Peking/Berlin (dpa/SN). Zwjazkowa kanclerka Angela Merkel (CDU) a chinski ministerski prezident Li Keqiang staj so dźensa zhromadnje ze swojimaj ministrami k wirtuelnym knježerstwowym konsultacijam schadźowałoj. Rozmołwy stejachu w znamjenju najnowšich politiskich napjatosćow a přiběracych problemow němskich předewzaćow w Chinje. Do toho warnowaše předsyda wonkowneho wuběrka zwjazkoweho sejma Norbert Röttgen (CDU) před naiwnosću we wobchadźenju z Chinu hladajo na jeje strategiske globalne zaměry.
Wolóženja w Nižozemskej
Amsterdam (dpa/SN). Dobre štyri měsacy po wukazanju kruteho lockdowna k wobmjezowanju koronapandemije je Nižozemska wulku kročel wróćo do normality zwoprawdźiła. Tak je nócny zakaz, dom wopušćić, zběhnjeny. Hosćency a wobchody pod hołym njebjom smědźa zaso kupcow posłužować. Ludźo smědźa so zwonka bydlenjow zetkawać. Knježerstwo bě so za wolóženja rozsudźiło, byrnjež fachowcy před nimi warnowali.
Zrěčenju přihłosowali
Berlin (dpa/SN). Zwjazk městow Němskeje wita za junij planowane zběhnjenje kruteho šćěpjenskeho porjada. „Mjeztym smy ze šćěpjenjom po dobrym puću. Trjebamy pak wjetšu spěšnosć. Tohodla je kročel rozsudna, zběhnyć šćěpjenski porjad“, rjekny Lipšćanski wyši měšćanosta a prezident Zwjazka městow Burkhard Jung powěsćerni dpa.
Jeli so kóždy wobydler wo šćěpjenski termin stara, so šćěpjenje dale pospěši. „W šćěpjenskich centrach komunow dotal wšitko bjez problemow běži. Tam su kmani tež nowu fazu šćěpjenja bjez ćežow zmištrować, praji Jung. Wón je „sej wěsty, zo chce so přewažny dźěl wobydlerjow šćěpić dać. Ći jedni, zo bychu so koronawirusej wobarali, ći tamni, dokelž chcedźa zaso do piwowych zahrodow hić abo na Mallorcu lećeć.“
Sobu najwoblubowaniše zarjadowanje oldtimerow, Anklamske zetkanje Trabantow, dyrbi tež lětsa koronapandemije dla wupadnyć, kaž rěčnik organizaciskeho mustwa zdźěli. Zetkanje měješe so wot 12. do 16. meje na Anklamskim lětanišću wotměć. Nětko nadźijeja so na klětu. Loni běchu zetkanje přepozdźe wotprajili a dyrbjachu zrěčensku pokutu 60 000 eurow zapłaćić. Před lětomaj witachu w Anklamje něhdźe 800 jězdźidłow, předewšěm Trabijow.
Swój před wosom lětami pokradnjeny moped Simson je wobsedźer w braniborskim Kyritzu nětko zaso namakał. Wot lěta 2013 bě wón stajnje zaso w interneće za swojej „łastojčku“ hladał. Před dnjemi wuhlada ju 38lětny nadobo jako poskitk w socialnej syći. Policija přepytuje nětko přećiwo poskićowarjej a mužej, kiž bě jemu moped předał.
Bornholm (dpa/SN). Za wjele diskutowany płunowód Nord Stream 2 je dalša specialna łódź započała roły kłasć. Po wuspěšnych testach zahaji ruska łódź „Akademik Čerskij“ dźěła w danskim dźělu Baltiskeho morja, kaž předewzaće Nord Stream 2 zdźěli. Hižo wot spočatka februara tam ruska „Fortuna“ roły kładźe. Přez płunowód chcedźa kóžde lěto 55 miliardow kubiknych metrow zemskeho płuna z Ruskeje do Němskeje transportować. Pipeline je nimale dotwarjena.
Chłostanja přepruwować
London (dpa/SN). Wuběrk za čłowjeske prawa britiskeho parlamenta chce pruwować, hač su w Jendźelskej a Walesu ludźom njewoprawnjene chłostanja korona-naprawow dla napołožili. Wuběrk da nětko wjace hač 90 000 chłostankow přepruwować. System chłostanja je „zamylacy, diskriminowacy a njefairny“, rěka w rozprawje wuběrka. Prawidła koronawirusa dla su wot spočatka pandemije we Wulkej Britaniskej 65 króć změnili. Chłostanja sahaja hač do 11 500 eurow. Prawniski puć přećiwo nim žadyn njeje.
USA přewostaja Astrazeneca
Strasbourg (SN/JaW). Parlamentariska zhromadźizna Europskeje rady (PACE) je knježerstwo Běłoruskeje namołwjała, „wobšěrnu reformu wólbneho systema w kraju přewjesć a jón mjezynarodnym standardam za demokratiske wólby přiměrić“. Wo tym informuje mjenowana rada na swojej internetnej stronje.
Brüssel (dpa/SN). W zwadźe wo dlijacym so dodawanju šćěpiwa pře koronawirus je komisija Europskeje unije producenta Astrazeneca sudnisce wobskoržiła. 27 statow EU postupowanje podpěruje, kaž z Brüssela rěka. Prěni termin na jednym z belgiskich sudnistwow je hižo jutře planowany. Astrazeneca ma sudniske rozestajenje za njewoprawnjene a chce so wobarać. Zdobom pak wita britisko-šwedske předewzaće składnosć, rozestajenje spěšnje zaso skónčić.
Zhotowjer šćěpiwa bě přilubjene mnóstwa seruma za Europsku uniju minjene měsacy stajnje zaso drastisce krótšił. Tak dodawaše w prěnim kwartalu 27 statam EU jenož 30 milionow město dojednanych 120 milionow dozow. W druhim kwartalu liča kraje ze 70 milionami. Prěnjotnje bě 180 milionow dozow wučinjenych. Z wida komisije EU Astrazeneca tak wobłukowe dojednanje z awgusta 2020 rani. Předewzaće twjerdźi, zo je so po swojich mocach prócowało, zrěčenje nastupajo dodawanje šćěpiwa dodźeržeć. Komisija EU to hinak widźi.
Berlin (dpa/SN). Šćěpjenja přećiwo koronawirusej maja najpozdźišo wot junija za wšěch móžne być, bjez dotalneho kruteho šćěpjenskeho porjada. „To njerěka, zo móžemy potom hnydom kóždeho šćěpić“, rjekny zwjazkowa kanclerka Angela Merkel (CDU) wčera po konferency z ministerskimi prezidentami. „Kóždy pak móže so potom wo šćěpjenski termin prócować a jón zastaranju ze šćěpiwom wotpowědujo tež dóstanje.“ W tym zwisku je Merkel swoje přilubjenje potwjerdźiła, zo chcyła kóždemu wobydlerjej hač do 21. septembra šćěpjenje poskićić.