Merkel z wuslědkom spokojom
Wjerškowe zetkanje wo wuchodźe Ukrainy skónčeny
Paris (dpa/SN). Po skónčenju wjerškoweho zetkanja nastupajo konflikt na wuchodźe Ukrainy je hosćićel Emmanuel Macron wuspěchi w dołho dlijacym so měrowym procesu wuzběhnył. Z přiměrom, cofnjenjom wojerskich jednotkow a wuměnu jatych je wjeršk prěni króć po třoch lětach we wažnych dypkach konkretne wuslědki docpěł, rjekny francoski statny prezident wčera wječor w Parisu zastupnikam medijow.
Po něhdźe wosom hodźin trajacych jednanjach běchu so wobdźělnicy wjerška wčera na to dojednali wožiwić měrowy proces na wuchodźe Ukrainy, hdźež ukrainske jednotki přećiwo proruskim separatistam wojuja. Tak chcedźa přiměr hač do kónca lěta přesadźić. Konflikt je „wotewrjena rana wosrjedź Europy“, Macron skoržeše.
To a tamne (10.12.19)
Z pisanej barbu pomórali su njeznaći stronsku centralu SPD w Berlinje. Swědcy běchu wobkedźbowali, kak dwě wosobje hłowny zachod Domu Willyja Brandta w měšćanskim dźělu Kreuzberg ze žołtej, čerwjenej a zelenej barbu popryskatej. Potrjechena je płonina 30 kwadratnych metrow. Jako policija dojědźe, běštaj so skućićelej hižo zminyłoj.
Drje najwjetšu zběrku whiskyja swěta chcedźa w Šotiskej přesadźować. Wjace hač 3 900 blešow družiny Single Malt Scotch móhło nimale dźesać milionow eurow wunjesć, kaž awkciski dom w šotiskim Perthu zdźěla. Zběrka słuša předewzaćelej z USA, kiž je lěta 2014 zemrěł. Čas žiwjenja bě wón stajnje zaso w Šotiskeje whisky kupował. W swojim domje w staće USA Colorado měješe jeničce za bleše wuhotowanu rumnosć, kotruž jako „pub“ hordźe prezentowaše. Jeho swójba chce zběrku přesadźować dać.
Prawicarstwu so spřećiwjeć
Drježdźany (B/SN). Ewangelska cyrkej w Němskej (EKD) chce prawicarske tendency w swójskim sobustawstwje přepytować. To praji prezeska synody EKD Irmgard Schwaetzer. Synoda bě so hižo před lětami z tematiku zaběrała. „Dyrbimy wědźeć, hač tež přisłušnicy cyrkwje prawicarske nahlady zastupuja a kak móžemy so z tym rozestajeć.“ Nimo toho ma so etnografisce wuslědźić wobchad cyrkwinskich wosadow ze socialnopolitiskimi a kulturnymi wužadanjemi. Z prawicarstwom so rozestajeć je nadawk kóždeho křesćana.
Antisemitizm dale prezentny
Rozsudny tydźeń konferency
Madrid (dpa/SN). Za klimowu konferencu zahaji so dźensa druhi a rozsudny tydźeń. Dopołdnja je so šwedska klimowa aktiwistka Greta Thunberg ze swojej němskej sobuwojowarku Luisu Neubauer za konferencu w španiskej stolicy Madridźe připowědźiła. Wot Thunberg załožene hibanje Fridays for future bě minjeny pjatk z dalšimi organizacijemi w Madridźe demonstrowało a sej wjace spěšnosće nastupajo škit klimy žadało. Wot jutřišeho chcedźa na runinje ministrow wuradźować.
Wjace bróni předawali
Stockholm (dpa/SN). Wodźace brónjenske koncerny swěta su loni wo nimale pjeć procentow wjace bróni a wojerskich posłužbow předali hač lěto do toho. To zwěsća Stockholmski měrowy slědźenski institut Sipri w swojej kóždolětnej rozprawje. Na prěnim městnje steja koncerny USA, kotrež su wobroty wo wjace hač sydom procentow stopnjowali. W statistice njejsu brónje z Chiny wobkedźbowane, dokelž nimaja wo nich žane spušćomne ličby, kaž institut zdźěla.
Wulkan sej wopor žadał
Šulerki a šulerjo 12. lětnika Delnjoserbskeho gymnazija Choćebuz ...
Železnica nochce žane dalše čary zawrěć
Berlin (dpa/SN). Němska železnica nochce po swójskich wuprajenjach žane dalše železniske čary wjace zawrěć a město toho wjacore zawrjene zaso wožiwić. „Skónčimy zawrjenje a smy wosebitu dźěłowu skupinu zasadźili, kotraž ma aktiwizowanje zawrjenych čarow přihotować“, zdźěli rěčnik železnicy minjeny pjatk w Berlinje. Hač do nalěća chcedźa lisćinu čarow zestajeć, wo kotrychž dyrbja ze Zwjazkom a krajemi rěčeć.
