach Zwjazka, Sakskeje a Braniborskeje měznik w přichodnym skutkowanju załožby. Ministerstwo w Berlinje termin podpisanja hišće koordinuje. Zdruha naliči społnomócnjeny zapisanje serbskich naležnosćow do zakonja wo strukturnej změnje. Třeće ćežišćo je dźěło z młodźinu. Zastupjerjo Domowiny a Załožby za serbski lud, kotřiž rozprawjachu w gremiju, so dr. Fabritiusej za spomóžne dźěło dźakowachu.
Warnuja łódźe z wutřělemi
Moskwa (dpa/SN). Po warnowanskich wutřělach a bombach k wottrašenju britiskeje wójnskeje łódźe na Čornym morju je Ruska dalše kraje warnowała, ruski mórski teritorij ranić. Podawk z britiskim ničakom „HMS Defender“ před pobrjohom połkupy Krim bě „chutny wokomik“, rjekny ruski zastupowacy wonkowny minister Sergej Rjabkow dźensa w Moskwje. Ruska je rozsudźena swoju teritorialnu integritu w nuzy tež wojersce zakitować. Britiska łódź bě po zdaću tři kilometry hłuboko na ruskim teritoriju była, ignorujo wšitke warnowanja.
Wo spěchowanju sporta rěčeli
Drježdźany (dpa/SN). Přichod Europy, židowske žiwjenje a kultura w Sakskej kaž tež 60. róčnica twara Berlinskeje murje stejachu w srjedźišću dźensniše posedźenja Sakskeho krajneho sejma. Nimo toho rěčachu wo spěchowanju sporta w pěstowarnjach a šulach kaž tež wo płuwanskej wučbje, štož bě w časach koronakrizy wosebje ćerpjeło. Za to je knježerstwowa koalicija CDU/SPD a Zelenych lisćinu najwažnišich předewzaćow zestajała.
Demonstrantka zasudźena
Hižo druhi króć je wčera ćežke njewjedro we wokrjesu Esslingen w ...
Poslednja deklaracija
Berlin (dpa/SN). Zwjazkowa kanclerka Angela Merkel (CDU) je dźensa w zwjazkowym sejmje najskerje poslednju knježerstwowu deklaraciju w swojim nimale 16lětnym zastojnstwje dźeržała. Do popołdnju zahajaceho so wjerškoweho zetkanja 27 statnych a knježerstwowych šefow EU je wona zapósłancow wo temach wuradźowanjach informowała a swój kurs w jednanjach rozłožiła.
Dalša wosebitosć dźensnišeho posedźenja parlamenta bě narěč předsydy CDU a kanclerskeho kandidata unije Armina Lascheta. Wón je so po 23 lětach w sejmje zaso słowa jimał. Ministerski prezident Sewjerorynsko-Westfalskeje zastupowaše Zwjazkowu radu. Laschet bě w lětach 1994 do 1998 zapósłanc zwjazkoweho sejma. Naposledk bě wón w aprylu 1998 w plenumje rěčał.
Spahn warnuje
Předsudki integraciju haća
Kamjenica (dpa/SN). Strach, předsudki a rasizm haća we wjesnych kónčinach integraciju ćěkancow. To je slědźenska skupina „Přichod ćěkancow we wjesnych kónčinach“ zwěsćiła. Přepytowali běchu komuny we wosom wokrjesach Sakskeje, Hessenskeje, Delnjeje Sakskeje a Bayerskeje, kaž Kamjeničanska Techniska uniwersita zdźěli. Projekt měješe hišće njewuslědźene polo migraciskeho slědźenja wudospołnić, dokelž integraciju ćěkancow nastupajo małe městačka a wsy w srjedźišću njesteja.
Při podpěrje a socialnym wobdźělenju we wjesnych kónčinach je wažne, kotre stejišćo regionalni politikarjo na městnje zaběraja. Maja-li woni jeno snadny dohlad do žiwjenskich wobstejnosćow ćěkancow, njeje to spomóžne za aktiwnu integracisku politiku, slědźerjo zwěsćeja.
