Auerbach (dpa/SN). Pózdnje zmjerzki, zliwki a krupy: Najebać někotre wjedrowe ekstremy su ratarjo w Sakskej lětsa dosć dobre žně žita zmištrowali. Połoženja na wikach dla pak so starosćeja. Prezident zwjazka ratarjow Torsten Krawczyk rěčeše na wčerawšim předstajenju ratarskeje bilancy w vogtlandskim Auerbachu wo „zruinowacych płaćiznach“: Ratarjo njemóža sowje žito předawać, dokelž su składy wikowarjow połne, abo płaćizny tak niske, zo burja scyła wjace předawać nochcedźa. Krawczyk rěči wo srěnich abo snadnje podpřerěznych žnjach. Něhdźe 66,6 decitonow na hektar su ratarjo přerěznje z polow přiwjezli. To je mjenje hač loni. Rěpik je krupow dla wosebje ćerpjeł. Wuslědk žnjow rěpika, kotryž wobsahuje přerěznje 29,5 decitonow, je słaby.

Wulki problem wostanje žito z wuchodneje Europy, kotrež płaćizny tłóči. Su-li burja před lětomaj za tonu dobreje pšeńcy 300 eurow dóstali, bě to naposledk jenož hišće 240 eurow z woteběracej tendencu. Poprawom bychu płaćizny chlěba a całtow nětko woteběrać dyrbjeli. Dalše wužadanje je změna klimy. Sakscy ratarjo wobhospodarjeja něhdźe 700 000 hektarow.

Z pastwy ćeknjene kruwy su policisća w Mišnjanskim wokrjesu njedaloko busoweho zastanišća wuhladali. Zastojnicy so wo to postarachu, zo zwěrjata dale po dróze njeběhaja. Wočiwidnje su kruwy skóncowaneho płota dla z pastwy twochnyli. Policisća wobsedźerja wuslědźichu. Tón howjada wróćo na pastu dowjeze a płót zwuporjedźa. Wěcna škoda njeje nastała.

Wobsedźer psa je w schleswigsko-holsteinskim Schwarzenbecku muža nadběhował, kiž so ze swojej kóčku při powjazu wuchodźowaše. Do toho bě psyk, kiž njebě přiwjazany, kóčku atakěrował. Na to so mužej wurěčowaštaj. Wobsedźer psa druheho muža biješe. Jako tón padny, jemu muž do hłowy kopny. Psyk jeho nimo toho do ruki kusny a spytaše jemu zdobom do hłowy kusnyć. Na to so muž z psom zminy. Policija nětko za nim pyta a prosy swědkow, so přizjewić.

Berlin (dpa/SN). Z tři dny trajacym wopytom w Egyptowskej chce zwjazkowy prezident Frank-Walter Steinmeier wažnosć sewjeroafriskeho kraja za Němsku podšmórnyć. Je to prěnja jězba zwjazkoweho prezidenta do Kaira po 25 lětach. Steinmeiera chce egyptowski prezident Fattah al-Sisi jutře w stolicy Kairu witać. W rozmołwach póńdźe tež wo konflikt na Bliskim wuchodźe. Steinmeier chce poziciju Němskeje rozłožić. Swojeho zwjazkarstwa z Israelom dla je Němska wjele sympatije w regionje přisadźiła.

Trump a Harris w duelu

Washington (dpa/SN). Prěni króć we wólbnym boju scyła chcetaj so přichodnu nóc kandidatka demokratow za zastojnstwo prezidenta USA Kamala Harris a bywši republikanski prezident Donald Trump w telewizijnym duelu rozestajeć. Direktna konfrontacija wobeju je me­dialny wjeršk prezidentskeho boja do wólbow 5. nowembra. Wosebje za Harris je duel chutne pruwowanje. 59lětna bě hakle před tydźenjemi kandidatstwo wot Joewa Bidena přewzała.

Bamž we Wuchodnym Timoru