Merkel: Žane hłosy CDU za Lěwicu
Berlin/Erfurt (dpa/SN). Po skomolenych wólbach ministerskeho prezidenta w Durinskej su politiske strony dźensa wo dalšim postupowanju wuradźowali. Dopołdnja schadźowaštej so prezidij a předsydstwo CDU w zwjazkowej stolicy. Při tym dźěše w prěnim rjedźe wo to, kak měli so zapósłancy CDU w Durinskim krajnym sejmje zadźeržeć, hdyž Bodo Ramelow (Lěwica) znowa k wólbam ministerskeho prezidenta nastupi.
Napjeće wočakowachu wuprajenja wjele diskutowaneho předsydy durinskeje CDU Mika Mohringa. Dotal je njejasne, hač je wón ke konsekwencam zwólniwy. Runočasnje zetkachu so w Erfurće zastupnicy Lěwicy, SPD a Zelenych, kotřiž prócuja so wo mjeńšinowe knježerstwo.
Minjenu srjedu běchu w Erfurtskim krajnym sejmje politikarja FDP Thomasa Kemmericha za noweho ministerskeho prezidenta wuzwolili, tež z hłosami CDU a AfD. Kemmericha běchu po tym masiwnje kritizowali, dokelž njeby wón wólby bjez hłosow AfD dobył. Dźeń pozdźišo wón wotstupi, je pak aktualnje přeco hišće jednaćelsce w zastojnstwje.
Změna klimy w Europje widźomna
Brüssel (dpa/SN). Prawidłowne zapławjenja w Rotterdamje, Le Havre abo Londonje, k tomu wjace lěsnych wohenjow, suchota a wichory. Sćěham klimoweje změny njemóže so po posudku wobswětoweje agentury EU w Europje nichtó dlěje wuwinyć. Staty EU dyrbjeli so na to nastajić a zdobom wšitko činić, dalšemu woćoplenju zemje zadźěwać, agentura w Brüsselu zdźěli. „Klimowa změna so hižo nětko pokazuje a změje přichodnje hišće razniše wuskutki, samo hdyž bychu globalne prócowanja k zniženju wustorka klimje škodźacych płunow wuspěšne byli“, rjekny zarjad, kiž ma swoje hłowne sydło w Kopenhagenje.
Agentura je za přichodne lětdźesatki wjacore scenarije zdźěłała. Po tym bychu wuskutki kaž přiběracy staw wody w morjach a z tym zwjazane zapławjenja na pobrjohach kaž tež ekstremne wjedrowe połoženja kaž suchoty, wichory a lěsne wohenje wo wjele hórše byli, čim wjace klimje škodźacych płunow so do atmosfery dóstanje. W Němskej liča z přiběracej suchotu a z wjace lěsnymi wohenjemi.
Třo kandidaća za biskopa
Ewangelska krajna cyrkej Sakskeje woli kónc měsaca noweho nawodu
Drježdźany (dpa/SN). Ewangelska krajna cyrkej Sakskeje hotuje so na wólby noweho biskopa. Minjeny tydźeń su so třo kandidaća na zjawnym forumje w Drježdźanach zjawnosći předstajili. Při tym su so superintendent Andreas Beuchel (56) z Mišnja, Ulrike Weyer (46) z Plauena kaž tež wyši krajny cyrkwinski rada Tobias Bilz (55) za to wuprajili, debatu wokoło dotalneho biskopa Carstena Rentzinga sprawnje a na wotewrjene wašnje předźěłać. Wotstup Rentzinga bě w nutřkocyrkwinskich kruhach a w zjawnosći kontrowersne diskusije zbudźił.
To a tamne (10.02.20)
Psa wotškódnić ma danske lětanske předewzaće Danish Air Transport (DAT). Pozadk njewšědneho padu je směrnica EU, po kotrejž dyrbja pasažěrow wotškódnić, hdyž je lět wupadnył. Dokelž je tomu tak było, je předewzaće mužomaj wotškódnjenje wupłaćiło. Wonaj měještaj psa sobu a žadataj sej tež za njeho wotškódnjenje. Směrnicy EU rěča jeno wo „pasažěrach“ a nic wo tym, hač jedna so wo čłowjeka abo zwěrjo.
Po puću k słóncu je wot dźensnišeho nowa swětnišćowa sonda. „Solar Orbiter“ je rano w Cape Canaveralu w staće USA Florida wotlećał. Je to projekt europskeje swětnišćoweje agentury ESA. Solar Orbiter je nimale 1,5 miliardow eurow płaćił. Z nim lubja sej nowe dopóznaća wo 150 milionow kilometrow zdalenym słóncu. Sonda wobsteji z wosebitych maćiznow, kotrež wulku horcotu znjesu.
Namjety w parlamenće předstajić
Nowa komisija EU dźěła. Tak bě čas zrały, zo bychu zastupjerjo europskeje wobydlerskeje iniciatiwy Minority SafePack swoje žadanja nastupajo podpěru rěčneje a kulturneje mnohotnosće a za škit awtochtonych mjeńšin w Brüsselu rozłožili a 1 128 385 wobkrućenych podpismow předpołožili.
