Z wudaća: wutora, 20 junija 2017

Kamjenc (SN). Wosebite koncertne dožiwjenje změja wopytowarjo 8. julija na Kamjenskej Pastwinej horje. Tam wustupi wuspěšna a znata rockowa spěwarka Bonnie Tyler. Z kapału a ze swojim njezaměnliwym škropawym hłosom prezentuje wona wšitke swoje hity, kaž „Total Eclipse of the Heart“ abo „Holding out for a hero“, ale tež produkcije z aktualneho albuma „Rock & Honey“, kotryž je wuběrna měšeńca mjez poradźenymi rockowymi spěwami a wulkimi baladami. W připowědźi koncerta mjez druhim rěka, zo je Bonnie Tyler kaž słódne wino: čim starše, ćim lěpše.

Lisćiki za Kamjenski koncert dóstanu zajimcy internetnje pod www. eventim. de abo we wšitkich znatych předpře­dawanišćach. Telefoniske skazanki su móžne pod čisłom 01806/ 570 070.

Za koncert na Pastwinej horje móža čitarjo Serbskich Nowin pjeć króć dwaj zastupnej lisćikaj dobyć. Štóž chcył je měć, njech zazwoni jutře, srjedu, wot 10 do 10.30 hodź. do redakcije SN, a to pod telefonowym čisłom 03591/ 577 232.

Dalše předewzaća rozjimali

Budyšin. Maćica Serbska chce so na ekskursiji do Ochranowa ze serbskim dźělom stawiznow bratrowskeje wosady zeznajomić. To wobzamknychu čłonojo předsydstwa wčera w Budyšinje. Pozitiwnje hódnoćachu woni zasadźenje towarstwa za to, zachować Budyski Serbski dom jako towarstwowe srjedźišćo.

Zeleni kritizuja ministra

Drježdźany. Sakski financny minister Georg Unland (CDU) žněje ze swojim žadanjom za masiwnym wottwarom dźěłowych městnow w krajnych institucijach kritiku Zelenych. Lutowanja su „přiběracy strach za fungowacy stat“, po­twjerdźi nutřkowny fachowc Zelenych w krajnym sejmje Valentin Lippmann. Unland chcył dołhodobnje 16 000 městnow šmórnyć.

Zrěčenje podpisałoj

Dźesaćitysacy šulerjow so w zawodach a druhdźe socialnje angažowali

Budyšin (SN/mwe). Třinaty króć je so dźensa wjace hač 30 000 młodych Saksow na akciskim dnju „genialsocial – twoje dźěło přećiwo chudobje“ angažowało. Šulerjo 7. do 9. lětnika 283 kubłanišćow – mjez nimi 48 z hornjołužiskeho regiona – njesedźachu tuž na šulskej ławce, ale běchu sej dźěłowe městno pytali. Nadźěłane pjenjezy sej holcy a hólcy za sebje njezdźerža, ale darja je za socialne projekty w Sakskej a po cyłym swěće. Sakski ministerski prezident Stanisław Tilich (CDU) je tež lětsa zaso kmótřistwo najwjetšeje młodźinskeje solidarneje akcije kraja přewzał.

Kaž w minjenych lětach su šulerjo mjez druhim z Wyšeju šulow Halštrow a Malešecy, ze Serbskeho gymnazija Budyšin, z Łazowskeje šule a z Hušćanskeje ewangelskeje šule w domjacych rjemjeslniskich firmach dźěłali. Wukonjachu tež poměrnje jednore dźěła w chorowni, we wšelakich institucijach a pola priwatnych wosobow doma.

Namołwa k lětušemu wubědźowanju wo rěčam přichilenej komunje „Serbska rěč je žiwa“ je městu Budyšinej nastork za dwě specifiskej zarjadowani. Wo ideji je njedawno tudyši dźěłowy kruh za serbske naležnosće zhonił.

Budyšin (SN/at). Pozitiwnu powěsć jako prěnju: Sobudźěłaćer Budyskeho měšćanskeho zarjadnistwa Wolfgang Zettwitz zbliži čłonam dźěłoweho kruha wuslědk rozmyslowanjow, kak móhło město na lětuše wubědźowanje „Rěčam přichilena komuna“ reagować. Trěbny je předmjet, kotryž na měšćanske žiwjenje skutkuje. Toho bě sej wěsty. Namjetowaše tuž, dwě zjawnej zarjadowani w Kamjentnym domje wotměć. Lětsa nazymu chcyli so z temu zaběrać, kak město zajimam młodych Serbow wotpowěduje. Za klětu nalěto wón dale poruči, wobswětlić wočakowanja na Budyšin jako „stolicu Serbow“. Z woběmaj zarjadowanjomaj by město specifiski nowy puć nastupiło.

Poslednje posedźenje Budyskeho wo­krjesneho sejmika do dowoloweho časa bě njespektakularne. Zajim wokrjesnych radźićelow zbudźichu informacije wo saněrowanju tudyšeho dwórnišća.

Budyšin (SN/at). Ze spominanjom ­na 7. apryla zemrěteho wokrjesneho radźićela dr. Franka Stübnera je so wčerawše posedźenje Budyskeho wokrjesneho sejmika zahajiło. Na to wobkrućichu wokrjesni radźićeljo 37lětneho Jensa Dietzmanna z Kamjenca jako naslědnika w frakciji Lěwicy, a krajny rada Michael Harig (CDU) jeho spřisaha. Dietzmann dźěła w běrowje zapósłanče Marion Junge (Lěwica).

