Tramwajki wjace njejězdźa
Podstupim/Choćebuz (dpa/SN). Najebać sněh a hładkosć su dźensa rano w Braniborskej nastupajo powołanski wobchad přirunujo jenož mało njezbožow měli. Wot połnocy hač do 9 hodź. dóńdźe k 15 njezbožam z blachowej škodu a dalšim štyrjom zražkam ze zranjenymi.
Zymske wjedro je so wosebje w Delnjej Łužicy wo zapozdźene a wupadnjene ćahi postarało. Kaž Němska železnica rano informowaše, su předewšěm regiony wokoło Choćebuza a Kalawy (wokrjes Hornje Błóta-Łužica) potrjechene. W tamnych regionach Braniborskeje běchu jenož jednotliwe wupady abo zapozdźenja.
W Choćebuzu pak su w běhu dopołdnja tramwajki zastali jězdźić. Jako přičinu mjenowachu mylene wuhibki wějeńcow a zdźěla wupada miliny dla. Na wšitkich tramwajkowych linijach su nětko narunanski wobchad z busami zarjadowali. Wšitke rumowanske a na hladanje kolijow wusměrjene wozydła su zasadźene, zo bychu tramwajki prawje bórze zaso jězdźili, rěka z přisłušneho wobchadneho předewzaća.
Wadźa so incidency dla
Žadanja za wolóženjemi přiběraja – wirologojo raznje přećiwo tomu
Berlin/Braunschweig (dpa/SN). Imobilijowe hospodarstwo kritizuje w debaće wo móžne zběhnjenje wobmjezowanjow wšědneho žiwjenja koronawirusa dla politiske wusměrjenje na 50 přizjewjenych nowych infekcijow na 100 000 wobydlerjow. „Dyrbjało móžno być, zo tež při wyšich incidencach towaršnostne a hospodarske žiwjenje zamołwiće zaso normalizujemy“, rjekny prezident Centralneho imobilijowe wuběrka Andreas Mattner minjeny pjatk w Berlinje. Rozsudne dyrbjało być, zo njeje wjace hač 4 000 łožow intensiwnych stacijow wot koronapacientow wobsadźenych. Wid na Europu pokazuje, zo je dotal lědma jedyn z krajow hódnotu 50 nowych infekcijow na 100 000 wobydlerjow w běhu sydom dnjow docpěł. Z přiběracym šćěpjenjom ludźi měli so tež incidency hinak posudźować, Mattner potwjerdźi. „Kóždy měsac lockdowna płaći 34 miliardow eurow. Najebać wšitke hospodarske pomocy płaći: Wolóženja su najlěpša pomoc“, Mattner wuzběhny.
To a tamne (08.02.21)
Na wšě 2 753,91 eurow maćerje přečinił je sydomlětny hólc w Hannoveru. Pachoł bě so na internetnej hrě wobdźělił a měješe dowolnosć maćerje, snadnu sumu zasadźić. Žona pak njebě sej wjace toho wědoma, zo su daty jeje kreditneje karty na platformje zapołožene. Syn hraješe tajnje dale, centrala za škit přetrjebarjow zdźěla. Wustróžana mać bě so na centralu wobroćiła. Ta so z poskićowarjom hrow dojedna, zo njetrjeba mać na kóncu wjace hač sto eurow zapłaćić.
Samlutki je 70lětny muž z Jendźelskeje z čołmom Atlantik přeprěčił, cyłkownje 4 800 kilometrow. Srjedź decembra bě na Kanariskich kupach wotjěł a je wčera w Karibice dojěł. Ze swojej jězbu chcyše pjenjezy za organizaciju zběrać, kotraž so wo ludźi stara, kiž su na Alzheimer schorjeli. Frank Rothwell je tak najstarši muž, kotremuž je so tajke něšto poradźiło.
