Rukajcy kradnyłoj staj mužej w kupnicy w Braunschweigu, prawdźepodobnje kruteho zmjerzka dla. Wšako pokazowaše termometer pod minus dźesać stopnjow. Kupnicowy detektiw bě wobkedźbował, kak pakostnikaj rukajcy do nachribjetnika tykataj, a zawoła policiju. Při kontroli nachribjetnika 18lětneho namakachu nimo toho grat za wotstronjenje wěstotnych etiketow. Paduch chětro wokoło so biješe, jeho kumpan móžeše ćeknyć.

Klawn je zhromadnje z policiju w Ludwigshafenje dwaj ćeknjenej cirkusowej cebraj přesćěhał a skónčnje zaso popadnył. Wobydlerjo běchu policiju informowali, zo zwěrjeći po měsće běhatej. Tak přijědźe pjeć policajskich awtow. Zhromadnje z klawnom namakachu zastojnicy cebraj při haćiku, hdźež so paseštej. W kolonje policajskich jězdźidłow přewodźachu jej wróćo do cirkusa.

Drježdźany (SN/MiR). Kraj Braniborska skrući strukturu serbskich multiplikatorow w zarjadnistwach dwurěčnych wo­krjesow (SN rozprawjachu). Na tym měła sej Sakska přikład brać. Tole zwuraznja serbski zapósłanc a mjeńšinopolitiski rěčnik frakcije Lěwicy w Sakskim krajnym sejmje Hajko Kozel. W třoch delnjołužiskich wokrjesach a bjezwokrjesnym měsće Choćebuzu maja społnomócnjeni za serbske naležnosće hłownohamtsce dźěłać, kotrychž kraj zapłaći. Kaž Kozel rjekny, „njeje tež w Sakskej mjeńšinowa politika bjez wulkeho angažementa komunalnych serbskich społnomócnjenych předstajomna. Njemóžeš jón w čestnym zastojnstwje abo z poł dźěłowym městnom zdokonjeć.“ Zapósłanc skedźbni na to, zo prócujetaj so we wo­krjesomaj Zhorjalc a Budyšin sobudźěłaćerjej ze štwórć resp. poł městnom wo naležnosće Serbow. „Tuž budu po braniborskim přikładźe zhromadnje ze swojej frakciju na Sakski krajny sejm samsne žadanja wo změnu zakonja stajić, ručež parlament serbsku rozprawu wobjedna.

Brüssel (dpa/SN). Społnomócnjeny Europskeje unije za jednanja z Wulkej Britaniskej wo wustupje kraja z EU Michel Barnier je dźensa w Brüsselu prěni naćisk zrěčenja wo brexiće předstajił. W nim su najwažniše prašenja dźělenja kaž tež planowana přechodna faza po klětušim wustupje zrjadowane. W decembru běštej so EU a Wulka Britaniska na najwažniše dypki dojednali. Přiwšěm su mnohe problemy njerozrisane. Tak sej EU žada, zo London tež w přechodnym času přinoški płaći, byrnjež hižo žane prawo njeměł w gremijach EU sobu rěčeć.

Přiměr wospjet přetorhnjeny

Damaskus (dpa/SN). Hižo druhi dźeń za sobu su w syriskej zběžkarskej kónčinje wuchodna Ghuta pjeć hodźin trajacy přiměr zarjadowali, zo móhli ciwilisća kónčinu wopušćić. Krótko do zahajenja přiměra w 9 hodź. bě hišće k wojowanjam mjez zběžkarjemi a syriskim wójskom dóšło, kaž aktiwisća rozprawjeja. Wot Ruskeje wukazany přiměr bu wčera wospjet wot wojowanjow přetorhnjeny. Při tym je pječa dźěćo žiwjenje přisadźiło. Zběžkarjo a armeja sej mjezsobnu ­winu na tym wumjetujetej.

Po masakru zaso w šuli

Kryjer sćinowych třěchow Andreas Geldschläger (prědku) je ze swojimaj sobudźěłaćerjomaj njedaloko mecklenburgsko-předpomorskeho Bartha tele dny sćinu žnjał. Wona je lońšeho włóžneho lěća dla wosebje dobreje kwality. Sćinu plahuja tam na 25 hektarach a liča lětsa z 30 000 walčkami. Foto: pa/Bernd Wüstneck