Zasłužby wojakow wuzběhnył
Moskwa (dpa/SN). Ruski prezident Wladimir Putin je składnostnje 75. róčnicy dobyća Sowjetskeho zwjazka nad hitlerskim fašizmom na wulke zasłužby Čerwjeneje armeje dopominał. „Wojacy su domiznu wuchowali a žiwjenje přichodnych generacijow škitali. Woni su Europu wuchowali a swět škitali“, rjekny Putin sobotu w Moskwje. Ceremoniju su w telewiziji wusyłali. Planowanu wulku wojersku paradu běchu koronapandemije dla wotprajili.
Róčnicu woswjećili su tež w druhich bywšich sowjetskich republikach, kaž na Ukrainje. Jenička wojerska parada swěta wotmě so w běłoruskej stolicy Minsku.
Boja so radikalizacije
Nowe demonstracije přećiwo naprawam koronawirusa dla
Berlin (dpa/SN). Po nowych demonstracijach přećiwo statnym naprawam koronawirusa dla warnuja wodźacy politikarjo před radikalizaciju protestow. Štóž pandemiju prěje a namołwja škitne naprawy ignorować, tón njewěstosć ludźi znjewužiwa, zo by towaršnosć wosłabił a pačił, rjekny předsydka SPD Saskia Esken nowinarjam. „Tomu dyrbimy so jako demokraća spjećować.“
Podobnje wupraji so generalny sekretar CDU Paul Ziemiak. „Njedopušćimy, zo ekstremisća koronakrizu jako platformu za swoju antidemokratisku propagandu znjewužiwaja“, rjekny Ziemiak nowinarjam. CDU starosće ludźi chutnje bjerje. „Zdobom pak tež konsekwentnje přećiwo tym postupujemy, kotřiž starosće wobydlerjow ze swojimi teorijemi zapřisahańcy hišće přiwótřeja a w interneće wopačnosće šěrja.“
To a tamne (11.05.20)
Joggera nadpadnyła je sowa w hessenskim Bad Nenndorfje. Ptak zaštapi swoje pazory do hłowy muža, zo by swoje młodźo škitał. 46lětny spočatnje ani njewědźeše, što so jemu stanje. Tukajo na to, zo bě něchtó na njeho třělił, informowaše wón policiju. Jako sowa tež přichwatanu zastojnicu atakowaše, bě skónčnje jasne, štó je krawjacu ranu na hłowje běharja zawinił.
Dospołnje zanurjeny je 44lětny muž swoju konsolu za widejowe hry posłužował, byrnjež so w kuchni jědź smudźiła a z woknom bydlenja hižo kur stupał. Wohnjowi wobornicy ličachu z najhóršim, jako so bydlenju bližachu, po tym zo bě jich alarmowa připrawa za kur wołała. Muž sedźeše ze słuchatkami na hłowje w bydlenskej stwě, „byrnjež hižo chětro zakurjena była“. Wobornicy přerěčachu 44lětneho, kiž drje bě natutkany, so w chorowni přepytować dać.
Marko Suchy nowej serbskej radźe přesyduje
Drježdźany (SN/at). Rada za serbske naležnosće Sakskeje je dźěłakmana. Z wobdźělenjom prezidenta Sakskeho krajneho sejma dr. Matthiasa Rößlera (CDU), serbskopolitiskich rěčnicow wšitkich frakcijow nimo CDU a za Serbow přisłušneje statneje ministerki za wědomosć, kulturu a turizm Barbary Klepsch (CDU) je so gremij wčera w Drježdźanskim sejmje skonstituował. Pjećwosobowa serbska rada je Marka Sucheho, bywšeho wjelelětneho direktora Załožby za serbski lud, za swojeho předsydu wuzwoliła. Markej Klimanej, Chróšćanskemu wjesnjanosće a čłonej Zwjazkoweho předsydstwa Domowiny, dowěrichu zamołwitosć zastupowaceho předsydy. Dalši čłonojo rady su wučerka Diana Šołćina, předsyda Domowiny Dawid Statnik a slawist Julian Nyča.
Wučerjo móža so testować dać
Drježdźany (SN). Sakska zmóžnja wšitkim wučerkam a wučerjam, kotřiž zaso na zjawnych šulach a tajkich w swobodnym nošerstwje skutkuja, so dobrowólnje na koronawirus testować dać. To zdźěla ministerstwo za kultus. Kóšty přewozmje stat, nochcedźa-li chorobne kasy to zapłaćić. Testy přewozmje domjacy lěkar. Poskićić chcedźa je wot spočatka junija. Perspektiwisce chcedźa tajke přepytowanja tež w dźěćacych dnjowych přebywanišćach zmóžnić.
