Wulki nawal
Zwjazuja praksu a teoriju
Nazhonjenja z dźěła w praksy w teoriji reflektować a nawopak je nadawk, kotryž zmóžnja šulerkam Budyskeje Serbskeje fachoweje šule za socialnu pedagogiku dokładnu zaběru z prašenjemi kubłanja.
Budyšin (SN/MiR). Za wukubłanje kubłarjow a kubłarkow njeje hižo trjeba zdźěłać zakładnu wučbnicu wo nałožowanju dospołneje abo podźělneje imersije a wo dźěle po koncepće Witaj. „Za to předleža tuchwilu hižo mnohe materialije, kotrež we wobłuku našeho wukubłanja wužiwamy. Wjele bóle zajimuja nas přikłady, to rěka wuknjenske situacije, kotrež rysuja wuměnjenja w serbskich a dwurěčnych dźěćacych dnjowych přebywanišćach a dalšich kubłanišćach.“ Tole rozłoži dźensa dopołdnja wučerka fachoweje šule Claudia Winarjowa.
To a tamne (20.04.15)
Njelubeho sobujěduceho, pawka w awće dla, je 30lětny šofer w Tübingenje znjezbožił. Kaž policija zdźěli, bě so zwěrjatko w křiwicy na šofera pušćiło. Tón so tak stróži, zo z dróhi zajědźe. Při tym šmórny so wóz wobhrodźenja na kromje jězdnje. Šofer wuńdźe ze stróželemi. Škoda na awće wučinja 4 500 eurow.
Cyły skład starych bróni su twarscy dźěłaćerjo při ponowjenju bydlenskeho domu w Limbachu-Oberfrohnje w Zwickauskim wokrjesu našli. Pod špundowanjom schowane ležeše šěsć pistolow, rozebrany karabiner, nimale 70 patronow a šěsnaće prózdnych magacinow pistole. Policija trochuje, zo pochadźeja brónje z lěta 1930. Nětko chcedźa zwěsćić, komu móhli wone słušeć. To drje budźe chětro wobćežne. Dom słuša bydlenskej towaršnosći. Dotal tež njewědźa, štó bě brónje tam składował. Policija wšitko sćaza.
Łužica (20.04.15)
Rjedźa rěčnu zawěru
Grodk (dpa/SN/ch). Z předzawěroweho bazenka Grodkowskeje rěčneje zawěry wotstronjeja wot dźensnišeho wulke mnóstwo železoweho błóta. Tak ma so zežołtnjenju Sprjewje zadźěwać. Płuwanskej bagraj matej błóto z předzawěry wotsrěbać, a wone ma so na deponiju w sakskich Łutach dowjezć, zdźěli hórnistwowy saněrar LMBV. Hač do kónca junija ma so tak něhdźe 30 000 kubiknych metrow błóta wotstronić. Rěčna zawěra funguje kaž škitna tarč za Błóta a Choćebuz. Woda trjeba wjele dnjow, zo by rěčnu zawěru přeběžała. W tym času wotsadźa so na dnje železowy oker.
Dno zapadnyło
„Kamjenc Pegidu njetrjeba“
Kak chcemy zhromadnje žiwi być? Što móžemy jako hosćićel wot cuzych wočakować? Što móža cuzy jako hosćo wot nas wočakować? Tele prašenja stejachu w srjedźišću zarjadowanja, na kotrež bě město Kamjenc wčera zhromadnje ze Sakskej krajnej centralu za politiske kubłanje do radnicy přeprosyło.
Kamjenc (SN/CoR). Něhdźe 70 zajimcow dožiwi wčera diskusiju wosebiteho razu: žadyn pult, žadyn podij a publikum, žane prědku a zady, za to štyri blida ze stólcami a mikrofonami wosrjedź žurle Kamjenskeje radnicy a kołowokoło wobdźělnicy, mjez nimi tež zarjadowarjo a fachowcy kaž wyši měšćanosta Roland Dantz (njestronjan). „Chcemy do rozmołwy přińć. Tule njeje žanych přihladowarjow, ale su to demokratiscy wobydlerjo, kotřiž chcedźa sej mysle wuměnjeć, měnjenje druheho słyšeć a je rozumić. Kóždy móže dosrjedźa stupić a so k temje wuprajić“, rozłoži moderator Frank Richter, direktor krajneje centrale.