Za integraciju we wjesnych kónčinach njejsu jeno dźěłowe městna, bydlenja a rěčne kursy wažne. Rozsudnej stej zadźerženje regionalneje ciwilneje towaršnosće a zwólniwosć wobydlerjow, ćěkancow do wjesneje zhromadnosće přiwzać.
Bioratarstwo so rozšěrja
Dźesać procentow płoniny burja mjeztym ekologisce wobhospodarjeja
Berlin (dpa/SN). Žana chemija na polach, ale samoplahowana pica za skót: Biologiske ratarstwo w Němskej so dale rozšěrja a wučinja mjeztym prěni króć dźesać procentow wšeje agrarneje płoniny. To zdźěli zwjazkowe ministerstwo za ratarstwo, złožowace so na ličby lěta 2020. Na łahodne biologiske wašnje hospodari mjeztym 35 400 ratarskich zawodow. To je 13,5 procentow wšitkich statokow, po tym zo bě jich před lětomaj hišće 12,9 procentow było. Tež mjez přetrjebarjemi so přiběrajcy za biowudźěłkami prašeja, byrnjež wone přiwšěm dale dosć drohe byli.
Kaž ministerka Julia Klöckner (CDU) w Berlinje rjekny, je ekologiske ratarstwo dale a wuznamniše, trend je stabilny. Jeničce loni je płonina 123 000 koparskich sportnišćow k tomu přišła.
Při tym su dale wulke regionalne rozdźěle. Najwjetši podźěl biologiskich zawodow ma Posaarska z 19,4 procentami. Slědujetej Hessenska z 15,9 a Braniborska ze 14,4 procentami – stajnje hladajo na cyłkownu ratarsku płoninu kraja. Na poslednim městnje steji Delnja Sakska z 5,2 procentomaj.
Chłostanje w nowej formje
Drježdźany (dpa/SN). Bydlić w zhromadnej skupinje, wuchodźować so po měsće a so po krutym dnjowym wotběhu měć: W Sakskej chcedźa přichodnje dorosćenym zasudźenym jastwowe žiwjenje w swobodnej formje zmóžnić. Towarstwo za socialne prawnistwo w Drježdźanach chce wot awgusta štyri tajke městna mužam poskićić, kotřiž su po chłostanskim prawje za dorosćenych zasudźeni, kaž justicne ministerstwo zdźěli. Swobodny stat je po informacijach prěni zwjazkowy kraj, kotryž tajki poskitk předpołoži. Justicna ministerka Katja Meier (Zeleni) je sej wěsta, zo je w swobodnej formje chłostanja lěpše dźěło z jednotliwymi jatymi móžne. „Zaměr je nowe žiwjenje jateho bjez chłostanja po pušćenju.“
Předewšěm jatych z problemami kaž alkoholizmom chcedźa w projektach zwonka jastwowych murjow zaměstnić. Tam změja kruty dnjowy wotběh a zhromadne jědźe. Towarstwo chce so wo jatych starać a jich na žiwjenje w swobodźe přihotować. Štó smě so na projekće wobdźělić, njeje hišće jasne. Wuzwolić pak chcedźa jenož tajkich, pola kotrychž njewobsteji strach, zo so jastwu wuwinu a prosće ćeknu.
To a tamne (24.06.21)
Mužej w kostimje spidermana ruku dał je bamž Franciskus a je tak wulku kedźbnosć zbudźił. Maskěrowany muž bě Italčan, kiž w kostimje chorownje wopytuje, zo by tam předewšěm dźěćom wjeselo wobradźił. Tydźenska generalna awdienca 84lětneho Franciskusa wotměwa so mjeztym zaso z wopytowarjemi. Bamž je dawno přećiwo koronje šćěpjeny.
Postawa praženeho prosatka wuskutkuje w Romje wótre diskusije. Wuměłska uniwersita italskeje stolicy bě skulpturu w měšćanskim dźělu Trastevere postajiła, hdźež je wosebje wjele turistow. Tući widźa tam nětko mortwe prosatko z kamjenja, bjez nohow a kaž ke grilowanju zwjazane – tak mjenowanu „porchetta“, tradicionalne pražene prosatko. Zwěrinoškitne organizacije přećiwo postawje raznje protestuja, dokelž maja ju za ranjenje zasadow derjeměća skotu a wšitkich ludźi w Romje.
