Podstupim (SN/at). Krajny sejm Braniborskeje podpěruje europsku iniciatiwu Minority SafePack. Wón přihłosuje jeje wuchadźišću a namołwja Europsku uniju, škit přisłušnikow narodnych a rěčnych mjeńšin ze zaměrnymi naprawami polěpšić a z nich wuchadźacu kulturnu a rěčnu mnohotnosć w EU zachować. To čitamy w nadfrakciskim wobzamknjenju – wot SPD, CDU, Lěwicy a Zwjazka 90/Zelenych zapodatym –, kotrež je krajny sejm minjeny štwórtk (SN rozprawjachu) jednohłósnje schwalił. Požadane na­prawy měli so na wobłuki regionalne a mjeńšinowe rěče, kubłanje a kulturu, regionalnu politiku, wobdźělenje, runosć, awdiowizuelne medijowe słužby a dalše medialne wobsahi kaž tež re­gionalne spěchowanje wusměrić. Krajne knježerstwo měło iniciatiwu podpěrać a so w Zwjazku kaž tež w EU za to zasadźeć, zo so mjeńšinowe zajimy zakótwja a přesadźa.

Berlin (dpa/SN). Strowotniski fachowc SPD Karl Lauterbach ma w koaliciskich jednanjach dale njerozrisane prašenje dwuklasoweho medicinskeho zastaranja w Němskej za přewšo wažne. „Smy w tym prašenju pod wulkim ćišćom“, rjekny wón dźensa w telewiziji ARD. Socialdemokraća chcyli přesadźić, zo so lěkarske honorary při lěkowanju kasowych a priwatnych pacientow wurunaja. Lauterbach je optimistiski, zo so SPD z CDU a CSU w tej naležnosći dźensa tola hišće dojedna. Poprawom chcychu wšitcy wobdźěleni jednanja k wutworjenju noweje wulkeje koalicije kónc tydźenja wotzamknyć. Hižo zwoprědka pak běchu dwaj přidatnej dnjej zaplanowali.

Mjeztym je předsyda durinskeje CDU Mike Mohring planowane woprašowanje čłonow SPD wo koaliciskim zrěčenju jako „njepraktikabelne“ kritizował. To by cyły proces dale dlijiło, hladajo na to, zo je Němska mjeztym dlěje hač štyri mě­sacy bjez knježerstwa, rjekny Mohring nowinarjam. Nowe knježerstwo dyrbjało so spěšnje wutworić.

Jako so sobotu po swjedźenskej Božej mši na­ česć Alojsa Andrickeho w Radworju Drježdźansko-Mišnjanskeho biskopa Heinricha Timmereversa prašach, z kajkimi zaćišćemi so do Drježdźan nawróći, to wón rjekny: „Najbóle mje hnuje, hdyž widźu, zo maće Alojsa Andrickeho woprawdźe za swojeho.“ To dyrbjach na zbóžnoprajenje z Radworja pochadźaceho kapłana lěta 2011 před Drježdźanskej Dwórskej cyrkwju myslić. Tam běchu katolscy wě­riwi to hižo raz nazornje dopokazali. Po­dobnje bě nětko w Radworju. Čłowjek so dźiwa, kelko potenciala móže naš mały ludźik mobilizować, štož płaći předewšěm za Radworsku wosadu. Hač spěwarjo, dujerjo, dźěći pěstowarnje a nic naposledk pilni pomocnicy, kotřiž na farskej łuce ludźi z jědźu a napojemi zastarachu, wšitcy běchu na swoje wašnje wobdźěleni, zo by so swjedźeń poradźił. To móžeš jenož rjec: Respekt! Marko Wjeńka

Chětro wopity a bjez jězbneje dowolnosće je muž w sewjerorynsko-westfalskim Hennefje na policajsku stražu přijěł, zo by za zhubjenej wosobu pytać dał. Zastojnicy čujachu alkohol, naměrichu pola­ 40lětneho 1,46 promilow a chcychu jeho jězbnu dowolnosć sćazać. Muž pak njeměješe žanu při sebi a chcyše z awtom zaso wotjěć. Tomu pak policisća zadźěwachu. Nětko dyrbi muž ze skóržbu jězdźenja pod wliwom alkohola dla ličić.

Z nadróžnej zawěru su policisća w delnjosakskim Nordhornje dźěsću po puću do žiwjenja pomhali. Staršej dyrbještaj jězbu z awtom do porodoweje kliniki přetorhnyć, dokelž so porod připowědźeše. Alarmowani zastojnicy na to dróhu zaraćichu. Bjezposrědnje po tym zo chorobne awto dojědźe, so dźěćko narodźi. Jemu a maćeri so derje dźe. Wobeju dowjezechu do chorownje.