Ličby dale přiběraja
Berlin (SN). W Němskej je so hač do wčera wječora 134 753 ludźi z koronawirusom natyknyło. Kaž powěsćernja dpa rozprawja, je dotal znajmjeńša 3 804 ludźi na sćěhi wirusa zemrěło. Po trochowanju Instituta Roberta Kocha je 68 200 ludźi chorosć přetrało. Kaž Sakska zdźěli, bě tam wčera dotal 94 wosobow na wirus zemrěło, 3 955 je natyknjenych.
Telko woporow kaž nihdy
Washington (dpa/SN). W USA je wčera w běhu 24 hodźin telko ludźi zemrěło, kaž hišće nihdy do toho: Uniwersita Johnsa Hopkinsa je po wšěch Zjednoćenych statach cyłkownje 2 494 smjertnych padow koronawirusa dla registrowała. Dotal najwyšu ličbu smjertnych woporow běchu zawčerawšim, wutoru, ze 2 303 zličili. Wot spočatka epidemije je w USA wjace hač 28 300 ludźi na sćěhi infekcije z wirusom zemrěło. Najebać to je prezident Donald Trump připowědźił, zo chcył zjawne žiwjenje zaso normalizować, dokelž je wjeršk epidemije přewinjeny.
Zaso žane knježerstwo
Amnesty: Škitać zakładne prawa
Berlin (dpa/SN). Organizacija za škit čłowjeskich prawow Amnesty International warnuje před přiběracym wobmjezowanjom zakładnych prawow w Europje w zwisku z koronakrizu. Hižo loni běchu wotpowědne tendency wobkedźbowali. Wuwiće so dale pospěša, organizacija w swojej rozprawje zwěsća. „Škit zakładnych prawow je runje w krizach wosebje wažny“, rjekny šef němskeje wotnožki Markus Beeko.
Sakski politikar FDP Torsten Herbst ma wčera připowědźene podlěšenje najwažnišich wobmjezowanjow koronakrizy dla z pomocu wukazow za prawnisce problematiske. „Wo podlěšenju hłuboko sahacych zasahnjenjow do swobody wobydlerjow a indiwidualnych prawow njesmě jenož sakske krajne knježerstwo rozsudźić“, Herbst piše. Sakski krajny sejm měł wo tym debatować a rozsudźić.
VW zaso dźěła
Dalše srědki za kubłanišćo policije
Snadne wolóženja schwalene
Wikowarjo, hosćencarjo a cyrkej reaguja přesłapjeni na wobzamknjenja
Berlin (dpa/SN). Wobzamknjenje zwjazkoweho knježerstwa a zwjazkowych krajow k poněčimnemu wotewrjenju wobchodow w tuchwilnej koronakrizy zbudźi wšelake reakcije. „Wobchody maja po kriterijach wotewrěć, kotrež našim žadanjam njewotpowěduja“, rjekny hłowny jednaćel Berlinsko-braniborskeho zwjazka wikowarjow Nils Busch-Petersen. Zwjazk je sej stajnje žadał, zo měli rozsudy wěcownje wopodstatnjene, transparentne a njediskriminowace być. „Tole njeje so stało.“
Zwjazk a kraje běchu so wčera na to dojednali, powšitkowne wobmjezowanja zjawneho žiwjenja hač do 3. meje podlěšić. Potom smědźa wobchody z předawanskej płoninu hač do 800 kwadratnych metrow zaso wotewrěć. Wjetše wobchody dyrbja dale zawrjene wostać, štož trjechi wosebje wulke kupnicy w stolicy a wulkoměstach. „Jich ćerpjenje je nětko podlěšene“, rjekny Busch-Petersen.
Tróšku normality
To a tamne (16.04.20)
Wopity muž w zaječim kostimje je w sewjerorynsko-westfalskim měsće Unna z priwatnym jutrownym wohenjom hnydom dwójce zasadźenje policije zawinował. Jako zastojnicy při wrotach kłapachu, jim 64lětny w zaječim kostimje a z košom w ruce wočini, w kotrymž bě bleša palenca. Muž dyrbješe sylneho kura dla woheń hašeć. Tři hodźiny pozdźišo so woheń znowa paleše, bleša palenca bě wupita. Nětko dyrbi wón pokutu płaćić.
Jězdźo ze swojim rolatorom po zahrodźe je 99lětny Brita Tom Moore na internetnej stronje dźesać milionow eurow zezběrał. Pjenjezy chce wón statnemu strowotniskemu systemej NHS přewostajić. Moore bě připowědźił, zo chcył hač k stoćinam zahrodu njedaloko Cambridge sto króć wobkružić. Wuraznje dźakowaše so wón lěkarjam a hladarjam, kotřiž „sej tute pjenjezy zasłuža“.
Ličby korony dale přiběrace
Berlin (SN). W Němskej je so hač do wčera wječora 128 400 ludźi z koronawirusom natyknyło, to je nimale 2 000 wjace hač dźeń do toho. Kaž powěsćernja dpa rozprawja, je dotal znajmjeńša 3 217 ludźi na sćěhi wirusa zemrěło. Po trochowanju Instituta Roberta Kocha je 68 200 ludźi chorosć přetrało. W USA je w běhu 24 hodźin na wšě 2 228 pacientow na koronawirus zemrěło. Kaž Sakska zdźěli, bě tam wčera dotal 74 wosobow na wirus zemrěło, 3 915 je natyknjenych.
Wočakuja ćežku krizu
Washington (dpa/SN). Koronawirusoweje pandemije dla dyrbi hospodarstwo z dramatiskimi stratami ličić. Mjezynarodny měnowy fonds IWF wočakuje najraznišu globalnu hospodarsku krizu minjenych nimale sto lět. Globalny hospodarski wukon po jeho wobličenjach lětsa wo tři procenty woteběra, w europasmje samo wo 7,5 procentow, IWF w swojim najnowšim posudku twjerdźi. Ličba bjezdźěłnych w tym zwisku drje raznje přiběra. W januaru bě IWF hišće hospodarski rozmach třoch procentow wěsćił.
Afriskim krajam pomhać
