Wojerowski FC II – SJ Njebjelčicy 5:1 (3:0)

Zestawa hosći: Hahn – Haška, Reineke, Ričel (46. Kral), Matješk, Pawlik, Hanuza, Čornak, F. Domš, O. Domš, Korjeńk

Pola koparjow Njebjelčanskeje SJ wokomiknje wjele hromadźe njeběži. Přeco zaso pobrachuja někotři stajni hrajerjo, ale runje tak tón prawy zapal ke konstruktiwnemu bojej. Zo su Wojerowčenjo na techniskim polu lěpši cyłk, je dawno znate. To w hrě z dobrej bojownosću trochu narunać pak so Njebjelčanam tučasnje njeradźi. Na spočatku zhłójčkowa Handrij Korjeńk wólny kop Chrystofa Pawlika nimo wrotow, a po dobrej štwórć hodźinje sadźi kapitan Rony Hanuza z lěweje strony přihraty bul wyše wrotow. Hižo w 27. min. ležeše bul k zastatkej 1:0 w klětce. A dwě mjeńšinje na to wuběža wrotar Nico Hahn přezahe, a domjacy z 2:0 (29.) nawjedowachu. Přiwšěm hosćo cyle bjez šansow njeběchu. Tak přesadźi so Korjeńk ze soloběhom přez lěwu stronu hač do Wojerowskeje šěsnatki, tam pak wospjet zwrěšći. Jako Jurij Haška při wonkownej liniji bul zhubi, wuži to domjacy Marcel Bierholdt a prasny jón wysoko k 3:0 do hornjeho kuta (45.).

Křesćan Zahrodnik (na wobrazu z mišterskej kobłu Namibiju) je nowy wicemišter Sakskeje w mnohostronskim jěchanju. ­Hnydom za nim wubědźi sej Jakub Bobka kónc tydźenja w Hórkach bronzowu medalju. Pančičanscy sportowcy z jěchanskeho towarstwa ­Při Klóšterskej wodźe zawěsćichu sej tež dalše prědnje městna. Tak na přikład Marlene Matikec z Łazka, kotraž doby mnohostronske jěchanje klasy E. Britta Zahrodnikowa móžeše dresurowe pruwowanje klasy A za sebje rozsudźić, a w Hórčanskim ­mustwowym pruwowanju běchu Pančičanske holcy – Franciska Bobkec, Marlene Matikec, Paulina Borowitzec a Mayte ­Hetmankec – prěnje. Najspěšniši zapřah měješe René Bulank ze Smjerdźaceje. Foto: Konstantin Hrjehor

Awtorka dźensa Halena Jancyna

Kónc tydźenja wotmě ­so zaso tójšto sportowych zarjadowanjow, tak tež jěchanski turněr na a wokoło sportnišća w Hórkach. Hižo 28. raz organizowaše tam konjace sportowe towarstwo Při Klóšterskej wodźe Pančicy-Kukow jěchanske wubědźowanja. Tež lětsa ležeše fokus na přezpólnym jěchanju kaž tež při wuhotowanju sakskich mi­šterstwow. Tójšto přihladowarjow a lubowarjow konjaceho sporta bě do Hórkow přijěło.

ST Ćisk – SJ Chrósćicy 1:4 (0:1)

Zestawa hosći: Králíček – L. Zahrodnik, M. Zahrodnik, Sentivan, F. Zahrodnik, Wornar (62. Mützner), Runt, G. Zahrodnik, Matješk (85. Mark), Krawc (70. Zynda), Bogusz

Sobotu podachu so Chróšćanscy koparjo do Ćiska. Po dwěmaj poražkomaj chcychu chowancy Pavela Runta skónčnje zaso raz tři dypki žnjeć. Domjacy so wot spočatka hry hłuboko do swójskeje połojcy stupichu. Tak mějachu hosćo mnoho rumow w srjedźnym polu, kotrež su wužiwali a spěšnych nadběhowarjow zasadźili. W 17. min. so Pawoł Krawc na lěwym křidle derje přesadźi a chcyše poprawom Jana Bogusza w šěsnatce posłužić. Tola zakitowar bě před nim a suny bul k 0:1 do hóstnych wrotow. Chróšćenjo dale dominowachu a na dalše wrota tłóčachu. Přeco zaso móžachu so Krawc, Bogusz a Franc Matješk přesadźić, nje­běchu pak zmužići dosć swoje móžnosće doskónčnje k wrotam přetworić. Domjacy běchu stajnje po zmylkach hosći w srjedźnym polu strašni, ale njemóžachu sej žane jasne šansy nadźěłać. Na tamnej stronje móhli Chróšćenjo rezultat hišće w prěnim połčasu zwyšić, stajnje pak móžachu domjacy tomu w poslednim wokomiku hišće zadźěwać.