W pozadku, skromnje a na to dźiwajo, njerěčeć wo njelehnjenych jejach, přihotuje dekanantne dušepastyrstwo we Worklecach jewišćowu inscenaciju „Z TOBU – Bohu swjećene lěto“. Ćim wjetša bě překwapjenka wulkeje ličby přizjewjenych dźěći dla, kotrež chcedźa sobu činić. Mjeztym su cyłe swójby njesćerpliwe a chcedźa zhonić wjace wo holcy z wulkoměsta, kotraž přez cyłe lěto w serbskej swójbje na wsy bydli a sej nabožno-narodny swět Serbow wotkrywa. Kajka to rjana ideja zwuraznić začuća, dožiwjenja a nazhonjenja młodostnych, kotřiž dźensa w druhich krajach inspiraciju za swoje žiwjenje pytaja. Za přesahowacy pak mam wotmysł iniciatorow, tworić socialnu syć mjez dźěćimi a dorosćacymi. Wosebje so mi lubi, zo narěča holcy a hólcow, kiž rady spěwaja, rejuja a dźiwadło hraja. A móža tež z Drježdźan, Lipska, Berlina ... być. Štó wě, zwotkel su so dźěći přizjewili. Wjeselmy so tuž na premjeru w oktobrje. A wostańmy dale ­wćipni! Milenka Rječcyna

Lipšćanske knižne wiki lětsa pandemije dla znowa wupadnu, mjeztym třeći króć po 2020 a 2021. Mnohe wotprajenja wustajerjow su zarjadowarjo jako přičinu mjenowali. W hornjołužiskich nakładnistwach wuwabi wotprajenje mjerzanje a strach. Peticija sej žada, zo so wiki přiwšěm přewjedu.

Hura, prózdniny! Maće za jězbu do sněha wšo spakowane? Kedźbujće na so, zo njeby so wam w sněhu njezbožo stało, kaž 15lětnemu protagonistej noweje młodźinskeje knihi „Bjez čriji“. Ben je ze sněha­kami do sypanskeho wozydła zrazył. Kak tomu? Što bě přičina, zo je tak njemdrje a bjez rozuma horu dele smalił? Tute ­prašenje přewodźa cyłu stawiznu a młodźi čitarjo budu nad wotmołwu cyle wěsće hłowu wić. Dźakowano přełožerjomaj Janje Štillerovej a Pětrej Šołće maja čitarjo wot 13 lět napjatu lekturu za zymske prózdniny! W online-shopje našeho nakładnistwa móža sej digitalnu wersiju tež na swoje šmóratko sćahnyć. A na našej facebookowej stronje je krótki wabjenski film wozjewjeny.

Přednošk wo pomnikach tu a na swěće wuwabi tež prašenje za přichod

Budyšin (SN/CoR). „Móžeš pomnik kaž Bismarckowy z lěta 1904 dźensa znowa natwarić? Z nim zwjazane hódnoty njejsu hódnoty dźensnišeje demokratiskeje a pluralneje towaršnosće. Bismarckowy pomnik njehodźi so hižo do našeho časa“, podšmórny dr. Sönke Friedreich z Drježdźanskeho Instituta za saksku ludowědu a stawizny wutoru na zjawnym internetnym přednošku Budyskeho archiwoweho zwjazka. Jeho nawodnica dr. Grit Richter-Laugwitz wuzběhny při witanju wjace hač 20 zajimcow, zo běchu referat awtora knihi „Monumente (in) der Region – Denkmäler als Zeugnisse städtischer Erinnerungskultur in Sachsen (1871–1914)“ hižo do debaty wo znowapostajenju Bismarckoweho pomnika planowali. Přitomni dóstachu wčera tež dohlad do aktualnych diskusijow wo pomnikach nacionalistisko-kolonialistiskeho razu na druhich městnach swěta. „Dilema je, zo historiskej hódnoće monumenta wotpohladana wopominaca hódnota napřećo steji, kotraž časej hižo njewotpowěduje“, rozłoži ludowědnik.