Berlin (dpa/SN). Nawoda krajneje skupiny bayerskeje CSU w Němskeho zwjazkowym sejmje Alexander Dobrindt je SPD před tym warnował, přewulke žadanja hladajo na nowu wulku koaliciju z uniju stajeć. „Njeje móžno, zo dwacećiprocentowska strona sto procentow swojich žadanjow­ přesadźa“, rjekny Dobrindt nowinarjam do wčera­ zahajaceje so klawsury CSU w bayerskim klóštrje Seeon. „Chcu koaliciju z SPD. Strona pak dyr­bjała so dźěłowym wikam, wěstoće a modernizaciji wěnować a so socialistiskeho sonjenja wzdać.“

Dobrindt žadaše sej dawkowu reformu na dobro swójbow a srjedźneho stawa. W prašenju připućowanja swójbow ćěkancow do Němskeje chce CSU kruta wostać. Nimo toho sej Dobrindt žada, samostejacych a pječa njepołnolětnych ćěkancow přepruwować. Integracija wu­krajnikow njesmě towaršnosć přežadać.

Dźiwadłowe hrimanje słuša kruće k zymskej klawsurje CSU, kotraž traje hač do jutřišeho w klóštrje Seeon nad Chiemskim jězorom. Zo runa so tele hrimanje lětsa we wšelakim nastupanju skerje tokanju, zwisuje z předrozmołwami wo móžnej knježerstwowej koaliciji, kotrež CDU, SPD a CSU njedźelu zahaja. Kaž pak staj so šef krajneje skupiny CSU w zwjazkowym sejmje Alexander Dobrindt a generalny sekretar strony Andreas Scheuer nastupajo politiske ćežišća jeničkeho hišće móžneho knježerstwoweho partnera SPD minjene dny zwurazniłoj, ma wěstu ironiju na sebi. Wosebje Dobrindt žanu přičinu za wulku hubu nima. Jako zwjazkowy minister za wob­chad a digitalnu infrastrukturu w dotalnym knježerstwje je wón wšozwjazkowu digitalizaciju zaspał. Bayerski wid přeco najskromniši njeje, a politiske flacowstwo móže tež do wóčka hić. W času knježerstwoweje wakancy pak politiske kašpor­kowe dźiwadło njetrjebamy. Axel Arlt

... dokelž jedna so wo směrodajne standardy, kotrež europska mjeńšinowa politika cyle nuznje trjeba. Myslu přede- wšěm na tajke mjeńšiny, kotrež maja porno Serbam hišće dlěši puć před sobu k towaršnostnemu připóznaću, zo bychu wo swojich naležnosćach tež sobu abo sami postajeć móhli. Sformulowane zaměry iniciatiwy hodźa so jeno z rosćacej solidaritu mjez mjeńšinami docpěć. Přeco znowa dyrbimy tuž w zjawnosći na potrjebu jednanja w tymle wobłuku skedźbnjeć. Tónle zaměr hižo kóždy ze zběranjom podpismow podpěruje, tež, hdyž hranicu miliona skónčnje snano tola­ njedocpějemy. W tymle zmysle je kóždy hłós dobytk.

Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Fede­ralistiskeje unije europskich narodnych mjeńšin FUEN Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mai­lowu adresu: .

Dospołnje nimokulił je so pospyt wodźerja w Mannheimje, ze swojim wulkim nakładnym awtom do wuskeje hasy wotbočić: Cyłkownje 23 parkowacych awtow wón při tym wobškodźi. Po informacijach policije je so Lkw při wotbočenju wjacorych awtow šmórnył. Jako spyta šofer wróćo storčić, sta so to samsne. Policija muža skónčnje zadźerža. Nakładne awto bě za jězdnju prosće přešěroke. Nastata škoda wučinja 20 000 eurow.

Milion eurow drohu blešu wodki je njeznaty w Kopenhagenje pokradnył. Při tym jedna so wo přewšo rědki eksemplar, kiž steješe w priwatnym składźe. Wobrazy wěstotneje kamery pokazuja zakukleneho muža, kiž blešu spakosći. Wona je tak droha, dokelž wobsteji z třoch kilogramow złota a třoch kilogramow slěbra. Bleša, požčonka z Ruskeje, njebě zawěsćena.