Namołwjataj k zhromadnosći
Drježdźany (dpa/SN). Sakskej biskopaj Tobias Bilz a Heinrich Timmerevers namołwjataj składnostnje 75. róčnicy wuswobodźenja k solidariće. „Jeno ze zhromadnosće měr wurosće“, rěka w zhromadnej deklaraciji ewangelskeho krajneho biskopa a biskopa Drježdźansko-Mišnjanskeje diecezy k 8. meji, dnjej kapitulacije Němskeje. „Mjezsobny respekt a zrozumjenje zmóžnjatej nadźiju a přichod. Hida, zacpěwanje čłowjekow a egoizm zawinuja namóc a wójnu.“
Dawkowa škoda dramatiska
Róčnicu wuswobodźenja wopominali
Berlin/Drježdźany (dpa/SN). Po wšej Němskej su dźensa kónc Druheje swětoweje wójny a wuwobodźenje wot nacionalsocializma před 75 lětami wopominali. W nocy wot 8. na 9. meju 1945 bě fašistiska Němska w Berlinje bjez wuměnjenjow kapitulowała. Wójna bě sej hač do 60 milionow woporow žadała.
W Berlinje staj zwjazkowa kanclerka Angela Merkel (CDU) a zwjazkowy prezident Frank-Walter Steinmeier při Nowej straži – centralnym wopomnišću za wopory wójny a namócneho knjejstwa – wěnc połožiłoj. Na zarjadowanju wobdźělichu so tež prezidenća Němskeho zwjazkoweho sejma, Zwjazkoweje rady a Zwjazkoweho wustawoweho sudnistwa Wolfgang Schäuble (CDU), Dietmar Woidke (SPD) a Andreas Voßkuhle. Planowany statny akt před Reichstagom z 1 600 hosćimi dyrbjachu koronakrizy dla wotprajić. Tajki statny akt bě so dotal hakle jónu wotměł, 1995 z tehdyšim zwjazkowym prezidentom Romanom Herzogom.
Tysac skóržbow naprawow dla
Berlin (dpa/SN). Na němskich wustawowych a zarjadniskich sudnistwach su ludźo mjeztym wjace hač tysac chwatnych skóržbow přećiwo naprawam koronawirusa dla zapodali. Sudniske jednanja potrjechja na přikład winowatosć, škit za hubu a nós nosyć, zakaz zhromadźowanja, wobmjezowanje pućowanja, wobmjezowanja Božich słužbow a wotewrjenje wobchodow, nowinarjo rozprawjeja, powołujo so na Zwjazk sudnikow. „To na to pokazuje, zo so powšitkowna akceptanca za hłuboko sahace wobmjezowanja korony dla poněčim pozhubja a zo sej ludźo wjace wolóženjow přeja“, rjekny jednaćel zwjazka sudnikow Sven Rebehn.
Jeničce w Berlinje je dotal 60 skóržbow dóšło, a wšědnje dalše k tomu přińdu. „Čim dlěje wobmjezowanja pandemije dla traja, ćim dokładnišo dyrbimy pruwować, hač su hišće přiměrjene.“ Sudnicy maja wotwažować, hač njemóhli hladajo na ličbu infekcijow tež miliše naprawy kmane być strowotu ludźi skutkownje škitać.
To a tamne (08.05.20)
Jako prěni zwjazkowy kraj Mecklenburgsko-Předpomorska swojim gastronomam zmóžnja, wot jutřišeho zaso hosći witać. Zwjazk hotelow a hosćencow z toho wuchadźa, zo něhdźe třećina hosćencarjow składnosć wužije, prjedy hač smědźa turisća hakle wot 25. meje zaso do kraja přińć. Nimo toho wukazane naprawy nastupajo wotstawk mjez wopytowarjemi tak a tak k tomu powjedu, zo njebudu korčmy a hosćency tak połne kaž hewak.
Padustwa 250 lět starych a 275 000 eurow hódnych huslow dla dyrbi 41lětny dwě a poł lěće do jastwa. To je hamtske sudnistwo w Berlinje rozsudźiło. Muž bě so loni w měrcu zhromadnje z kumpanom do wysokeje šule za hudźbu zadobył a tam skerje připadnje instrument namakał. Husle předa po tym za 200 eurow njeznatemu mužej, zo móhł drogi financować. Husle su zhubjene.
Počesća wyšeho měšćanostu
Hamburg/Běła Woda (dpa/SN). Wyšemu měšćanosće Běłeje Wody Torstenej Pötzschej (Klartext) spožča lětuše, z 30 000 eurami dotěrowane Němske narodne myto. 49lětneho počesća tak za jeho zasadźenje přećiwo hidźe a pačenju towaršnosće, kaž Němska narodna załožba w Hamburgu zdźěli. „Pötzsch je stajnje zaso hidźe a hroženjam wustajeny, ale přiwšěm z ludźimi rěči, zo by zhromadnosć a žiwjensku kwalitu w swojim měsće sylnił“, załožba pisa.
Wolóženja kiwaja
Den Haag (dpa/SN). Nižozemska zběhnje wšelake wobmjezowanja zjawneho žiwjenja, kotrež běchu koronapandemije dla wukazane. Wot přichodneho tydźenja smědźa frizerojo, kosmetiske salony a masažowe praksy zaso dźěłać. Wo tym informowaše wčera ministerski prezident Mark Rutte w Den Haagu. 1. junija smědźa tež hosćency, muzeje, kina a dźiwadła pod wěstymi wuměnjenjemi wotewrěć. Šule su tohorunja zaso wočinjene. We wobchadnych srědkach pak je dale škit za hubu a nós trěbny.
Chinske eksporty přiběraja