Radźićeljo mějachu na to dalše personalne rozsudy tworić. Woni delegowachu krajneho radu Hariga, Holgera Erlera (wobaj CDU), Rolanda Fleischera (SPD/Zeleni), Svena Gabriela (FDP) a Wolfganga Mudracka (Lěwica) za nowu wólbnu periodu do dohladowanskeje rady Hornjołužiskich klinikow ptzwr. Radźićelej Hansej-Jürgenej Stöberej (Lěwica) dowěrichu smjerće Franka Stübnera dla wakantne městno w zarjadniskej radźe Budyskeje wo­krjesneje lutowarnje.

Je zawěrno z dobrej tradiciju, zo wopytaja dźěći z běłoruskeje kónčiny Buda-Košeljowo we wobłuku swojeho přebytka we Łužicy Budyski Serbski muzej. Hromadźe z wědomostnej wolontarku muzeja Móniku Ošikowej (naprawo) je 15 holcow a hólcow dźensa słowjesa přirunowało, kak rěkaja serbsce, rusce a běłorusce. We wobłuku Černobylskeje pomocy so regionalna skupina Budyšin Towaršnosće Sakska–wuchodna Europa z.t. wo běłoruskich hosći stara. Rjany čas pak so nachila. Póndźelu, 26. junija, so woni zaso na dompuć nastaja. Foto: SN/Maćij Bulank

Budyšin/Chrósćicy (SN). Jutře, 21. junija, je sćelak Deutschlandfunk z hosćom w Chrósćicach. Kaž Domowina zdźěli, wusyła Deutschlandfunk dźeń do zahajenja XII. mjezynarodneho folklorneho festiwala „Łužica“ z farskeho dwora live-přinošk „Länderzeit“ (10.10–11.30 hodź.).

Rozhłosownicy chcedźa pokazać, kak wobydlerjo we Łužicy swoju kulturu, wuměłstwo a rěč haja a što to za jich zwja­zanosć z domiznu woznamjenja. Tule temu ma redakcija tež za připosłucharjow w druhich zwjazkowych krajach za zajimawu. Nimo toho chcedźa wuwědomić, kak je móžno wohroženu rěč zachować a přichodnym generacijam dale dawać kaž tež, kak maja so etniske mjeńšiny škitać.

Rozmołwni partnerojo budu jutře mjez druhim Chróšćanski farar Měrćin Deleńk, direktorka Budyskeho Serbskeho muzeja Christina Boguszowa, młodostni Antonija Wjeselic, Pětr Dźisławk a Lukaš Kólca kaž tež předsyda Domowiny Dawid Statnik. Wšitcy zajimcy su wutrobnje přeprošeni, so jutře jako hosćo live-wusyłanja wobdźělić.

Berlin (dpa/K/SN). Wonkowny minister Sigmar Gabriel žada sej skutkownišu mjezynarodnu podpěru za zmištrowanje nuzy, kotruž ćěkancy po cyłym swěće tradaja. „Němska sama tele wužadanje njezdokonja“, zwurazni politikar SPD składnostnje swětoweho dnja ćěkancow. „Trěbne su zhromadne mjezynarodne napinanja po sprawnym rozdźělenju zamołwitosće, zo by so běda ćěkancow złahodniła a k dołhim migraciskim krizam docyła njedochadźało.

Wjac hač 120 ludźi zahinyło

Rom (dpa/K/SN). Při znjezboženju łódźe na Srjedźnym morju je prawdźepodobnje 126 ludźi zahinyło. Mjezynarodna organizacija za migraciju powołuje so při tym na wuprajenja štyrjoch ćěkancow, kotřiž móžachu so do Palerma na Sicilskej wuchować. Woni tež rozprawjachu, zo běchu pašowarjo ludźi wosrjedź morja motor gumijoweho čołma wotstronili a so na to prosće zminyli. Čołm ze 130 ludźimi, pochadźacymi zwjetša ze Sudana, so na to podnuri.

Sakska CDU dale sylna

Sakska kultusowa ministerka Brunhild Kurth (CDU, naprawo) je wčera najlěpšich wotchadnikow sakskich wyšich šulow wuznamjeniła­. Mjez 93 mytowanymi bě tójšto z Hornjeje Łužicy, mjez druhim Rafaela Šěnec (SWŠ Ralbicy), Susana Nowakec a Marvin Hascha (wobaj WŠ Slepo) kaž tež Tamara Weichec (WŠ Malešecy). Brunhild Kurth dźakowaše so zdobom wučerjam, kotřiž­ dźě maja wulki podźěl na wuspěchu šulerjow, rěka w medijowej zdźělence ministerstwa. Wuznamjenili su mjez druhim tež chowancow­ wyšich šulow z Wulkeje Dubrawy, Halštrowa, Wóslinka a Nowosólca-Hródka. Foto: SMK/Stefan Kreissig

Martin Luther jako playmobilowa figurka eksistuje mjeztym milion króć. Minjene dny su milionty 7,5 centimetrow wulki eksemplar z pjerom a bibliju w ruce wupósłali, zdźěli zhotowjer hrajkow Geobra Brandstätter w frankskim Zirndorfje. Mini-Luther w talaru je tak najwuspěšniša jednotliwa figura w stawiznach předewzaća. We wobchodach ju njepředawaja, dóstanješ pak figurku w turistiskich centralach. Produkować dała bě ju Ewangelska cyrkej w Němskej.

Ze swojim běhanskim kolesom je so štyrilětny na jězbu po Schwerinje nastajił. Swojej maćeri wón ničo njepřeradźi, jako so wčera popołdnju z nakromneho dźěla města do centruma poda. Po tym zo bě syna podarmo pytała, zawoła mać policiju. Hodźinu pozdźišo pěšce mały ćeknjenc napadny, a wona zawoła policiju. To měješe hólc hižo štyri kilometry zady so.