Tajki „politiski dar njesměli sej zaso rubić dać“
Za serbske naležnosće na krajnej kaž tež komunalnej runinje sej zwjazkarjow mjez politiskimi rozsudźerjemi zdobyć a jim zdobom jasne swójske stejišćo wuwědomić, wo to prócuja so serbske cyłki w stronach SPD, Zwjazk 90/Zeleni a Lěwica w Sakskej. Kóždy za sebje ma tam swoje nazhonjenja. Wčera pak zetkachu so jich zastupjerjo hromadźe z akterami dalšich stron, zo bychu wo tym rozmyslowali, kak hodźał so wobstejacy potencial na dobro Serbow zjednoćić.
Budyšin (SN/at). Krajne dźěłowe koło SPD „Serbja“, krajny dźěłowy kružk Zwjazka 90/Zelenych „Serbske žiwjenje“ a Serbska Lěwica jako najstarši tajki cyłk su wčera hromadźe na widejokonferencu přeprosyli. Mjez 15 wobdźělnikami běchu tež serbscy a na serbskich naležnosćach zajimowani čłonojo CDU, FDP, Łužiskeje aliancy kaž tež wokrjesny radźićel Serbskeho wolerskeho zjednoćenstwa.
Biden chce poćahi wožiwić
Washington (dpa/SN). Nowy prezident USA Joe Biden chce poćahi k najwušim zwjazkarjam po „lětach zanjechanja“ zaso wožiwić. Je hižo z partnerami w Aziji a we wjele čłonskich krajach NATO, mjez druhim w Němskej, rěčał, kaž Biden wčera w swojej prěnjej wonkopolitiskej narěči zwurazni. W swojim poselstwje we wonkownym ministerstwje wón rjekny: „Ameriske zwjazkarstwa słušeja k našim najwjetšim lěpšinam.“ Rozsudźeny chce Biden přećiwo riwalam a njepřećelam postupować.
Söder a Macron wuradźowałoj
Mnichow (dpa/SN). Bayerski ministerski prezident Markus Söder (CSU) je dźensa z francoskim statnym prezidentom Emmanuelom Macronom wo połoženju w koronapandemiji wuradźował. Na widejokonferency wobjednawaštaj wonaj tež bayersko-francoske poćahi a aktualnu situaciju w Europje. Söder a Macron běštaj so hižo na kromje Mnichowskeje wěstotneje konferency dojednałoj, wosobinske styki pěstować. Koronakrizy dla je to dotal jenož wirtuelnje móžno.
Chcedźa so Trumpa prašeć
Před twarjenjom telewizijneho sćelaka „Naš“ w ukrainskej ...
Von der Leyen přiznawa zmylki
Merkel chce hišće čakać
Dehoga: Towaršnosć njepačić
Podstupim (dpa/SN). Zwjazk hotelownikow a hosćencarjow Braniborskeje (Dehoga) je w diskusiji nastupajo lěpšiny za šćěpjenych před „towaršnosći dweju klasow“ warnował. Zastopnjowanje do šćěpjenych a nješćěpjenych by jenož njeměr zbudźiło, rjekny prezident Dehoga Olaf Schöpe powěsćerni dpa. W branši dźe nětko najprjedy raz wo to, z móžnymi wolóženjemi dźěło scyła zaso zmóžnić a nic wo to, wo lěpšinach za šćěpjenych rěčeć. Najwažniši je tuchwilu plan wotewrjenja hosćencow a hotelow. Tam maja hižo wotpowědne schodźenkowe koncepty. Kóždy dyrbjał za swój dom wotpowědny koncept nastajić. Schöpe spušća so na kreatiwnosć branše.
Němska etikowa rada bě wčera wotradźiła, šćěpjenym porno nješćěpjenym lěpšiny spožčić. Wobmjezowanja měli so za wšitkich ludźi runočasnje zběhnyć. Nimo toho njeje hišće dopokazane, zo njemóža šćěpjeni koronawirus wjace dale dawać. W tym zwisku běchu zarjadowarjo koncertow připowědźili, zo předawaja zastupne lisćiki jenož hišće šćěpjenym.