Flensburg/Brüssel (SN/at). „Nadźijamy so, zo přichodne šěsć měsacow trěbnu podpěru a přeswědčenje přinjesu a zo Europska komisija na kóncu wobzamknje, na zakładźe našich namjetow legislatiwne naprawy zawjesć“, rjekny Loránt Vincze, prezident Federalistiskeje unije europskich narodnych mjeńšin (FUEN) a čłon Europskeho parlamenta, předwčerawšim na nowinarskej konferency w Brüsselu. Ta wotmě so po zetkanju zastupjerjow iniciatiwy Minority SafePack (MSPI) z Věru Jourovej, wiceprezidentku komisije EU a jako komisarka za hódnoty a transparencu zamołwitej za system europskeje wobydlerskeje iniciatiwy, a z komisarku EU za inowaciju, slědźenje, kulturu, kubłanje a młodźinu Mariyju Gabriel (SN informowachu).
Dojednanje renty dla
Berlin (dpa/SN). Po dołhej ćahańcy chce zwjazkowe knježerstwo zakładnu rentu za mało zasłužacych w přichodnych tydźenjach zwoprawdźić. Minister za dźěło Hubertus Heil (SPD) a strowotniski minister Jens Spahn (CDU) staj „poslednje wotewrjene prašenja“ w naćisku zakonja zrjadowałoj, kaž z Berlina rěka. Kabinet so přichodnu srjedu z tym zaběra. Ministraj staj so na to dojednałoj, připłatk podźělnje hižo po 33 dźěłowych lětach wupłaćić, po 35 lětach w połnym wobjimje.
Buttigieg před Sandersom
Washington (dpa/SN). Po dny trajacym dlijenju su demokraća w zwjazkowym staće USA Iowa wšitke wólbne wobwody wuličili. Po tym leži bywši měšćanosta Pete Buttigieg snadnje před senatorom Berniejom Sandersom, zdźěla demokratiska strona. Třeće městno zaběra senatorka Elizabeth Warren. Techniska pana bě při wólbach kandidata demokratow za prezidentske wólby wulki chaos a dlijenje zawiniła.
Nawoda teroristow morjeny
Namócnosće mjez Palestinjanami a israelskimi wojakami w Kraju ...
CDU chce nowozapočatk w Durinskej
Erfurt (dpa/SN). Po skandalu při wólbach durinskeho ministerskeho prezidenta chce CDU w Durinskej móžnosće parlamentariskeho nowozapočatka pruwować. Dyrbjało-li to zwrěšćić, su nowowólby njewobeńdźomne, kaž je předsydka CDU Annegret Kramp-Karrenbauer minjenu nóc po wjacehodźinskich wuradźowanjach w Erfurće zdźěliła. To rěka, zo chcyła wona durinskemu krajnemu předsydźe Mikej Mohringej zmóžnić, bjez nowowólbow a z nimi zwjazanych wočakowanych stratow za křesćanskich demokratow wuslědk wólbow ministerskeho prezidenta korigować. CDU bě srjedu zhromadnje z AfD politikarja FDP Thomasa Kemmericha do zastojnstwa ministerskeho prezidenta woliła, štož je wótre kritiki zbudźiło. Prezidij CDU bě sej hišće samsny dźeń nowowólby žadał. Kemmerich je wčera, dźeń po wuzwolenju, swój wotstup připowědźił. Do toho bě zwjazkowy předsyda FDP Christian Lindner do Erfurta přijěł a z nim rěčał.
Ludźo so noweho wirusa njeboja
Köln (dpa/SN). Najwjetši dźěl wobydlerjow Němskeje so corona-wirusa njeboji. Dźewjeć z dźesać woprašanych (89 procentow) so njestarosći, zo so sami abo jich swójbni z wirusom natyknu. To je wuslědk naprašowanja instituta infratest dimap w nadawku telewizijneho sćelaka ARD. Jenož kóždy dźesaty ma strach noweho wirusa dla za wulki (sydom procentow) abo jara wulki (tři procenty). Za naprašowanje su so minjenu póndźelu a wutoru cyłkownje 1 003 wólbokmanych w Němskej telefonisce prašeli.
Zwěsćili tež su, zo ludźo zamołwitym zarjadam a strowotniskim institucijam w Němskej hladajo na wirus dowěrjeja. Na wšě 82 procentow woprašanych je sej wěstych, zo maja zamołwići połoženje pod kontrolu. Jeno 14 procentow to hinak widźi a měni, zo tomu tak njeje.
Po cyłym Zwjazku zwěsćichu dotal 13 dopokazanych padow corona-wirusa, jědnaće z nich w zwisku z bayerskej firmu Webasto. Natyknjena žona z Chiny bě zawod wopytała a tak wirus němskim kolegam dale dała.
To a tamne (07.02.20)
Drogi w hódnoće cyłeho miliona eurow wučušlili su wosebje kubłane psy cłownikow na Frankfurtskim lětanišću. Wopojny jěd bě w jědźi za ćěšenki schowany. Prěni kurěr z Južneje Ameriki měješe dwanaće kilogramow w kófrje, tamny samo pjatnaće. Kokain bě we wjacorych tyzach schowany. Zastojnicy dźiwachu so hoberskeho mnóstwa dla. Telko drogow namakaja hewak jenož we wulkich „posyłkach“. Wobeju kurěrow su zajeli.
Z chorobnej sotru stać chcyła je so first lady Němskeje Elke Büdenbender jako młodostna. To je wona nowinarjam přeradźiła. Za přikład brała bě sej dźensniša mandźelska zwjazkoweho prezidenta Franka-Waltera Steinmeiera swój čas kmótru, kotraž w tym powołanju dźěłaše. Hižo zahe bě wona přeswědčena, zo tež holcy dobre wukubłanje trjebaja. Stała pak je so Büdenbender ze sudnicu.