Nowy wjeršk Ukrainy dla
Paris (dpa/SN). Němska a Francoska chcetej na dźensnišim wjerškowym zetkanju w Parisu strašny konflikt na wuchodźe Ukrainy wotputać. Francoski prezident Emmanuel Macron a zwjazkowa kanclerka Angela Merkel (CDU) chcyštaj so w Élyséejowym palasće z ruskim prezidentom Wladimirom Putinom a toho ukrainskim kolegu Wolodymyrom Zelenskym zetkać. Wjeršk podobneho razu běchu naposledk před třomi lětami organizowali. Na wuchodźe Ukrainy wojuja ukrainscy wojacy přećiwo separatistam.
Němski zwjazkowy wonkowny minister Heiko Maas (SPD) je do zetkanja wšitkich wobdźělenych namołwjał, k rozrisanju konflikta přinošować. Prezident Zelenskyj je ze swojimi zmužitymi kročelemi nowu dynamiku do procesa přinjesł, rjekny Maas nowinarjam. „Nětko dyrbjała so tež Ruska hibać. Trěbna je ruska wotmołwa“ na namjety Ukrainy.
Putin a Zelenskyj so w francoskej stolicy prěni króć wosobinsce zetkataj. Hižo to maja ze stron francoskeho hosćićela za wulki wuspěch.
Unija žadanja SPD wotpokazuje
Reakcije na kónctydźenski stronski zjězd socialdemokratow
Berlin (dpa/SN). Wodźacy zastupnicy CDU a CSU su SPD po jeje stronskim zjězdźe warnowali, z nowymi žadanjemi wulku koaliciju poćežować. Wo koaliciskim zrěčenju nochcedźa znowa jednać, za naprawy k „samozaběrje“ njeje chwile, rjekny generalny sekretar CDU Paul Ziemiak po telefoniskej konferency najwušeho nawodnistwa unije wčera wječor w Berlinje. Na njej běchu so nimo zwjazkoweje kanclerki Angele Merkel (CDU) tež stronska předsydka Annegret Kramp-Karrenbauer (CSU) a Markus Söder (CSU) wobdźěliłoj.
To a tamne (09.12.19)
Horce wino woptał? Natutkany šup je so wčera po Erfurtskich dohodownych wikach motał. Małe zwěrjo bě „wočiwidnje alkoholizowane“, zdźěli rěčnik policije. Test alkohola njejsu přiwšěm žadyn přewjedli. Wohnjowi wobornicy dowjezechu šupa do zwěrjatownje. Podobny pad bě hižo loni w lěću kedźbnosć zbudźił. Tehdy běštaj jěžej rozkidany liker laptałoj a na to po Erfurće błudźiłoj.
Něhdźe 360 zmužitych je so wčera na mjeztym 20. Mikławšowym płuwanju w šwicarskim Zürichu do wosom stopnjow zymneje rěki Limmat zwažiło. Mnozy běchu w Mikławšowym kostimje a mějachu čerwjenu čapku na hłowje. Ličba wobdźělnikow bě po informacijach zarjadowarja rekordna. Płuwarjo dyrbjachu 111 metrow we wodźe zmištrować. Zarjadowanje słuži dobremu skutkej: Wobdźělenski popłatk a dary sponsorow wunjesechu něhdźe 5 500 eurow.
Brinkhaus žada sej jasnosć
Berlin (dpa/SN). Nawoda frakcije CDU/CSU w zwjazkowym sejmje Ralph Brinkhaus žada sej wot SPD jasnosć wo přichodźe wulkeje koalicije. „Stabilne politiske wobstejnosće su wažne za Němsku, rjekny politikar CDU krótko do zahajenja zjězda SPD nowinarjam. „Wěčne personalne diskusije a njewěstosć wo přichodźe koalicije su to poslednje, štož trjebamy.“ Na zjězdźe nochce SPD wo skónčenju wulkeje koalicije wothłosować, chce pak z CDU wo polěpšenjach w koaliciskim zrěčenju jednać, kaž rěkaše.
Demonstruja za klimu
Madrid (dpa/SN). Z wulkozarjadowanjom w centrumje Madrida chcedźa demonstranća dźensa wječor na wobdźělnikow swětoweje klimoweje konferency ćišć wukonjeć. Na protestnym pochodźe statysacow ludźi wobdźěli so tež šwedska klimowa aktiwistka Greta Thunberg. Demonstranća chcedźa zamołwitych, kotřiž so na dwaj tydźenjej trajacej konferency wobdźěleja, pohnuć, zo měli so raznišo na dobro klimy zasadźeć.
Stawki wobchad dale haćili
